¹ Lanyognu, Esesiasi den yia ke li paa, ke o nagi mi kuuma mɔno. Lanwani ii, o sawalpualo Amoci bijua Esaayi den cua o kani, ki yedi o, "O Diedo yedi, 'Bobni ki waani a diegu nni yaaba ŋan pia yaali, kelima a ba kpe, a miali ji kan fagdi."' ² Lanwani ii, Esesiasi den ŋmagdi o ninjoma ki teli li diekpinli, ki jaandi, ki mia O Diedo. ³ O den jaandi ki yedi, "N mia ŋa sugli, O Diedo, tiadi min cɔlni ki cuoni a nintuali yeni ya yantugipiengu, yeni n pali kuli, yeni min tieni yaali n dagdi a nunbu nni kuli." Lanwani ii, Esesiasi den buudi boncianla, yeni ti ninsiipiendi. ⁴ Lanwani ii, O Diedo den maadi yeni Esaayi ya maama ne, ⁵ "Gedi ki ban maadi n buolu gobdika, Esesiasi, 'O Diedo, a yaaja Dafiidi Tienu n yedi ya maama n ne: N gbadi a jaandi yeni a miabu, N go la aninsiidi mo. Diidi, N ba pugni piiga n bina mu, a miali yema nni, ⁶ N go ba faabi a, ki faabi a dogu, Asiiri bado nui nni, ki sedi ki guudi li dogu. ⁷ O Diedo ń ba waani a ya maalma, lan tieni apo kasiedi, ke o ba tieni wan niani a yaali n ne. ⁸ Diidi, N ba cedi u yienu yeni u sɔngu yu bi jiidi ki pundi Ahasi kaanu yeni ń sudi puoli, hali ŋmaadokaani piiga."' Lanwani ii, u yienu den jiidi ŋmaadokaani piiga, wun den jiidi ki ye naani yeni po. ⁹ Juda bado, Esesiasi ń den yiagi, ki guani ki paagi, ki diani ya jaandi li tigbabkaali po n ne: ¹⁰ "N den yedi ke mi yema ń ba mangi npo ya yognu yeni, N ba gedi ki ya see bi tinkpiba diema bulñɔbu kani i; ki biini ya bina n sieni, hali yeni n miali bianu. ¹¹ N den yedi ke N ji kan la O Diedo, N ji kan la O Diedo bi nifuodiba ya tinga nni; N ji kan la nisaaloba kuli, ŋanduna niba kuli siiga nni. ¹² Bi ŋabi n miali, ki yaadi, ki fagdi yeni li, nani o yankpaalo jongu yeni; Nani o lugdo cabli yeni, n pundi n miali bianu, li cabli gaali jia, ki cili u yensiinu, ki ban pundi ku ñiagu, li ba sua ke n dudi, ke n miali jundi. ¹³ N dua ki yigni hali yeni ki siŋaagu; o mudi n kpaba nani o yangbanli yeni, ki cili ku yensiigu, ki ban gedi hali ku ñiagu, li ba sua ke o dudi nni. ¹⁴ N den yigni nani tablankpiili yeni, ki buudi nani kpajiega yeni. N nuni den cɔgi yeni min li cini, ki nua poli po. N Diedo, u yianu ŋmaa, ki madi nni; todi nni. ¹⁵ N nan ba yedi be i? O nan yaadi ki yedi nni, ki go tieni li mo; N miali yema nni, n baa cuoni suo suo i, kelima, min ji ye ya pabɔnli nni ne. ¹⁶ N Diedo, ŋan jiini npo ya yebiadma ne ŋanbi nni; li ŋanbli po n cedi ke pia li miali hali yeni mɔla kuli; a cedi ke n fo, ki go pia laafia. ¹⁷ Li pabɔnli tua npo nani tundi yeni, ki puni nni mi yemanma. A faabi nni ke mii kua ku tinkpibuogu nni; kelima, a luni n tuonbiadi kuli a puoli po. ¹⁸ Kelima, bi tinkpiba diema nni yaaba ka ba pugi a; bi kpienba ka ba dondi a, ki kpiagi a yeli; yaaba n jiidi ku tinkpibuogu nni ji ki dugi a teginma po. ¹⁹ Yaaba n fo, yaaba n pia miali baba n ba fidi ki pagi a, nani min tiendi maama dinne ya daali ne; Bibaanba ba togdi bi bila a teginma po. ²⁰ O Diedo faabi nni, ti ba gbaani ki pugi a, ki dondi a, yeni ti baantiadi, ti miali dana kuli O Di edo diegu nni." ²¹ Esaayi den yedi "Ban kukudi a kankana, ki faani naankani n faandi yeni, lani n tie wan paagi." ²² Esesiasi mo den yedi, "mi laa maalma n ba tieni kasiedi ke n ba do, ki gedi O Diedo diegu nni?"