¹ Lan yognu, Babiloni bado, Baladani bijua, Merodaki Baladani den sɔni li tili yeni bu paabu Esesiasi kani; kelima o den gbadi ke o den yiagi ki guani ki paagi. ² Esesiasi pali den mangi boncianla; o den waani a tonda wan pia ya bonmɔnli kuli yeni lan wuo naankani; ŋanjilfa, wula, tulaale, li ŋubli, mi kpaŋanma, o jatiadi ń wuo naani, yeni wan den begni ya bonmɔna kuli, o den waani ba li kuli. Bonliba den ki ye o diegu nni, yeni o diema nni, ke Esesiasi ki waani Babiloni bado tonda. ³ lanwani ii, o sawalpualo Esaayi den yuandi ki cua Esesiasi kani, ki buali o, "Bi jaba ne cua ki maadi a be ya maama i? Bi ñani le i? Esesiasi den gua ki jiini, "Bi ñani hali ya diema n fagi, Babiloni po, ki cua n kani." ⁴ Esaayi den buali, "Bi la be i a diegu nni?" Esesiasi den jiini, "Bi la yaali n tie bonmɔnli kuli, n diegu nni. Li ki pia ya bonmɔnli n ye n diegu nni, ke mii waani ba." ⁵ Lanwani ii, Esaayi den yedi Esesiasi, "Cengi O Diedo, U Paaciamu Kuli Daano maama: ⁶ 'Diidi, ya dana n kpendi, bi ba doli badidiegu bona kuli ki taani yeni a yaajanba ń den begni ya bonmɔna kuli ya caa hali yeni dinne, bi ba gedi yeni li kuli Babiloni po. bonliba kuli kan sieni, O Diedo n yedi yeni. ⁷ Bi ba cuo ŋan mali ya bijaba, ki wubi ba, ki tundi ba yeni, ki gedi yeni ba Babiloni po, ban ban tua Babiloni badidiegu mɔglimu." ⁸ Lanwani ii, Esesiasi den yedi Esaayi, "ŋan waani nni O Diedo maama yaama ne mani boncianla." Kelima, li waani ke, "Mi yanduanma yeni laafia baa ye n miali dana kuli n yeni."