¹ Mɔla, yinba Israyeli yaaba, min gandi ya buolu, n naaciemo, Jakɔbo puolŋuani, cengi mani: ² O Diedo, yua n tagi yi, ki tieni yi i naa tugu nni, wani yua n ba todi a, ki kubi a yedi ya maama ne: "Da jie mani liba kuli, n naaciemo Jakɔbo, yeni fini Jesuruna, min gandi yua. ³ Kelima, N ba wuli mi ñima ki tinkuonga po, ki cedi i kpeni ń puubi ya tinga n kuodi po; N ba yadi n fuoma a puolŋuani po, ki go maani li seli i madi kuli po. ⁴ Bi ba pa ti kpenmuadi siiga nani i kpentiidi yii n baali i ñinsani nni yeni. ⁵ One ba yedi, 'Min tie O Diedo yua i' o tiano mo ń yini Jakɔbo yeli, nitiano mo ń diani o nuu po, a tanpala, ki yedi 'N tie O Diedo yua i' ke Israyeli mo ya yeli n tie o kpiagdi." ⁶ O Diedo, Israyeli badciamo yeni o candaano, U Paaciamu Kuli Daano, yedi ya maama ne: "Mini n tie o kpialo yeni o juodka, tietɔa ki ye, kase mini. ⁷ ŋma n tie nani mini, ki ba fidi ki maadi nani mini yeni? Wan maadi ki dɔgdi ki waani min den tagi bi niba ya yognu, ki waani yaali n den kpia ki tieni, yeni yaali n ba juodi ki tieni. ⁸ Da jie mani, da digibi mani. Mini ka den cedi ke i gbadi li maama, ki go cedi ke bi kpaandi ki waani yi ii? Yinba n tie n siedanba: tienuba go ye ki kandi Mini ii? Tancianguba kuli ji ki ye, ke mii bani gu" ⁹ Yaaba n tagi i buli tie fanma i; ban ŋanbi yaali, ki lingi ya nannana kuli ki pia mayuli; bi siedinba ki pia nuni, baa nua pu, baa pia yama, baa bani pu mo, bikuli ba fiagi. ¹⁰ ŋma n ba tagi, bii ki duadi ya bulo n ki pia mayuli, kaa bani lan ba funi opo yaali ii? ¹¹ Diidi, yaaba n tuuni lanya tuona kuli ba fiagi; li tonsɔnbanda kuli tie nisaalba i. Cedi mani ban taani bi kuli, ki cua o kani, bi ba digibi bi kuli, ki di i fee. ¹² O maano maa li yali, ki tuuni yeni a kuana, ki puli lan mɔndi, wan pua yeni hama, ki tadi li. O tuuni yeni o nuu yu n paa yeni, mi koma ya cuo o, o ba tadgi, u ñunuunu ya cuo o, kese wan cɔgi. ¹³ o kpiekpiedo mo bigindi ku daagu yeni u baabibiginkou, ki diani ki lindi gu. O diani o bulo nannanli, yeni lan ba jia maama bianu, ki bigni bonŋanla. O tagi o bulo ke o naani yeni o nilo, li nannanli n baa dia bi niba, ke bi caa wan see ya dieli nni. ¹⁴ O cuani Sedri tiidi, lanyaaka waan gandi Sipri tiiga bii terebenti tiiga. Wani n yi gandi ya tiidi n ŋani li fuali nni, ke o ba cua. O yi ŋuu pen tiiga, ki cedi ki taaga ń nii, kan kpedi. ¹⁵ Lanwani ii, bi niba ba duo ya daadi n ba cuoni u mu, ki tongi u kaanu, wan yie, ki taa ya daadi n sieni ki kuuni, ki tieni mi jiema. Lanwani ii, o ba tagi o bulo yeni ya daajenli n sieni, ki ya gbaandi ki pugi o. ¹⁶ O yi taa ti daadi yeni bɔgdima, ki cuoni u mu, ki sɔgi ti nandi, ki ŋmani, o pali ń mangi. O go congi u mu ki yie, ki tua, "Li mani boncianla, yeni min yeli u mu." ¹⁷ Ya dajenli n sieni, o ba tagi lani o bulo, ya nannanli ke o kpiedi, o yi gbaandi o ya kani i, ki pugi o, o yi jaandi ki mia o, ki yedi, "Faabi nni, kelima fini n tie n tienu." ¹⁸ Baa bani liba kuli, baa gbia liba kuli ya niima nni, kelima, bi pii bi nuni po, ke ban da nua, ki pii bi pala, ke ban da bandi liba. ¹⁹ Oba kuli ki tieni maalma, baa tia mo, ki ba yedi, "N sia ti daadi bɔgdima, ki cuoni u mu, n tieni mi jiema yeni a mukuana, ki sɔgi ti nandi yeni li daadi mu, ki ŋmani. Mɔla, n ba taa ya daajenli n sieni ki tagi ya bonli n gundi, ki ya gbaaandi ki pugi li ii? Li buali ke min gbaani ki pugi li daajenli ii?" ²⁰ Li naani o mua mi fantama ; O yanpiima n tulni o. O kan fidi ki faabi o yuli, o kan fidi ki yedi, "Min kubi yaali n nuu nni ne tie ya bulo n ki pia mayuli i, tofaama baba i." ²¹ Yinba Jakɔbo puolŋuani, Israyeli yaaba, ya tiani mani ya bonli n tieni ne po: Mini n tagi yi, ke yin tua npo n naacenba: Israyeli, N kan sundi apo. ²² N bolni i tagli nani u taayiinu yeni, ki piini i tuonbadi yeni i yenyiema nani ku gbantangbaangu yeni. Guani mani n kani, kelima mini n daa ki faabi yi. ²³ Tanpoli, mangi mani i pala, ki yiini i pamandanyani, kelima, O Diedo sɔni o tuoncianli; ki tinga po yaaba mo ń yigni mani yeni li pamanli. A juana ń yiini i pamandanyani, a fuana yeni i tiidi kuli yigni mani yeni li pamanli; kelima, O Diedo daa ki faabi Jakɔbo puolŋuani, ki ba dɔgdi ki waani o kpiagdi Israyeli diema nni. ²⁴ O Diedo, i candaano, wani yua n tagi yi hali i naa tgu nni yedi ya maama ne: "Mini n tie O Diedo, yua n tagi bonli kuli, wani yua n dadi ki tandi ti talwadi, o baba, wani yua n tagi ki tinga, o baba. ²⁵ Mini n biani bi tofaadanba fanma, ki cedi ke a baayuadiida yeni bi jabaaba juodi fanma; Mini yua n cedi ke bi yanfodanba yeni bi cegli kuli tua yanluomaama. ²⁶ Mini yua n saagi n naaciemo po i mɔmɔni, ki cedi ke n tonda ń den pua ya sawali tieni ki tii, N den yedi Jerusalema po, 'U ba guani ki baa bi niba,' ki yedi Juda dociami po, 'Ban guani ki maa yii, yaali n den mudi kuli ba guani ki fii'; ²⁷ Mini yua n yedi mi ñincianma, 'Ñuudi, N ba cedi i kpenciami mo ń ñuudi cain.' ²⁸ Mini O Diedo n yedi n naaciemo Siirusi, 'Fini n tie n yankpaalo, fini n ba tieni n yanbuama kuli; O ba yedi Jerusalema dogu po: 'Ban guani ki maa u!' Ki yedi U Tienu diegu mo yapo, 'Ban cili ku tanpuuli!