¹ O buciamo Beli gbaani, o bulo Nabo mo buani; bi taa bi buli yeni bi nannana kuli, ki tugni ti yandi, ya yandi n tugi a tugikpiaga.Yin den pugi, ki kpiagdi ya buli yeni, yini n tie tugikpiaga ti yandi po yeni. ² Bi taani ki buani, ki gbaani, ki pugi, bi naa fidi ki ba faabi bi buli yeni bi nannana, bi taa bikuli i, ki ban caa ti yonbidi. ³ Cengi mani nni, yinba Jakɔbo puolŋuani yeni yinba Israyeli buolu, yaaba n sieni, min den tugi yaaba ya tugli hali i naa tugu nni, ki ban tuoni hali yeni i madidaali. ⁴ Hali yeni i ciandma nni, Mini li tugi yi, ki ban pundi hali i yupiendi yognu, ki li bii ki tugi yi. Mini n tagi yi, ki kubi, ki go guu yi, ki tugi yi, ki go ba faabi yi. ⁵ I ba nangi nni yeni ŋma i? I maali ke n naani yeni ŋma i, ke i ba nangi ti? ⁶ Bi yogdi bi bɔgli nni wula kuli, ki bigni ŋanjilfa yeni li bonbiginkaali. Bi ga o maano, ki pani o tuonli pani, ke o duadi bipo o bulo, ban baa ñuandi yua ya kani, ki tieni o ti kpiagdi, ki go gbaandi ki pugi o. ⁷ Bi yugdi o bulo, ki bugi, ki gedi yeni o; ki ban seni o o kaanu, o bulo li see o kaanu, kaa ŋmiagi o kaanu. Bi yigni ki yi o, o kan fidi ki tuo, o go kan fidi ki faabi ba ban ye ya yognu li pabɔnli nni. ⁸ Tiadi mani lipo, ki da sundi, yinba yaaba n den fiini mi yenyiema yeni! ⁹ Tiadi mani ya bona n den tieni hali mi cilma, ya bona n tieni ki pendi, kelima, Mini n tie U Tienu, tientɔa ki ye, Mini n tie U Tienu, tiano ki ye ki tie nani mini yeni. ¹⁰ Hali mi cilma yognu, N den wangi yaali n ba ti cua, hali yogu mo, N den wangi yaali n dá ki tieni; N den yedi, "N yanjaga kuli ba tieni ki tii, N go ba tieni min bua yaali mo." ¹¹ N yini o kaabo, ke o ñani puoli po, ki yini min gandi ya ja, ke o ñani hali fagma ya diema nni; wani n ba tieni min jagi ke N ba tieni yaali; Nn, Min yedi yaali lani n ba tieni; Min jagi yaali, li ba tieni ki tii. ¹² Cengi mani nni, yinba yaaba ya pala n juagi yeni, yinba yaaba ya tuada fagi yeni mi teginma yeni. ¹³ N cedi ke mi teginma nagni, maa ji ye fagma ka, O Diedo faabma ji kan waagi ki cua; N ba cedi Siyɔn ń baa mi faabma, ki puni Israyeli mo u ŋamu yeni li seli.