¹ Yinba a kpendega yaaba, cengi mani nni! Yinba ya nibuoli n ye hali fagma, diadi mani i tba ki cengi nni. O Diedo yini nni, ke N dá ye n naá tugu nni, ki yini, ki taa n yeli ban mali nni ya daali. ² O den luani ki mangi ñɔbu nani ya jugsiega n mani polpoli yeni, ki den wuoni nni o nuu nni, O den cedi ke n tua nani ya piemu n sondi yeni, ke o guani ki niani nni wan bali ya luoli yeni nni. ³ O den yedi nni, "Fini n tie n naaciemo, Israyeli, Min ba tɔgni yua ya kani, ki waani n kpiagdi." ⁴ Ama n den jiini, "N cɔgni n yuli fanma fanma baba i, ki biandi n gbanmanu fanma fanma po, ama, n mɔnkundi ye O Diedo kani i, n tuona pani mo ye yeni n Tienu." ⁵ Mɔla, ao adiedo maadi; wani yua n tagi nni hali n naá tugu nni, ke min ya tie o naaciemo, ki guani yeni Jakɔbo puolŋuani o kani, ki cedi Israyeli yaaba kuli ń taani o kani, lanwani ii, n baa li seli O Diedo kani, ke n fidu mo ñani N Diedo kani i, ⁶ ke o yedi nni, "ŋan tua n naaciemo, ki ba guani yeni Jakɔbo buoli puolŋuani, ki go guani yeni Israyeli yaaba siiga, yaaba n sieni yeni dá ki dagdi. N ba cedi ŋan tua i nibuoli kuli po mi yenma, ke n faabma ń tandi ki gedi hali i tinbiani po." ⁷ O Diedo, Israyeli Tienu yua n gagdi ki ŋani, yua n daa ki faabi ba yeni, maadi ki yedi, "Ban fali yua, i nibuoli kuli ń nua yua ke o jɔgni, ki tie bi tugtondanba yonbo yeni, bi baditieba ba la o, ki fii ki sedi, bi badbijaba ba la o, ki gbaani ki pugi o, kelima, O Diedo yua n tie dugika po, yeni Israyeli Tienu yua n gagdi ki ŋani yeni ń gandi o ya po." ⁸ O Diedo ń yedi ya maama n ne, "ŋan den bua n todma ya yognu, a den yini nni, ke n tuo, ki jiini a, ŋan den lingi mi faabma ya yognu, N den todi a ki faabi a; N ba kubi a, ki dini a, ki cedi ŋan loli n ŋantaado yeni bi niba, ki guani ki maa ban den gedi ki baa ya diema, ki dini li faali, ke bi bolini ma yeni. ⁹ Ki yedi a kpaada mo, 'Ña mani;' ki yedi yaaba n ye li biigli nni, 'Dɔgdi mani, ban la yi.' Bi baa tie nani ban kpaa ya yandi i sankuni yeni i, ke bi baadi bi jiema a juana po. ¹⁰ Koma kan cuo ba, ñuñuunu mo kan cuo ba, tintantonma yeni yenwulgu kan duoli ba, kelima, yua gbia bi niñima baa gobdi ba, ki ciandi ba a ñinbuna kani. ¹¹ N ba cedi n juana kuli ń tua sani, ki guani ki ŋanbi a sanjaciama." ¹² Diidi, Bani n yeni, bi ñani hali fagma, ki kpendi; bine ñani nijienu yeni nintuali; ke tianba mo ñani niganu po, Sinimi diema po. ¹³ Tanpoli n yiini i pamandanyani, ki tnga mo ń mangi ki pali; yinba a juana, kpaandi mani ki yigni yeni li pamanli yani! Kelima O Diedo baagi o niba, ki gbia bi niñinniba po mi niñima. ¹⁴ Ama, Siyɔn den tua, "O Diedo ñɔli ki ŋa ti, o sundi tipo o." ¹⁵ "pomado ba fidi ki sundi o canpandiga po oo, bii, ya pomado n ŋaandi o biga ba fidi ki sundi kipo nani waa pia kipo niñima yeni ii? Nn, bi ba fidi ki sundi, ama, Mini wani kan sundi ipo. ¹⁶ Diidi, N diani i yeli n nupangu nni; N nua yognu kuli i bilinguona. ¹⁷ I bijaba n tiini ki kpendi yeni, yaaba mo n den cedi ke i dogu tua diegbengu yeni fanpienma yeni mo n tiini ki ña i diema nni yeni. ¹⁸ Yaadi ki diidi mani i kaalindma, bani n taani ki kpendi i kani yeni. O Diedo yua n fo, poli ki yedi, "Bi ba tua apo nani ti kpiagdi tiayiekaagu yeni, a ba yie ba nani o pocaano badu tiadi yeni. ¹⁹ I dogu yu den tua diegbengu, dogmudingu yeni fanpienma, yeni pabɔnli bonli, Mɔla, a ba tua ya dogu n waa boncianla u niba po, yaaba n den waani yi fala yeni mo ba sani ki fagdi. ²⁰ Ban den fie i bila yaaba yeni, baa yigni i tuba nni, ki tua. 'U kaanu waagi ki kandi tipo, ŋmiagi mani timo ń baa ki kua, ki kali.' ²¹ Lanwani ii, i ba yedi i pala nni, 'ŋma n mali tipo ya bila ne? Kelima, tii den pia biga, ti den tie ŋɔlmu i, ti go den ye ti yonbidi i, ke bi go deli ki ñani ti mo, ŋma nan wubi tipo ya bila ne? Diidi, ti den ye ti baba i, ya bila ne nan ñani le i?"" ²² N Diedo, O Diedo ń yedi ya maama n yeni, "Diidi, N ba duoni n buagu i nibuoli po, ki caani li tuudcabli i nibuoli po. Lanwani ii, bi ba yugdi i bijaba yeni bi buadi, ki cua yeni ba, bi ba bugi i bisiaba bi buacabdi po, ki cua yeni ba. ²³ Bi baditieba n ba tua i bila biyuaba, bi badbisiaba mo n baa dingi, ki jelni yeni i bila; Bi ba ñuani, i nintuali, ki gbaani ki liadi i taatama; Yeni, ke i ba bandi ke Mini n tie O Diedo; yaaba n dugi npo kan di fee." ²⁴ Bi ba fidi ki guani ki fie o jakɔndo ń fagi yaali ii, bii, ki faabi o tugtondaano ń kubi yua li kpaadidieli nni ii? ²⁵ Ama, O Diedo ń yedi ya maama n yeni, "Nn, Bi ba fie o jakɔndo ń fagi yaali, o tugtondaano mo ń cuo yaaba mo ba ŋmadi; kelima, N ba mua mi jama, ki kɔni yeni i yibalinba, ki faabi i bila. ²⁶ N ba cedi i yibalinba ń ŋmani bi gbannancedi, ki ñu bi sɔceama, ki guo, ki gaadi nani ku daamńŋñɔngu yeni. Lanwani ii, nisaalmiali kuli ba bandi ke Mini O Diedo n tie i candaano, i daafaabika, Jakɔbo puolŋuani Paciamu Daano."