¹ Cengi mani, Jakɔbo puolŋuani, yinba yaaba n kubi Israyeli yeli, ki ñani Juda buolu nni; yinba yaaba n polni O Diedo yeli po, ki jaandi ki miadi Israyeli yaaba Tienu, ama, mɔmɔni yni teginma ki ye i tuada nni. ² Kelima, bi yi bi yula u dogagdiŋamu yaaba, ki dugi Israyeli Tienu po. O yeli n tie O Diedo, U Paaciamu Kuli Daano. ³ Hali mi cilma, N den tuodi ki waani yaali n ba tieni; li maama den ñani Mini ya ñɔbu nni i, ke n cedi ke bi kpaandi ki waani, ke bi niba ń bandi; N den ludi ki cedi ke lanya bona kuli tieni yenma i, ⁴ Kelima, N den bani ke i punkpaali juagi nani ti kudi yeni, ke i tulu mo wagi nani ti kumɔndi yeni, ⁵ lanya po i, ke N den tuodi ki waani yi li laabaali hali ke li dá fagi, ke li ti fidi ki tieni, ke li nan sua ke yi ga li laabaalo o. lanwani ii, i kan yedi, 'Ti buli n cedi ke li tieni,' bii, 'Min kpiedi, ki go duadi ya nannana yeni ya buli yeni n cedi ke li bona tieni.' ⁶ I gbadi li bona kuli; yin faama li bona kuli po bonŋanla! Yinba wani ii, i kan tuo ki puni li laabaali ke min yedi yaali tie mɔmɔni ii? Mɔla wani ii, N ba cedi yin bandi ya bonli n tie bonpaanli, yin den ki kpeli ki bani yaali. ⁷ Mɔla, laa tie kpiama ya maama ka, li bona ba tieni, dinne yaaka, i naa kpeli ki gbadi li maama, lanwani ii, i kan yedi, 'Diidi, ti bi bani li bona po.' ⁸ I ki kpeli ki gbadi; I den ki bani lipo; Li bona laabaalo den ki kpeli ki baa i tuba nni. Kelima, N bani ke i tie janbciami danba i, hali i i naá tugu nni, i den tie yaaba n fiindi mi yenyiema i. ⁹ Kelima, Mini ya yeli po, N ba sieni n pabienli, kelima min pundi ya kpiagdi po, n ba lagdi min bi bobni ipo ya bolinma. ¹⁰ Diidi, N den tongi yi ke i dondi, ama, laa tie ban dondi ŋanjilfa maama ka, ama, n bieni i gbani mi yebiadma nni i. ¹¹ Kelima, Mini ya yeli po i, li tie Mini ya yeli po i, ke N tieni yi yeni; kelima, N ba tieni ledi i, ki cabi ban ya fanbidi n yeli nanda aa? N kan taa n kpiagdi ki teni nitiano. ¹² Jakɔbo puolŋuani, min yini yinba yaaba, Israyeli yaaba, cengi nni mani: Mini liga i; Mini n tie o nikpialo, ki go tie o nijuodka. ¹³ Nn, n nuu n puu ki tinga tanpuuli, ke n nujienu dadi ki tandi ti talwadi; N ya yini ba, bi yi taani, ki fii, ki sani ki cua. ¹⁴ I kuli ń taani mani na, ki cengi nni! I siiga nni, ŋma n den puni li bona laabaalo?O Diedo ń bua yua yeni n ba tieni U Tienu ń jagi ke o ba tieni Babiloni yaali. O Diedo yanbuama po, wani ya nuu n ba pua Kalde yaaba. ¹⁵ Mini n yeni, Mini n yedi, Mini n yini o, Mini n cedi ke o cua, o ba sɔni o tuonli lan buali maama. ¹⁶ Nagni mani na, cengi mani ya maama ne: Hali mi cilma, mii den maadi wuoli nni; hali li bona cilma, N den ye li kani." Mɔla mo, O Diedo n sɔni nni yeni o fuoma. ¹⁷ O Diedo, i Candaano, Israyeli Tienu yua n gagdi ki ŋani yeni yedi ya maama ne, "Mini O Diedo, i Tienu n ba tundi yi, ki ŋanbi ipo, wani n baa gobdi yi, ki wangi yi yin ba tɔgni ya sanu. ¹⁸ Li ya bi tie ke i cɔlni n yikodi, i yanduanma yeni i nuukubli bi baa tie nani kpenciamu yeni i, i faabma yeni i teginma mo, nani mi ñincianma ñingbanu po yeni. ¹⁹ I puolŋuani bi ba yabdi ki pundi i kpentanbiini, i bila mo ń ya yabi nani i tanbiini yeni; bi yela bi kan piini, bii, ki bodi n nintuali." ²⁰ Sani mani ki ña Babiloni nni! Sani ki fagdi yeni Kalide yaaba! Yigni mani i pamandanyigni, yigni mani ki kpaandi ki waani li laabaalo! Cedi mani i tinbiani kuli yaaba ń gbadi li laabaalo! Yedi mani, 'O Diedo faabi o naacenba, Jakɔbo puolŋuani.' ²¹ Ñuñuunu ji kan cuo ba, wan ba gobdi ki kuani ba ya tinkuonga nni; O cedi mi ñima pudi ki puubi ku tangu nni, ke bi ñu; o pua ki yagdi ku tangu, ke mi ñima pudi ki yadi. ²² O Diedo yedi, ke yanduanma ki ye nibiadba po."