¹ Yinba yaaba n kua a kpendega po, suoni mani, ki cengi nni; I nibuoli ń pugni bi fidu, ki nagni; ban nagni na, tin maadi! tikuli ń taani ki cua ti buudi po. ² ŋma n den ban fiini puoli po, yua n ŋua mi teginma, ki puogi o li tuonli? O tieni i nibuoli kuli o nui nni, ki jiini bi baditieba bi gbandi po. O jugsiega nugi ba yomi yomi, o dabanli mo yadi ba, nani u faalu ń figi, ki yadi mi muayoma yeni. ³ O ŋɔdi ki deli ba, ki pendi ke baa sii o. O baa ya sanu, ke o taana mo ki siigi tinga. ⁴ ŋma n bobni, ki cedi ke lanya yanjaga kuli tii ? Laa tie yua n yi yini nifiima ń tuu nifiima kuli, ki taani, hali mi cilma ka aa? Mini, O Diedo, o nikpialo, ki go ba taani yeni bi nijuodkaaba mo, Mini n yeni. ⁵ Yaaba n kua a kpendega po yi la o, ti jawaandi ń cuo ba i; yaaba n kua i tinbiani po ya la o, bi yi digibi i; bikuli nagdi, bi kpendi. ⁶ Yua kuli todi o lielo, ke nilo kuli tua o kpiilo, 'paagi a pali' ⁷ O tuonsɔnbando paagdi yua n duadi pali, ke yua n kpaagi yeni ki tuatuaga mo paagdi yua pua li ñinli po ya pali, o yedi mi tuginma po, 'li ŋani.' Bi kpaa, o bulo yeni a kudikpakpaana ki sieni, ke wan da begni. ⁸ Ama, fini n naaciemo, Israyeli, Jakɔbo, min gandi yua, N dɔnli Abrahama puolŋuanu. ⁹ Fini yua ke N den ban ñani a hali u tinbianu, min den ñani fini yua hali fagma kaanu, min den yedi yua, "A tie N naaciemo, Mini n gandi a, N kan lu ŋa." ¹⁰ Da jie, kelima, N ye yeni a. Da yagni a yama, kelima Mini n tie a Tienu. N ba pugni a u paalu, N baa todi a, N kubi a yeni n nujienu yu n paani bonli kuli yeni. ¹¹ Diidi, yaaba ya pala n be apo kuli, bi ba fiagi, ki di i fee, ki tibni bi yula; Yaaba n kɔni yeni a kuli ba bodi, ki tua fanma. ¹² Yaaba n den dalgi a yeni li kɔnli yeni, a ba lingi ba, a ji kan la ba; Yaaba n den tuogi a yeni bu tɔbu yeni, bikuli ba bodi ki tua fanma. ¹³ Kelima, Mini n tie a Tienu, ki muubi a nujienu, N yedi a, "Dajie liba kuli. N cua ki ba todi a." ¹⁴ O Diedo yedi, "Da jie liba kuli, fini Jakɔbo buolu yu n tadi nani li sidbili yeni, Yinba, Israyeli yaaba yaaba n tadi nani bi tinkpiba yeni, N kpendi, ki ba todi yi; Mini O Diedo, i daafaabka, Isryeli Tienu yua n gagdi ki ŋani yeni. ¹⁵ Diidi, yinba Israyeli yaaba, N ba tieni yi nani ban dia ya tiagu, ki pua ti kpaandi yeni i, ku paani, ki pia ya kpakpaana n sondi, ki mani polpoli; i ba dadi ki ladi a juaciama, ki mumudi a juabila nani mi muayoma yeni. ¹⁶ I ba pua ki lendi ba, u faalu ń figi ki yaadi yeni ba; ku finfiglanjuangu ń ba yayadi ba. Yinba, i pala ba mangi O Diedo po, I baa kpiagdi i yula kelima Israyeli Tienu, yua n gagdi ki ŋani yeni po. ¹⁷ O niñinnilo, ban wangi yua fala lingi mi ñima, ama, mi naa ye, ke bi lanbu kuodi ki tabi, u ñuñuunu po; Mini, O Diedo, n ba gbadi bi jaandi yeni bi miabu; Mini, Israyeli Tienu, N kan ñɔli, ki ŋa ba. ¹⁸ N ba cedi i kpeni ń puubi a juana nni, a ñinbuna ń pudi ti jualɔndi nni. N ba cedi mi fanpienma ń lebdi, ki tua baagu, li tinwagli mo ń tua ñinbuna. ¹⁹ N ba cedi, sedri tiidi, Akasia, mirti yeni olifie tiidi ń pudi mi fanpienma nni. N ba cedi Sipresi, Pensi yeni buyisi tiidi ń pudi a penpenla po. ²⁰ N ba tieni la, i nibuoli ń nuali, ki la, ki bandi ke Mini O Diedo nuu n tiendi lanya bona kuli, ke Israyeli Tienu, yua n gagdi ki ŋani n tagi li kuli. ²¹ O Diedo yedi, "Waani mani yin pia ya maama" Jakɔbu buolu bado yedi, "Maadi mani yin pia ya mɔmɔni, i buli po" ²² Ban waani i buli yeni, ke yin dɔgdi ki waani yi yaala n ba fandi ki cua saala po, i buli ń waani ti yaali nden ye, hali mi cilma, Yeni, ti ba tia ki bandi bona kuli ń den tieni maama, yeni, ke ti ba ŋanbi ki bandi bonli kuli cain. ²³ I buli ń waani ti yaali n ba juodi ki tieni, tin bandi i mɔmɔni, yini n ya tie U Tienu; Li buli ń tieni yaali n ŋani, bii, yaali n bia, lan kuani ti ti jawaandi, lanyaaka ku yaalidgu. ²⁴ Diidi, yinba i buli, i tie fanma, ke i tuada mo ki pia mayuli; yaaba n gandi ki ŋua i buli po, li tie yaali n gundi hali boncianla i. ²⁵ N yini nijienu po ja, ke o ñani lipo, ki cua; O ñani puoli, ki taa n yeli, ki jaandi, ki taa n yeli, ki mia nni, O ŋmaa bi paatieba nani ti tansɔngdi yeni. ²⁶ ŋma n den puni o li laabaalo, hali mi cilma, ke tin bandi o oo? ŋma n den tuodi ki maadi o maama hali yogu, ke tin yedi, "Li tie mɔmɔni i"? Lani n yeni, niloba kuli ki den maadi la, Nn, niloba kuli ki gbadi ke i maadi maamaba kuli, lipo. ²⁷ Mini O Diedo, den kpia ki puni li laabaalo Siyɔn nni, ki yedi, "Diidi ba, bi cua o;" N den yedi Jerusalema yaaba mo, "N sɔni o laabaalŋamo tondo." ²⁸ N ya diidi, N ba sua ke yaaba n pua sawali kuli siiga, bá niyendo ki ye, bá niyendo ki ye, ki ba fidi ki tua ceglika, ŋma nan ye, N ya buali, ŋma ba fidi ki jiini n buali. ²⁹ Diidi, bi kuli tie fanma i, bi tuona mo ki pia mayli; ban kpiedi ya nannana yeni bi buli kuli tie fanma, yaali n ki ye i.