¹ Mi fanpienma yeni li tinwagli pali ń mangi, ku tintialgu mo ya pali ń mangi, kun puuni nani ku tiipuuŋangu yu n pia ku puugu boncianla yeni. ² Ku puugu ba tieni boncianla, ki mangi a pala, ki yiini i jakɔndyani yeni i pamandanyani; Bi ba puni li kaanu Carimeli yeni Caarɔn ŋamu; Bi ba la O Diedo kpiagdi yeni ti Tienu ŋamu yeni o seli. ³ Pugni mani ya nii n tadi u paalu, ki paagi a dunkpiema danba. ⁴ Yedi mani yaaba n ye yeni ti jawaanciandi, "paagi mani i pala, da jie mani liba kuli! Diidi, i Tienu ba tuu ipo li panli, Yuakuli ba baa U Tienu ń bobni opo ya pani. O ba yuadi ki cua ki faabi yi." ⁵ Lanwani ii, a juama nuni ba luodi, ban ya nua, awoma tuba baa gbia. ⁶ O diamo ba yugi ki cii nani o kablo yeni, ki muuga lanbu ń tabdi, wan yiini i yani, kelima mi ñima ba pudi li tinwagli po, i kpeni ń puubi mi fanpienma nni. ⁷ Mi tantonma ba kpandi ki tua ñinbinli, a ñinbuna ń pudi u ñinkpankpagu ń ye naani; i fuasangbanli ń den dua naani, ba kpandi ki tua sabgu yeni ku baamuagu. ⁸ Li sanjacianli ba tieni likani, ke bi yi li, "U sangagdiŋamu" Ya niba n jɔgni kan tɔgni li sanu po. U baa tie bani baba yapo i. Yanluodaano kan cuoni ki bodi upo. ⁹ Yangbanlo kan ya ye likani, muayanbiadgaba kuli kan ya ye likani, bi kan tuogi ba lanya sanu po, O Diedo niba baba n baa cuoni li sanu po. ¹⁰ O Diedo ń daa ki faabi yaaba ba guani ki kpeni, bi ba pundi Siyɔn yeni i jakɔndyani, ya pamanli n ki pia gbenma hali bada baa jaagi bi yuli po; li pamanli yeni i laalaayieni ba tuogi ba; li pabiidli, li bubuuli yeni i figindi ba fagdi yeni ba, ki bodi cain.