¹ O bado Esesiasi ń den gbadi li maama, o de papadi o tiadi, ki yie ti yubɔntiadi, ki gedi O Diedo dieg nni. ² O den sɔni Eliyakimi, yua n den nua badidiegu cenli ŋamu yudaano, Cebina, o tidianlo, yeni salga yidkaaba siiga, a nikpela, ke bi lani li pabɔnli tiadi, ki gedi o sawalpualo, Amoci bijua Esaayi kani. ³ Bi den yedi, "Esesiasi yedi, 'Dinne tie yubɔnli daali i, sugdi yeni fee, nani ki biga ń yi bobni ki gbeni, ke ti madi ji paa, kelima tuama ji ki ye binaa po, ke wan duni, ki mali o biga. ⁴ Li ki kua O Diedo, a Tienu gbadi Asiiri bado ń sɔni o guudkaaba yudaano ke o yedi ya maama, ki sugdi U Tienu yua n fo, daalinba, O Diedo ba jia ti buudi, ki waani o fala yeni wan maadi ya maama ke U Tienu mɔno gbadi. Mɔla, ŋan yugdi a nui, ki jaandi yaaba n sieni mi diema nni po."' ⁵ Lanwani ii, o bado Esesiasi naacenba den gedi Esaayi kani, ⁶ Esaayi den yedi ba, "Yedi mani i canbaa ya maama ne: 'O Diedo yedi, "Da jie mani yeni yin gbadi ya maama po, Asiiri bado naacenba ń cua ki sugi nni ya sugdi. ⁷ Diidi, N ba cedi wan ga laabaaliba, ki kuani o yama nni, ki lebdi ki kuni o diema nni. N ba cedi ban kpa o yeni ki jugsiega o diema nni mɔno."" ⁸ Lanwani ii, bi guudkaaba yudaano den lebdi ki kuni, ki sua ke Asiiri bado pua bu tɔbu yeni Liban diema, kelima, o den gbadi ke o bado sani ki yaadi Lacisi o. ⁹ Li den yuandi ke Senakeriba gbadi ke Etiyopi bado, Tiirihaka, yeni Ejipti yaaba taani ki bobni ki ba pua bu tɔbu yeni o diema, lanwani ii, o den sɔni a tonda Esesiasi kan, ki yedi, ¹⁰ "Yedi mani Juda bado, Esesiasi, 'Da cedi a Tienu, ŋan dugi yua ya po yeni ń bɔndi a, ki yedi a, "Jerusalema kan baa Asiiri bado nui nni." ¹¹ Diidi, i gbadi Asiiri baditieba ń tieni i nibuoli diema maama, ki bolin ba cain. Lanwani ii, a maali ke a ba baa faabma yo oo? ¹² I nibuoli buli den fidi ki todi ba aa, N yaajanba ń den pua ki mudi ya nibuoli diema, ki bolini ba: Gosani, Harani, Resefi, yeni Telasaari diema nni, Edeni nibuolu, bi buli den fidi ki faabi ba n yaajanba nui nni ii? ¹³ Hamati bado ye li i, Aripadi bado, Sefarifayima dogi bado, Hena yua yeni Ifa bado, bikuli ye le i?"' ¹⁴ Esesiasi den ga li tili, ki pɔbdi, ki cogi li, ki fii ki doni ki gedi O Diedo diegu nni, ki pɔbdi li tili O Diedo nintuali. ¹⁵ Esesiasi den jaandi ki mia O Diedo: ¹⁶ "O Diedo, U Paaciamu kuli Daano, Israyeli Tienu, Fini yua n kaa ti gbandi po, Cerubennba siiga, Fini baba n tie U Tienu, ki tinga nibuoli kuli diema nni. Fini n tagi tanpoli yeni ki tinga. ¹⁷ O Diedo, diadi a tubli, ki cengi. O Diedo Luodi a nuni, ki diidi, cengi Senakeriba ń sɔni ke bi maadi ya maama, ki sugi fini ya Tienu n fo. ¹⁸ O Diedo, li tie mɔni i, ke Asiiri baditieba den bolini i nibuoli kuli yeni i diema kuli. ¹⁹ Bi den luni bi buli kuli u mu nni, ki juu ikuli, kelima, i naa den tie tieni ka, ama, bi niba nui ń den tagi yii i, i den tie daadi yeni tana baba i. Lani nden cedi ke Asiiri yaaba ki bolni yii. ²⁰ Lanwani ii, O Diedo, Ti Tienu ŋan faabi ti Senakeriba nui nni, lani n tie ki tinga nni nibuoli kuli ń bandi ke Fini baba n tie U Tienu." ²¹ Lanwani ii, Amoci bijus Esaayi den sɔni u tondu Esesiasi kani, ki yedi o, "O Diedo, Israyeli