¹ O Diedo yua gagdi ki ŋanbi, Siirusi, wan kubi yua ya nujienu, ki ba pua ki jiini i nibuoli, o nintuali, ki ñagdi bi badiba gbanñagirdi, ki pua ki luodi ti bulñɔluordi, o nintuali, ke tin da go luoni, ki ya yaa, yedi o ya maama ne: ² "N ba ga a liiga, ki pua ki ladi, ki sali a juana; N ba pa ki mudi ti kumɔndi gana, ki mudi a kudigana yomyomi, ³ N ba teni a ya ŋalmani n wuo li biigli nni, yeni ya piama n wuo hali fagma, ke ŋan bandi, ke li tie Mini i, O Diedo, Israyeli yaaba Tienu, yua n taa a yeli, ki yini a. ⁴ N yini a yeli, kelima n naaciemo Jakɔbo puolŋuani po yeni Israyeli yaaba, min gandi ya buolu po i. N taa a yeli, ki yini a; ki puni a ya yeli n ŋani, ki pia ti kpiagdi, bá yeni ŋan ki bani nni kuli. ⁵ Mini n tie O Diedo, tiano ki ye; Tientɔa ki ye ki kandi mini. N bobni apo, ti jatiadi, ki baa paagdi a, bá yeni ŋan dá ki bani nni; ⁶ ke bi niba ń bandi, ki cili u yienu ń pudi naanpo, ki ya caa hali wan baali naankani, ke mini n tie U Tienu, Tientɔa ki ye; Mini n tie O Diedo, tɔa ki ye. ⁷ Mini n tagi mi yenma, ki go tieni li biigli; mini n puuni mi yanduanma, ki go ba fidi ki cua yeni mi yebiadima; Mini n tie O Diedo yua n tieni lanya bona kuli. ⁸ Tanpoli, cedi mi manma ń baa! Ti talwadi ń cedi mi teginma ń jiidi, ki ya puubi. Ki tinga ń luodi, mi faabma, yeni ŋalbalga ń tieni, mi teginma ń taani yeni mi faabma ki puuni ki loni a luana. Mini O Diedo n tagi lankuli. ⁹ Fala baa ye yeni yua n fu yeni o tagdo, wani yua n tie tiamaakaagu, ya tiamaakaadi n sieni ki tinga nni siiga! Ku yɔgu ba buali o tiamaalo, 'A tiendi be i?' bii, li tuonli ń buali yua n tuuni, 'ŋaa bani li tuonli yo oo?' ¹⁰ Fala baa ye yeni yua n yedi o baamado, 'Be n ced ke a mali nni? bii ki buali o naamado, 'Be n cedi ke a mali nni?' ¹¹ O Diedo, Israyeli Tienu, yua n gagdi ki ŋani yeni, yua n tagi a, yedi ya maama ne: 'Be n cedi ke i buali nni min ba tieni yaali n niba po oo? Be yapo i, ke i buali nni min tieni yaali yeni n nui po oo?' ¹² Mini n tagi ki tinga, ki tagi o nisaalo ki tieni o kipo. N dadi ki tandi ti talwadi yeni n nuu i, ki gobdi tanpoli tɔgola, a ŋmaabila kuli. ¹³ Mini n yini Siirusi, ki tigi o yeni mi teginma, N ba ŋanbi ki ladi o sani kuli. Wani n ba guani ki maa n dogu, ki faabi n niba, ki cedi yaaba n ye fagma ń guani ki kpeni, kaa pia panli ki buali suuli lipo,"' O Diedo, U Paaciamu Kuli Daano n yedi yeni. ¹⁴ O Diedo yedi ya maama ne, "Ejipti yaaba tuonli ñuadi yeni Etiyopi yaaba baali yeni Seba yaaba, ya niba n ti nifagda boncianla yeni ya bali, ba cua a kani, ki tua a ŋalmancelu. Bi kuli ba ŋɔdi a puoli, ke bi nui luoli yeni i kudbaabi, ki ŋɔdi a puoli. Bi ba gbaani a nintuali, ki pugi a, ki mia a, ki yedi, 'Laa pia tama, U Tienu ye fini baba ya kani i, Tientɔa ki ye ki kandi wani."' ¹⁵ Mɔmɔni i, a tie ya tienu n wuondi o yuli i, Israyeli Tienu, O Candaano. ¹⁶ Bi kuli ba fiagi, ki tibni bi yula, bani yaaba n tagi i buli yeni, bi baa ye yeni i fee hali bi miali bianu. ¹⁷ Ama, O Diedo ba faabi Israyeli buolu, bi ba baa ya faabma n ki pia gbenma; oba kuli ji kan fiagi yi, hali yeni i miali bianu. ¹⁸ O Diedo, U tienyendu yua n tagi tanpoli, ki tagi ki tinga, ki tieni ga, ki seni ga ki kaanu. Waa tagi ga tinkuonga ka, ama ke bi niba ń ya ye kipo i; wani n yedi ya maama ne: "Mini n tie O Diedo, tɔa ji ki ye. ¹⁹ Mii maadi wuoli nni ka, naankani n wuo ki tinga po ka; N ki yedi Jakɔbo puolŋuani, 'Lingi nni mani yin kan la nni naani! Mini n tie O Diedo, yua n maadi i mɔmɔni, ki maadi ki wangi yaali n tiegi. ²⁰ Taani mani ki cua n kani! Nagni mani na, yinba yaaba n sani ki ciadi i nibuoli siiga! Yinba yaaba n tugi a nannana yeni i buli, yii pia yin bani yaali, i jaandi ki miadi ya buli n kan fidi ki faabi yi. ²¹ Cua mani na, nagni mani na, ki saa i mɔmɔni! juogi mani ki taani ki dɔgdi yaali n tie i mɔmɔni. ŋma den cili ki maadi li laabaali, hali mi cilma? ŋma n den kpaandi ki waani li laabaali Mini ka aa, O Diedo ka aa? Lan ñani Mini, yua n tie ya Tienu n tiegi, ki go tie i candaano. Tientɔa ki ye, ki kandi Mini. ²² Yinba yaaba n ye i tinbiani po, guani mani n kani, ki baa mi faabma; kelima Mini n tie U Tienu, tientɔa ji ki ye. ²³ N poli n yuli po, I mɔmɔni ña n ya ñɔbu nni i, n maama mo ki pia lebdima: 'Dunli kuli ba gbaani n nintuali, lanbu kuli mo ba poli n yeli po. ²⁴ Lanbu kuli ba maadi n maama, ki yedi, "Mi teginma yeni u fidu ye O Diedo baba ya kani i."" Bi kuli ba fiagi, bani yaaba n den bieni bi pala npo yeni. ²⁵ Israyeli yaaba puolŋuani ba baa ti mɔnkundi yeni ti kpiagdi O Diedo kani i; bi ba baa mi yemanma O Diedo yapo i.