¹ Babiloni badbisiaba, jiidi mani ki kali mi tama nni; Kalide badbisiaba, jiidi mani i badikpaga po, ki kali mani tinga nni. Bi kan ya yi yi bi poŋanba yeni ya puoba n mangdi a pala mi yema nni. ² Gedi ki nandi mani mi yoma li naali po; libdi mani i cablibinkaana, Duoni mani i liadfagda, ki ban dagni a pana, ki cuoni ki puodi i kpeni. ³ I ba legdi ki ŋa i mubima, ban la yi, Nn, bi ba la i fee: N ba tuu yi li panli, N kan jie nilo niñima. ⁴ O yeli n tie, ti Candaano, O Diedo, U Paaciamu Kuli Daano, Israyeli Tienu yua n gagdi ki ŋani. ⁵ Yinba Klide badbisiaba, kali mani li biigli nni, ki ya ŋmini suo; kelima bi ji kan yini yi mi diema badpuoba. ⁶ N pali beni n buolu po; N biidi n faali, ki taa ki gedi, ki tieni i nui nni, ama, yii den gbadi bipo niñima; i tugni u buolu nikpelo ya tugli n kpiagi. ⁷ I den yedi, "Tinba n baa tie bi badbisiaba ya yognu kuli." I den ki tia ki kuani li bonli i pala nni, i go den ki maali li bonli lebdima ń ba cua maama. ⁸ Lanwani ii, cengi mɔla, ya maama ne, fini yua n kaa mi yanduanma yeni u yemanu nni yeni; fini yua n tua a pali nni, "Tinba baba n yeni mi yema, yaaba n sieni kuli, fanma i; kpepuodi kan baa tipo hali bada, ti go kan bandi maakuugu mo." ⁹ Ama lanya payiani lie kuli ba baa yi yognuba, daayeli i: ku maakuugu yeni ti kpepuodi ba taani ki baa yipo yeni li yebiadma kuli, bá yeni i bulgbandi, i bayuadiida yeni i ñɔgtila kili. ¹⁰ I den dugi i biadma po i; i den tua, "niloba kuli naa nua ti"; i yanfuoma yeni i ninfanbu kuli n tulni yi, ama, ke i tua, "Tinba yaaka nitɔa ki ye ki tie nani tinba." ¹¹ Mi yebiadma ba ludi ki baa yi; i bulgbandi yeni i ñɔgi kuli, i kan fidi ki lɔgdi li fala yema. Mi bolinma ba ludi ki baa ipo, ke yii bani man ñani naani. Mi yebiadma ba ludi ki baa ipo, ke i kaa, kaa bani. ¹² Ya kubi mani i bulgbandi yeni i ñɔgi kuli, ke li paa, nani yin den maani ki tiendi maama hali i panma nni yeni; daalinba li ba ŋanbi ipo, hali bi niba ń jie yi, daalinba, i ba fidi ki lɔgdi fala yeni mi yebiadma. ¹³ I cɔgni i yula yeni i bulgbandi i ñɔgi yeni i lingma kuli; yaaba n yaadi ki nua tanpoli, ki diidi u yienu yeni i ŋmaali, yaaba n kpaagi ki lingi o ŋmaapaano, ki lingi yaali n ba cua yeni yaali n ba tieni; cedi mani bani ń faabi yi mi yebiadma yognu. ¹⁴ Diidi, bi ba juu ki buodi u mu nni nani ti muakuondi yeni i. Bi kan fidi ki faabi bi yula u mu nni. li mu naa tie ban puli kpanu yeni ya mukuana ka, u naa go tie ban kaa ki yie ya mu ka! ¹⁵ Yin den juogi yeni yaaba, hali i panma nni, ki cɔgni i yula yeni yaali, yin den daa, ki go kuadi yeni yaaba yeni, ń ba juodi maama n yeni, bi kuli li tugni ki tiendi bi yanpiituona i; i ya yigni ki miadi todma mo, oba kuli ki ye, ki ba fidi ki faabi yi."