¹ Juda bado, Esesiasi bali yognu, piiga n binnaali binli, Asiiri bado Senaceribi den pua bu tɔbu yeni Juda diema, ki diedi mi diema yaaba. ² Asiiri bado den sɔni a jakɔnda yudanba yeni ya tɔtieba n yabi boncianla, ke bi ñani Lacisi, ki cua Jerusalema, ki baa o bado Esesiasi. O den nagni naankani n kpedi, ke mi ñima ña ki yadi, ki kuu yeni li sanjacianli yaali n caa o siekuodo kuanu po yeni, ki sedi. ³ Israyeli yaaba yudanba, yaaba n den ñani ki ba tuogi ki juogi yeni Asiiri niba den tie, Hilkiya bijua, Eliyakima, badidiegu cenli yudaano, o bado kadaadianlo, Cebina, yeni Asafi bijua, Yowa, yua den kubi gobna yanjaga tili. ⁴ Asiiri jakɔnda yudaano den yedi ba, "Maadi mani Esesiasi, ke o badiciamo, Asiiri bado yedi ya maama ne, 'A dugi be yapo i? ⁵ A maadi maafanma baba i, ki tua ke mi yanfuoma yeni u fidu n tie yaali n dagdi bu tɔbu po. Mɔlane, a ji dugi ŋma ya po i? ŋma n puni a li papaali, ke a yie ke n kan diedi a aa? ⁶ Diidi, a taa a dudugdi kuli, ki bili Ejipti po i, wani ya puanli n yi cɔgi ki ban poni yua n ñii o kuli yeni, Ejipi bado Faarahɔn tie yeni i, yua n dugu opo kuli po. ⁷ Ama, a ya yedi nni, "Ti dugi O Diedo, ti Tienu po i," Esesiasi den ki pua ki mumudi o ya padbinbinda ka a juana po, ki yedi Juda yeni Jerusalema yaaba, "I baa gbaandi li naa padbinbindli nintuali i, ki pugi ii"? ⁸ Mɔla wani ii, n ba mia bonyenli i n diedo Asiiri bado po, ŋan kuani li ŋantaado opo. N ba teni a taami tuda lie, li ya tie ke a ba la ya tanjagiba n ba jagi li taami. ⁹ A ba tieni ledi i, ki fidi ki paadi n canbaa tɔtieba yudanba bá yendo, ki n ki tie jakɔndibiomo mɔno oo? A taa a dudugdi kuli ki bili Ejipti nni, kelima ti tɔturdi yeni bi tanjagiba po i! ¹⁰ Yaali n go pugdi, a maali ke n cua hali nekanba ki ba tuogi a, ki bolini a, ke laa tie O Diedo po ka aa? O Diedo n yedid nni, "Fii ki tuogi ya diema ne, ki bolini ma"" ¹¹ Lanwani ii Hilikia bijua, Eliyakimi, Cebina yeni Yowa den yedi a jakɔnda yudaano, "Ti mia ŋa ke ŋan ya maadi yeni tinba a naacenba Arama maama nni, kelima , ti gbia mani. ŋan ji da maadi yeni ti Ebrewu maama nni, yaama n tie Juda diema maama, mi ba kua yaaba n jaagi a bilinguona po, ban gbadi ti maadi yaali." ¹² Ama, a jakɔnda yudaano den yedi, "N canbaa sɔni nni ke min maadi li maama i canbaa yeni yinba baba yo oo? Li maama ki la yaaba n jaagi a biinguona po wani yo oo, bani yaaba n ba guani ki di bi bindi, ki go ñu bi ñanma yeni yi wani yo oo?" ¹³ Lanwani ii, a jakɔnda yudaano den fii, ki duoni o nialu, ki kpaandi ki maadi Juufinba maama nni, ki yedi, "Cengi mani o badciamo, Asiiri bado maama. 4 O bado yedi, 'Da cedi mani Esesiasi ń bɔndi yi, kelima, waa pia ya fidu n a faabi yi. 5 Da cedi mani Esesiasi ń tulni yi, yin dugi O Diedo po, o tua, "Laa pia tama, O Diedo ba faabi ti; ya dogu ne kan kua Asiiri bado nui nni." ¹⁶ Yin da cengi Esesiasi, kelima, Asiiri bado ń yedi ya maama n ne, 'Tuo ki loli mi yanduanma ŋantaado yeni nni, ki ŋɔdi nni. Lani n tie i siiga, yuakuli ń fidi ki di o damɔngu yeni o kankana ñuadi, ki go ya ñu o ñinbunbunli nni ñima. ¹⁷ I baa ye yeni i, hali yeni ya yognu ke n ba guani ki taa yi, ki gedi yeni yi ya diema n naani yeni i ya diema, ti jiedi yeni mi daapaanma ń ye naani, mi jiema yeni ku daamɔngu tiidi kuani ń gbie naani.' ¹⁸ Da cedi mani Esesiasi ń bɔndi ki tulni yi, ki ya tua, 'O Diedo ba faabi ti.' U laa nibuolu ya buli n fidi ki faabi u niba, Asiiri bado nui nni ii? ¹⁹ Amati yeni Aripadi buli ye le i? Sefarifayimi buli ye le i? Li buli fidi ki fie Samaari yaaba n nui nni ii? ²⁰ Ya buli n ye i diema nni ne, i la ya bulo n fidi ki fie o diema n nui nni ii, bii i maali ke O Diedo ba fidi ki fie yi n nui nni yo oo?" ²¹ Ama, li nitaanli den ŋmini, kaa jiini maamaba kuli, kelima, o bado Esesiasi den bili ba li ñɔbonli, ki yedi ba, "Da liegi o mani." ²² Lanwani ii, Eliyakimi yua nden tie badidiegu cenli yudaano yeni, Cebina, o tidianlo, yeni Asafi bijua, Yowa, o tikubilo den biidi bi pala, ki papadi bi tiayiekaadi, ki guani o bado Esesiasi kani, ki togdi o a jakɔnda yudaano maama.