Tienu yedi ya maama ne, "Nani ŋan jaandi ki mia nni fini yeni Asiiri bado, Senakeriba maama po yeni, ²² O Diedo ń yedi ya maama opo n ne: "Siyɔn powandiana, o badsiaba fali a boncianla, ki laa, ki ñuadi a; Jerusalema badsiaba ŋua a puoli, ki pagni bi yula. ²³ A fali ŋma i, ki sugi o oo? A duoni a nialu, ki ligdi a ninbina yeni ti japaadi, ki bua tuogi, ki fali Israyeli Tienu yua n gagdi ki ŋani yeni ka aa? ²⁴ A sɔni a naacenba, ke bi sugi n Diedo, ki yedi, 'Yeni n tɔturdi yaadi n ki pia cɔli ne, n doni a juana po, hali Liban tanpojoma. N doni ki cua o Sediri yii n kpedi boncianla yeni, yeni o sipresi tiidi yii n ŋani ki cie, n ba suagi ki kua o tiikuanu yu n tie fuasieli yeni nni, o tiidi yii n kpedi yeni nni, ki cua o tiidi yii n luoni a luana bonŋanla yeni nni. ²⁵ N gbiidi a caana, ki ñuni a ñima; N cedi yeni n taapandi ke Ejipti kpeni ñima ñuudi ki fuadi.' ²⁶ ŋaa gbadi min den tuodi ki bobni li maama, hali yogu, ki jagi likuli, ki bili hali ke li fagi ii? Mɔla, n cedi ke likuli pendi. N ba cedi ya dogi nden pia u paalu, ń kpandi ki tua diegbendi. ²⁷ Bi diema nni, yaaba n ki pia paalu jie ki luodi, ke ye yeni i fee. Bi tie nani u kuanu nni muadi, bii, muasɔngdi kuli yeni, bii nani ya muagu n pa a diena polu yeni i, puoli fawaama ya figi, ti ba kuodi. ²⁸ Ama, N bani ŋan ba kali ya yognu, n bani a ñayognu yeni a kuayognu, ki bani ŋan ba bieni a pali npo ya yognu. ²⁹ Kelima a pali beni npo, ke a japaamaama baa n tubli nni, n ba kpali ŋa ti tankpadi, ki kpibni a ki tanbiaga a ñɔbu nni; N ba cedi ŋan tɔgni ya sanu ki cua yeni, ŋan guani ki tɔgni li sanu ki lebdi ki kuni." ³⁰ ŋan ba la yaali, lan tieni apo kasiedi maalma n ne: Dunne, bi ya ŋmani li bonbulkaali luana, jeli, bi ba ŋmani yaali n pudi libá. Li bintaali wani ii, li buali ke yin buli yo, ki ti yendi, i ba ŋuu ku daamɔngu tiidi yo, ki fidi ki ŋmani i bonluana. ³¹ O Diedo paaciamu po, Juda buolu nni yaaba n sieni ba guani ki pudi a jiina, ki loni a luana. ³² Kelima, O Diedo, U Paaciamu kuli daano buacianma po, Jerusalema ba baa yaaba n sieni; Siyɔn juana po mo ba baa yaaba n sani ki ciadi. ³³ Lanya po i, ke O Diedo yedi ya maama ne, ke mi nua Asiiri bado: "O kan cua ya dogu ne nni, ki buali wan tɔa dabanli nekanba. O kan pili gbankɔndigu mɔko, ki buali wan kua kɔnli nni, bii, ki kpaa bilnu, ki duoni ki do, ki baa u dogu ne. ³⁴ Wan tɔgni ya sanu ki cua yeni, o go ba tɔgni lanya sani i, ki lebdi; o kan kua ya dogu ne nni; mine tie O Diedo ya ñɔbonli i. ³⁵ Kelima, N ba kɔni ya dogu ne po, ki faabi u, Mini O Diedo ya yeli po yeni n naaciemo Dafiidi ya yeli po." ³⁶ Lanwani ii, O Diedo malekinba den ñani ki tuogi Asiiri tɔgoli, ki pua ki kpaa tɔtieba tuda kobga n piiniin n tuda mu (185.000). Bi niba den yagdi ki fii, ki sua ke bi tinkpiba bili i kaani kuli i. ³⁷ Lanwani ii, Senakeriba den siedi Israyeli diema, ki guani ki kuni, ki ban ye Niniifi dogu nni. ³⁸ Wan den kua li Nisiroki budieli nni, ki ba pugi o bulo, o bijaba Adremaleki yeni Careseri den muu o yeni ki jugsiega, ki kpa o. Bi den sani ki gedi Ararati diema nni, ki ban wuoni. Lanwani ii, o bijua Esaradoni n den kali ti gbandi po, ki ga o kaanu.