¹ Ama, mɔla, O Diedo, wani yua n tagi fini Jakɔbo, ki tieni fini Israyeli, n yedi ya maama ne: "Da jie mani liba kuli, kelima Mini n daa ki faabi yi, ki yini i yela, i tie min die yaaba i. ² I ya kua mi ñincianma nni, N ye yeni yi; i ya puodi i kpenciami, mi ñima kan milni yi. I ya cuoni u mu nni, u kan sia yi, u mupienu kan juu ki buodi yi. ³ Kelima Mini n tie O Diedo, i Tienu, Israyeli Tienu yua n gagdi ki ŋani, i candaano. N puni Ejipti diema i daafaabma po, ki cedi ke Etiyopi yeni Seba lebdi, ki ga i kaanu. ⁴ Nani yin pia mayuli npo yeni, nani yin pia buamɔnma n nintuali yeni, ke N bua yi boncianla n yeni; lanya po i, n ba cedi i nibuoli ń lebdi ki ga i kaanu, ki teni bi niba, ki daa ki faabi yi, ki ga i miana. ⁵ Da jie mani liba kuli, kelima N ye yeni yi; N ba ñani i puolŋuani, puoli po, ki yini yi nintuali po, kitaani yi. ⁶ N ba yedi niganu po yaaba, 'Cedi mani ban guani,' ki yedi niganu po yaaba, 'Da bii kubi ba mani;' Guani mani yeni n bijaba yaaba n ye fagmadiema nni, ki cedi n bisiaba yaaba n ye u tinbianu po diema ń guani, ⁷ Min taa yeli yeni yua, Min tagi yua, n kpiagdi po, Min tieni yua, Min ŋanbi yua, guani mani yeni o. ⁸ Cedi mani ya nibuoli n jɔa yeni, ń ña, bá yaaba n pia i nuni, yeni a woma, bá yaaba n pia a tuba, ki gbia. ⁹ Mi diema yaaba kuli ń taani, i nibuoli kuli, yin taani mani yenma. Bi siiga nni, ŋma n den kpeli ki pua sawali, yaali n tieni po oo? ki waani yaali n den tieni, hali mi cilma aa? Ban yini bi siedanba, ban cua ki maadi, ki saa bipo i mɔmɔni, ki yedi 'Li tie mɔmɔni i.' ¹⁰ O Diedo yedi, "Yinba n tie n siedanba" Yinba yeni n naaciemo, min den gandi yua, lanwani ii, yin bandi ki go dugi npo, ki bandi ke li tie Mini i. Hali mi cilma, tienuba ki kpeli ki ye, ki kandi Mini, tienuba kan go cua n ya puoli po. ¹¹ Mini n yeni, Mini n tie O Diedo, candaanoba kuli ki ye ki kani mini. ¹² Mini n den yaadi ki yedi, ki go cua yeni mi faabma, ki cedi ke bi kpaandi, tienuba kuli ki ye i siiga. Yinba n tie n siedanba," O Diedo yedi, "Mini n tie U Tienu. ¹³ Nn, ki cili dinne, hali yeni ya yogu kuli, Mini n tie U Tienu, niloba kuli kan fidi ki fie min muubi yaali n nuu nni, N ya tieni yaali, ŋma nan ba fidi ki yie npo oo?' ¹⁴ O Diedi, i daafaabma daano, Israyeli Tienu yua n gagdi ki ŋani yeni, yedi ya maama ne: "I ya po i, ke n sɔni o nilo Babiloni po, N ba tulni ba, ki jiini ba ban sani nani i yonbi yeni, Babiloni yaaba pamandanyani ba lebdi ki tua bubuuli yeni fanfabni baba i. ¹⁵ Mini n tie O Diedo, ya Tienu n gagdi ki ŋani, yua n tieni Israyeli, i badciamo." ¹⁶ O Diedo, yua n tieni li sanjali mi ñincianma nni, ki tieni ki sanbiga mi ñinpuubkaama nni, yedi ya maama ne, ¹⁷ Wani yua n gedi bu tɔbu yeni ti tɔturdi, yeni i taami, yeni a tɔgola yeni a jakɔnda. Bikuli bia mi ñima nni; bi ji kan fii, bi buodi, ki gbindi nani li fidcabli yeni. ¹⁸ Ji da tiadi yaali n den tieni kpiama po, yin da go kpaagi ya bonli n pendi hali yogu po. ¹⁹ Diidi mani, N ba tieni ya bonli n paani; li cili mi tienma o, i dá ki la li ii? N ba bili li sanjali mi fanpienma nni, ki cedi i kpeni ń puubi ki tinkuonga nni. ²⁰ Ti muayandi ba yiini ki dondi nni i kuani nni, i fuasangbanli yeni ti tɔgtɔgnuandi kuli, kelima, N ba cedi mi ñima ń pudi mi fanpienma nni yeni ki tinkuonga nni, ki ya ñungi n niba, ²¹ min tagi, ki go tieni ya niba n ya yeli po yeni, bi ba kpaandi ki kpiagi n yeli, ki yini n donda. ²² O Diedo yedi, "Jakɔbo buolu, yii taagi mini ya yeli ka; Israyeli yaaba, i cɔgi yeni nni, ki miadi nni ²³ I den ki taa i pabila ki padi mini ya po ka a padjuukaana, i den ki kpiagdi n ya yeli ka i pada nni. Mii den niini ka, ke yin cua yeni npo paabu, mii go den ŋɔdi yi yeni paalu ka, ke yin juu npo tulaale yeni li ŋubŋanli. ²⁴ I den ki taa i ligi ki daa ya tisinma n pia u nuulmanu npo, i go den ki guoni nni yeni i padnankpama mo. Ama, i den tugni n yuli po i tuonbiadi, ki kuani nni ki mabinga yeni i tagli yeni i tuadbiada. ²⁵ Mini i, Nn, Mini n duuni, ki ŋuudi, ki ñani yin tieni npo ya biadma kuli, yeni i tagli; N ji kan tiadi i tuonbiadi po. ²⁶ Guani ki tiadi mani yaali n den tieni, ke tin taani ki jia ti buudi; maadi mani iba, ki saa ipo i mɔmɔni, lan waani ke yii pia tagli. ²⁷ I yaajanba den tieni ti tuonbiadi, ke i gobdikaaba mo tudi npo, ki fiini mi yenyiema. ²⁸ Lanya po i, ke n den diidi ki sua ke u kaangagdiŋamu nni tuonsɔnba den jɔgni boncianla, ke n cedi ke Israyeli yaaba fiagi ba, ki buoni ba."