¹ "Baagi mani, baagi mani n niba. ² "Maadi mani yeni Jerusalema yaaba yeni mi yankuugma, ki kpaandi ki yedi ba, ke mi janjanma gbeni, ke bi baa bi tagli po sugli, kelima, bi baa O Diedo kani, bi tuonbiadi kuli pani, taalma lie." ³ U nialu kpaandi mi fanpienma nni, ki tua: "Bobni mani O Diedo sanu; ki ladi a gbangbana ki dagni, lan tua ti Tienu sanu." ⁴ Gbieni mani ti jualɔndi, lan do, ki bedi a juana yeni a juabila ki ladi lan sali ki taani; sondi mani a sangolma kuli, ki piini ti buodi, lan dagdi, ki tua tialu; ⁵ Lanwani ii, o Diedo kpiagdi ba dɔgdi, ke pia miali kuli ń taani ki la li kpiagdi; kelima, O Diedo n yaadi o ñɔbu ki maadi yeni. ⁶ U niali yedi, "Kpaandi." Ke nmo jiini, "Min kpaandi ki yedi be i?" Ke u nialu yeni guani ki yedi, "Gbannandi kuli tie nani muadi yeni, ke bi ŋamu yeni bi dudugdi mo tie nani i kuani nni puuma yeni. ⁷ O Diedo faawaama ya figi ya yognu, ti muadi yi kuodi, ke mi puuma mo ń suodi; lanwani ii bi nisaalba tie nani ti muadi yeni i. ⁸ Ti muadi kuodi, mi puuma mo suodi, ama, ti Tienu maama wani, ye hali ya yognu kuli i." ⁹ Yinba Siyɔn yaaba, o laabaalŋamo tonda, gedi mani, ki do hali ya juali n kpedi boncianla po, ki duoni i nialu, yin da jie liba kuli. Kpaandi mani ki yedi Juda dociami kuli, "Diidi mani, i Tienu n yeni!" ¹⁰ Diidi mani, N Diedo O Diedo kpendi yeni u paaciamu, yeni ti kpiagdi, o nuu paaciamu n ba cedi wan diedi bonli kuli. Diidi, o kubi o ŋmaapani, wan faabi yaaba, o pani mo ye o liiga. ¹¹ O kpaa o yankulu nani o yankpaalo yeni, o yi bugi a pabila o buapiagu po, ki taa ba ki ŋmabi, o gobdi ya pñoe n dá ŋaandi yeni mi yandingima. ¹² ŋma da kpeli ki bigni mi ñima o nuupuogu nni, bii, ki bigni ti talwadi yeni o nuubadyaagu, ŋma taani ki tinga tama, ku baabuogu nni, ki bigni, ŋma bigni a juaciama yeni a juabila kuli ki bandi a kpiagu uu? ¹³ ŋma kpeli ki bili O Diedo fuoma po u bianu, bii ki tundi wan ba jagi maama? ¹⁴ O kpeli ki buali ŋma i, i cegli? ŋma den bangi o ban jiagi ti buudi maama, ŋma n kpeli ki tundi o, bii ki pugni o mi banma yeni mi yanfuoma? ¹⁵ Diidi, i nibuoli tie nani ya ñinbɔli n ñani ku tiagu nni ki tondi yeni i, bii nani ku tangungu, ki kelga po yeni i; diidi, a kpendega mo tie nani ya tangulungu n yugi yeni i. ¹⁶ Liban fuali daadi ka dagdi ki cuoni u mu, o fuayandi mo kan dagdi a padjuukaana po. ¹⁷ I nibuoli kuli tie o nintuali nani fanma yeni i. yii pia mayuli ki pundi fanma yaali n ki ye. ¹⁸ I ba nangi U Tienu yeni ŋma i? I ba nangi o yeni o laa bulo i? ¹⁹ Bulo! O tuonsɔnbanlo n kpiedi o: o maano n duadi o wula, ki tabni o ŋanjilfa laani. ²⁰ Yua n ki pia wula yeni ŋanjilfa paalu, o yi lingi, i naanuuni ń kan mua ya daagu i, ki juogi yeni o kpiekpiedo, wan kpie, ki tagi opo ya bulo n ba waagi ki ye. ²¹ I ki bani ii? I ki gbadi mo oo? Baa den tuodi ki maadi yi hali mi cilma aa? I ki fidi ki bandi, ki gagdi ki tinga tagdo ń tie yua aa? ²² Wani n tie yua n ye ki tinga kaalindma, tanpoli, ki nua bi nisaalba nani ti naasuudi yeni. O yi ladi ti talwadi nani kpalbu yeni i, ki guani ki gbabi nani ku jongu yeni, kun tua o yekaanu. ²³ Wani n jiini bi badtieba, ke baa tie pu, ki cedi ke ti buudi yudanba tua fanma. ²⁴ Bi naa ŋuu ba, bi naa go buli ba mo, bi ñiali naa pudi jiina ki tinga po, ke o piebi ba, ke bi kuodi, o finfiglanjuangu figi, ki tugi ba nani mi fenma yeni. ²⁵ Yua n gagdi ki ŋani buali, "I nan ji ba nangi nni yeni ŋma i, N naani yeni ŋma i?" ²⁶ Yaadi ki diidi mani polu, titalwadi! ŋma tagi ya ŋaabila ne kuli? Li tie wani yua n yi taani akuli nani tɔgoli yeni, ki taagi yua kuli yeni o yeli, ke o gaani. O paaciamu yeni o fidu po, baa yendo kan sieni kaa cua. ²⁷ Be yapo i, ke Jakɔbo puolŋuani tua,be yapo i, ke Israyeli yaaba kuli tua yognu kuli, "O Diedo naa bani tinba ń faadi ya yema, U Tienu mo nan ki faami ti teginma po oo"? ²⁸ Yii bandi o oo? Yii gbadi o maama aa? O Diedo, U Tienu yua n ye yognu kuli, Yua n tagi ki tinga biani, waa cɔgdi, waa tadgi mo, o yanfuoma mo ki pia bianu. ²⁹ O puuni yua n cɔgi u fidu, ki pugdi yua n tadgi mo u paalu. ³⁰ Bá ku nipaangu cɔgdi ki go tadgi, bi jawaaba mo tuudi ki baali: ³¹ Ama, yaaba n dugi O Diedo po, bi fidu baa pugdi i; bi yugi nani ti kaapaaciidi yeni, bi tiini, ama, baa tadgi, bi cuoni mo, ama, baa cɔgdi.