¹ Yinba i nibuoli, nagni mani, ki cengi; yinba, bi niba, diadi mani i tuba ki cengi mani! Ki tinga yeni kan pia yaali kuli, yin cengi mani, ŋanduna munli kuli, yeni yaali n ye lipo kuli ń cengi. ² Kelima, O Diedo pali beni i nibuoli kuli po; o ba jiini o pabiencianli bi tɔgola kuli po; o ba kpa bikuli, ki cedi mi yebiadma ń bolini ba cain. ³ Bi ba lu yaaba n kpe gbannandi. Bi tinkpiba baa bili i kaani kuli, ki nuugdi; bi sɔma ba wuli, ki puubi ki muani a juana. ⁴ Tanpoli ŋmaabila yeni li tɔgola kuli ba yayadi, ti talwadi ba gbabi ki taani, nani tigbabkaali yeni; bi tɔgola ń baa ki yayadi, nani ku daamɔngu tiidi, bii bu kankanbu faadi ń yi kuodi ki baa maama yeni. ⁵ O Diedo luani, ki mangi o jugsiega tanpoli po; Diidi, ki ba jiidi ki baa Edomi yaaba po i, min paadi ki ñani yaaba mi bolinma po yeni. ⁶ O Diedo jugsiega ñuni mi sɔma ki guo, ki go gbie yeni mi kpama, yeni a pabila yeni a ŋuabuana sɔma, ki go gbie yeni a patona cayaanbina kpama. Kelima, li padli ye Bosira po, O Diedo po; li tuonbiadli ba sɔni Edomi diema nni. ⁷ Bi ba kodi ba Edomi yaaba, ki taani yeni a muanaatona, a naatonbila yeni a naatonkpela kuli. Bi diema tinga ba ñu mi sɔma ki guo, bi tama mo ba mandi, ki ya miani yeni mi kpama boncianla. ⁸ Kelima, O Diedo ń ba tuu l panli ya daali n yeni; lanya binli ba tua falaciamo, kelima O Diedo ba fu, ki mua mi jama, ki ga Siyɔn. ⁹ Edomi kpeni ñima ba kpandi ki tua sinbɔnma, bi tama mo ń tua cidbili, mi diema kuli ba kpandi ki tua ya sinbɔnma n co u mu, ki tuadi yeni. ¹⁰ Mi baa co u mu ñiagu yeni yienu kuli; ku muñiigu ń fii ki loli, kaa pia gbenma; li tinga baa ye yeni li pabɔnli, nifiima ń tuu nifiima; nilo kan pɔndi lankani ya yognu ń tuu ya yognu kuli. ¹¹ Ama, ku muagu nni bonyugda yeni ti muayandi n baa ye lankani; a guda yeni ti fiindi n ba tedi bi terdi lankani. O ba taa li bonbiginkaali, ki bigni mi diema ń ba mudi ki dagdi naani, ki bigni yeni ku ñindaagu, ki bandi mi diema ń ba biidi ki dagdi naani. ¹² Mi diema kan biidi ki sieni liba kuli mi bulcinba po, mi badijaba kuli mo ba tua fanma, niyuoyuodi. ¹³ I konkoni n ba pa, ki loli bi diegbenga yeni bi diepaala nni. I fuasangbanli yeni ti tɔgtɔgnuandi n baa ye li diedi nni. ¹⁴ Ti fuayanbiardi yeni i naamuuni n baa kadi yaaba lankani, a juaŋuaba n baa buudi ki togdi biyaba likani. Ku ñiagu yandi yeni li jiindi ba cua lankani i, ki baa mi fuodma kaanu. ¹⁵ I wee ba tedi bi tedmu likani, ki ŋa bi jena, ki wugni, ki pɔdi, ki taa bi bila ki kuli bi kani, ki ya guu ŋa. Lankani goga i, ke ti kaaciidi ba taani, ki tua kaciigoli. ¹⁶ Cogi mani O Diedo tigbabkaali, ki diidi, bonliba pɔdi ii? Oba kuli kan yagi o yama, o lielo po; kelima, O Diedo ñɔbu n yedi yeni, o fuoma mo n taani ba. ¹⁷ O tɔni tiatia, ki bili yuakuli o biinu, ki taa o ya nuu, ki bigni yeni u baabu ki bɔgdi ba. Bani n die li tinga ya yognu ń tuu ya yognu kuli; nifiima ń tuu nifiima bi baa li li diema nni i.