¹ Diidi mani n naaciemo, min kubi yua bonŋanla;min gandi yua n pali ń mani yua ya po. N kuani n fuoma o niinni, O ba waani ŋanduna kuli mi teginma. ² O kan tiani, O kan doni o nialu, ban gbadi u i sani nni. ³ O kan kɔnli ki dudi yua muanu n diegi, o kan gbindi ya fidcabli n ŋubi: O baa jiagi ti buudi yeni ti mɔnkundi, yeni mi teginma. ⁴ O kan tadigi, O kan wadi o pali, o go kan sudi ki guani puoli mo, hali yeni wan ba kaani ti mɔnkundi yeni ya buujiali n tiegi, ki tinga po; a kpendega po yaaba kaa, ki guu o yikodi. ⁵ O Diedo ń yedi ya maama n yeni; wani n tagi ti talwadi, ki ladi ti, wani n tagi ki tinga yeni yaali n ye kipo kuli, wani n puuni yaaba n ye kipo kuli mi fuoma, wani n go puuni yaali n cuoni kipo kuli mi fuoma yeni li miali: ⁶ Mini, O Diedo n yini a, mi teginma po, N baa muubi a nuu. N baa guu ŋa, ki puogi a, ŋan kuani n ŋantaado, mini yeni n niba siiga, ki go ya tie i nibuoli po, mi yenyenma. ⁷ Ki luodi a juama nuni, ban nɔnli, ki luodi ki ñani a kpaada, a kpaadidiena nni, ki cedi yaaba n ye li bɔnbɔnbiigli nni ń ña lieni. ⁸ Mini n tie O Diedo, N yeli n yeni; N kan bɔgdi n kpiagdi yeni oba kuli, N kan go bɔgdi n donda mo yeni i buli. ⁹ Diidi, yaali n den tieni mi cilma wani pendi o, mɔla, N ji ba waani yi o laabaalpaano i. N ba tuodi ki waani yi la, hali ke li dá ki cua." ¹⁰ Yiini mani O Diedo po bu yanpaanbu, yiini mani ki dondi O Diedo, yinba yaaba n ye hali u tinbianu po; yinba yaaba n ye mi ñincianma nni, yeni yaaba n maa u ñingbanu po, yinba yaaba n ye a kpendega po yeni yaaba n kua ki balni mi ñima kuli. ¹¹ Yaaba n ye mi fanpienma nni, yeni mi dogi nni, duoni mani i nialu, ki kpaandi, yaaba n ye a dogibila nni, nani Kedari yeni ń yigni yeni li pamanli! Sela dogu nni yaaba ń yigni yeni li pamanli, yaaba n ye a juaciama po mo ń yigni i pamandanyigni. ¹² A kpendega nni, yuakuli ń kpiagi O Diedo yeli, ki yiini o donda. ¹³ O Diedo ba ña nani o jakɔndo yeni, ki mua mi jama nani o tɔtielo yeni. O ba duoni o nialu, ki kpaadi, o ba kuudi bu tɔbu kuudi, ki paadi o yibilinba, ki waani ba o paaciamu. ¹⁴ N ŋmini, ke li waagi, n ŋmini, ki ñii n pali; Mɔla N ba yigni, ki duni nani ya pua n punbi ki jiidi, ki bua mali yeni; N ba duni hali n fuoma ń ligi. ¹⁵ N ba pua ki mudi a juana yeni a juabila kuli, ki cedi yaali n sɔngi kuli, apo ń kuodi; N ba cedi i kpeni ń tua kpendega, ki cedi ti ñinbendi kuli ń fuadi. ¹⁶ N ba cedi a juama ń tɔgni ban daa den bani ya sanu, ban den ki bani ya sanbila po kuli, n ba gobidi ba. N ba cedi li biigli n ye bi liiga ń kpandi, ki tua yenyenma, Naani n den tie gbangbana kuli ba ladi ki sali, ki dagni. Min ba tieni yaali kuli n yeni, N kan ñɔli ki ŋa ba. ¹⁸ Cengi mani, yinba a woma, nɔnli mani mani, yinba a juama, ki diidi, ki la. ¹⁹ ŋma n jɔa, li nan yaa tie n naaciemo yaaka? ŋma n womi nani min sɔni yua, n naaciemo yaaka? ŋma jɔa nani yua n cua ki bua kuani n ŋantaado yeni, bii ki jɔa nani O Diedo naaciemo yeni ii? ²⁰ I la a bona boncianla, ama, i naa kpaagi apo, ki bandi lan tie yaali; i diadi i tuba, ama, oba kuli naa gbadi bonli niima nni. ²¹ O Diedo den bua wan kpiagi o yiko ki go yabnii li boncianla, ki go ya ŋani, kelima o teginma po. ²² Ama, bi den tie ban fie, ki go fagi ya niba i; bi dia ki cuo bi kuli ti buodi diadi nni, ki luoni ba a kpaadidiena nni; bi tua ban fagi ya niba, ke nilo ki ye, ki ba faabi ba, oba kuli ki ye, ki ba yedi, "gua ŋmiani ba bi bona!" ²³ ŋma ba diadi o tuba, i siiga, ki cengi li maama? ŋma ba cengi, ki gbadi li maama sala po? ²⁴ ŋma n den taa Jakɔbo puolŋuani, ki tieni ba yaaba n den fie bi ŋalmani yeni nui nni, yeni yaaba n den fagi ba nui nni ii? Li den ki tie O Diedo, yin den tieni yua yapo ti tuonbiadi ka aa, yin den yie ke i kan cuoni yua ya sanu po ka aa, yin den yie ke i kan cɔlni yua ya yiko yeni ka aa? ²⁵ Lanya po i, ke o den wuli bipo pabiencianli yeni falabiado ki cedi ke bu tɔbu bolni ba. Bu tɔbu den tuoni, ki pebdi bipo, ama, bi naa den faami lipo, bu den sia ba, ama, bi naa den taa la, ki bili bi pala nni.