¹ Yinba yaaba n tiini ki ŋua mi teginma, yinba yaaba n lingi O Diedo, cengi mani nni! Yaadi mani ki diidi ban kpie yi ya tangu kani, yeni ban ñani yi ya tanlongu nni. ² Yaadi ki diidi mani i báa, Abrahama, yeni Saara yua n mali yi; Kelima, wan den ye o baba ya yognu i, ke N den yini o. Ama N den yadi mi yedŋanma opo, ki cedi ke o mali boncianla. ³ Lani n yeni, O Diedo gbia Siyɔn po mi niñima, o gbia yaaba n ye ti diegbendi nni yeni po mi niñima; O ba cedi o fanpienma ń tua nani Edeni yeni, o tialu yu n ye Jurden kpenjaali po yeni, mo ń tua nani O Diedo gɔgdigu yeni; li pamanli yeni li pamankandikaali baa ye u niinni, i yani yeni i kogdimuani n ba taani yeni ti pagdi yeni a donda. ⁴ N niba, fangi mani i yula, kuani mani i yama kuli i ya niinni, N buolu, diadi mani i tuba ki cengi nni! Kelima, Yiko ba ña a kani i, N ba cedi n bujiali ń dɔgdi, ki tua yenma i nibuoli kuli po. ⁵ N teginma nagni, n faabma mo ba dɔgdi, n buadi mo ba jia i nibuoli buudi; yaaba n ye a kpendega po ba bili bi dudugdi kuli npo; bi baa dugi n buagu paalu po. ⁶ Yaadi mani ki diidi tanpoli po, ki tibni mani ki diidi ki tinga, kelima, tanpoli ba bodi nani i muñii yeni i, ki tinga mo ba yɔndi yɔndi ki ba nani ya tiagu n dudi yeni, ki niba mo ń kpe kpe nani i naasii yeni. Ama n faabma ki pia gbenma hali ya yognu kuli, n teginma mo kan gbeni hali bada. ⁷ Cengi nni mani, yinba yaaba n bani yaali n tie mi teginma, yinba yaaba n kubi n ñɔmaama i pala nni; Da jie mani bi niba sugdi, yeni bi falga kuli, da ŋɔni mani i gbanu kelima ban ba dini yi ya fee po. ⁸ Kelima, u piidigu ba kua ki yodi ba nani ya tiagu n dudi yeni, li kuoli mo ba kua ki yodi ba nani ti gbankobdi yeni; ama, n teginma wani baa ye hali ya yognu kuli, n faabma mo baa ye hali nifiima ń tuu nifiima. ⁹ Findi, findi, O Diedo! Findi tonma yeni a buagu ń pia ya fidu kuli. Findi nani u yogu nni yeni, nani ya nifiima n den pendi yogu nni yeni. Fini ka den pua ki guli Ejipti ii, fini ka den pua ki kpaa o bonfuodbiado oo? ¹⁰ Fini ka den cedi ke mi ñincianma ñima fuadi, mani ya ñima n ñua boncianla yeni, ki bili u sanu mi ñincianma tiipo, ke ŋan daa ki faabi yaaba ń fidi ki pendi ii? ¹¹ O Diedo ń faabi yaaba ba lebdi ki kpeni yeni i, ki pundi Siyɔn yeni i pamandanyani, ki yili ya pamanli n ki pia gbenma bi yula po; bi baa gbie yeni li pamanli yeni li pamankandikaali, li bubuuli yeni i fanfabni mo ń sani ki fagdi. ¹² Mini liga i, Mini n baagdi yi. Be ya po i, ke i go baa jie o nisaalo yua n ba kpe, o nisaalo biga yua ya miali n tie nani ti muadi yeni ii? ¹³ Be n cedi ke i sundi O Diedo, i tagdo po, wani yua n dadi ki tandi ti talwadi, ki bili ki tinga tanpuuli ii? Be n cedi ke i ye daali kuli ya jawaanciandi n ki pia gbenma nni, kelima i yibali yua n fii ki sedi ipo yeni o pabiencianli, ki bua bolini yi yeni po. Yua n wangi a fala yeni pabiencianli ye le i? ¹⁴ Li kan waagi, bi ba luodi ban den luoni yua li kpaadidieli nni, o kan kpe, ki jiidi ku kpienbuogu nni, o jiama mo kan pɔdi o. ¹⁵ Kelima Mini n tie O Diedo, i Tienu, yua n lengidi mi ñincianma, ki cedi ke mi ñingola fu; o yeli n tie, O Diedo, U Paaciamu Kuli Daano. ¹⁶ Mini n kuani n maama a ñɔbu nni, ki ŋɔgni a yeni n nuu sɔngu, ki dadi ki tandi ti talwadi, ki bili ki tinga tanpuuli, ki yedi Siyɔn yaaba, 'Yinba n tie n niba.'" ¹⁷ Findi mani, findi mani, fii ki sedi mani, yinba Jerusalema yaaba, yinba yaaba n ñuni O Diedo nuu nni pabienli tadñukaaga, ki guo, gaadi yeni; yinba yaaba n den ñuni ki fuadi yaali n den ye ki nufufuuga tadñukaaga nni yeni. ¹⁸ Yin den mali ya bijaba kuli siiga, oba kuli ki den ye ki ba gobdi yi; yin wubi ya bijaba siiga, oba kuli ki den ye, ki ba cuo i buagu, ki dadi yi. ¹⁹ Lani bonlieda kuli kpabni ki nandi a; ŋma nan baa mɔa apo? falaciamo yeni mi bolinma, mi koma yeni bu tɔbu. ŋma nan ba baagi a? ²⁰ I bijaba gbali, ki bibili i sankuni kani kuli, nani ya pialo n baa ku diagu nni yeni; ke O Diedo pabienli jaagi bi yula po, ke i Tienu mo fu yeni ba. ²¹ Ama mɔla, cengi mani ya maama ne, yinba, ban waani yaaba fala, ynba yaaba n ñuni ki guo ki gaadi, ke laa tie daama ka: ²² I Diedo, O Diedo, i Tienu, yua n ga o niba kɔnli yedi ya maama ne, "Diidi mani, N ga ki nufufuuga tadñukaaga i nuu nni, n pabiencianli n ye ya tadñukaaga nni yeni, i ji kan ñu ki niinni. ²³ N ba mubni ga yaaba n den wangi yi fala nui nni i, yaaba n den yedi yi, 'Labni mani, tin ŋmaa yi ki pendi'; lani n den cedi ke i buani den tua tinga, ki tua sanu bani bi santɔgiba po, ke ban ŋmaa ki pendi."