¹ O Diedo ń yedi ya maama n ne, "Min ñani i naá yeni ya poñatili yeni ye le i? N kuadi yi yeni n pandanba bile ya po i? Diidi mani, bi kuadi yi kelima i tuonbiadi po i, yeni yin den fiini ya yenyiema yeni ya po, lani n cedi ke bi den deli ki ñani i naá. ² Be ya po i ke min den cua, N den ki la ba nilo oo? Be ya po i, ke min den yini niloba kuli ki den tuo oo? N buagu den kɔbigi ki kandi yeni min faabi yi yo oo? Bii mii den pia ya fidu n dagdi ki ba faabi yo oo? N cedi ke mi ñincianma fuadi ki tua nani mi fanpienma yeni; bi jami ba bedi kelima ñima luoma po, u ñuñuunu mo ba ba biani ba. ³ N cedi ke tanpoli bɔndi cinm nani bi pini ti talwadi yeni ti pabɔntiadi yeni." ⁴ N Diedo, O Diedo puni nni bi ŋɔdkaaba lanbu, ke min bandi min ba maadi ya maama, ki todi a tadma; O findi nni siŋaagu kuli, ki maadi n tubli nni, ke min cengi nani bi ŋɔdkaaba ń cengi maama yeni. ⁵ Ti Diedo, O Diedo luodi n tubli, ke mii den tie yenyiedo, mii go den sudi ki gani puoli mo. ⁶ N den cabi n benbengu yaaba n den pua nni, ki cabi n kpianu, yaaba n den dia ki ŋabi n langbiadi Mii den pii n nunga po bá yeni ban den fiagdi nni, ki siini ti ñɔsandi n nunga nni kuli. ⁷ Kelima Nn Tienu O Diedo todi nni; lani n cedi ke mii dini fee; lanya po i, ke N den juagi n nunga nani ku tangu yeni, ki bani ke n kan fiagi. ⁸ Yua n saagi i mɔni nagni nni. ŋma n go ba bu yeni nni ii? Tin taani ki togi tiyaba ti buudi yudanba kani. ŋma n yini nni ti buudi yudanba kani? Wan tuogi nni na. ⁹ Diidi, n Tienu O Diedo cua ki todi nni. ŋma n ba tuni nni i tagli ii? Diidi, bi kuli ba dudi nani ya tiayiekaadi n bedi yeni; u piidigu ba kua ki yodi bi kuli. ¹⁰ I siiga nni, ŋma n fangi O Diedo? ŋma n cengi o naaciemo maama? Yua n cuoni li biigli nni, ki naa pia yenma, wan bili o dudugdi kuli O Diedo po, ki ya daani o Tienu po. ¹¹ Diidi, yinba yaaba n juu u mu, ki bali ya piemi n co umu yeni, kua mani yin cuoni ya mu yeni siiga nni, lan ya mu n ba liabi yi. N nuu paal po n cedi ke lanya bonli kuli nandi yi; i ba kpe falaciamo nni i.