¹ Sola, mi yebiadma baa ye yeni fini yua n bolindi, ke baa bolini a! Fala baa ye yeni fini yua n janbidi, ke baa janbi a! A ya sedi mi bolinma ya yognu, bi ba bolini amo. A janbi ya gbeni ya yognu, bi ba janbi amo. ² O Diedi, gbadi ti niñima, ti dugi apo; ŋan ya tie ti gbanmanu yeni ti fidu, siŋaagu kuli, ki tie ti candaano mi yebiadma yognu. ³ I taatantandi cedi ke bi niba tiini; a ya fii ki sedi, bi niba ń yayadi. ⁴ Bi wodi titiafagkaadi nani ti naasuudi ń yi ŋani ki biidi u kuanu maama yeni, bi taani ki gobi, nani ti ñankpandi ń yi taani ki gobi maama yeni. ⁵ O Diedo n diedi bonli kuli, o ye hali tanpojoma. O ba gbieni Siyɔn juali yeni ti mɔnkundi yeni mi teginma. ⁶ Mi yanduanma baa ye a miali yema dana nni, mi yama yeni mi banma n tie ya ŋalmano n pia mi faabma, mi yanfuoma yeni O Diedo fangli n tie ŋalmani yaali n mɔni boncianla. ⁷ Diidi, bi tonda, a jakɔnda n buudi i sani nni, ninsiipiendi yeni; mi yanduanma tonda mo n buudi, ki yigni bagbagi yeni. ⁸ Nilo ji ki ye sanjala po, sancenlo ji ki pɔndi mu sanbimu po. Bi miidi o ŋantaado, ki buoni yaali n bi tie kasiedi kuli, cɔlinliba kuli ji ki ye nisaalo po. ⁹ Mi dema ye yeni li pabiidli, ki kuodi; Liban dini i fee, ki kuodi ki luodi; Caaroni ji tie nani mi fanpienma nni tielu yeni i; ke Bacami yeni Karimeli kuli tiidi faadi kuodi ki suodi. ¹⁰ "Mɔla wani ii, n ji ba fii," O Diedo n yedi yeni; "Mɔla wani ii, n ba fii ki sedi; mɔla wani ii, bi ba kpiagi nni. ¹¹ Yin bobni ya muadi yanjaga yeni, ba juodi ki tua muadi i; i miani nni fawaama n ba juu ki buodi yi. ¹² Bi ba juu bi niba, ban di ki buodi, nani ban yi cua i konkoni, ki juu ki buoni maama yeni. ¹³ Yinba yaaba n ye hali fagma, cengi mani min tieni yaali; yinba yaaba n ye kɔma nni, yin diidi n paalu yeni n fidu." ¹⁴ Ti jawaanciandi cuo ya tuonbiadi danba n ye Siyɔn nni; yaaba n fanbi U Tienu digbi yeni ti jawaadi. Ti siiga nni, ŋma n ba fidi ki sedi ya mubuogu n bolindi kani ii?, ti siiga nni, ŋma n ba fidi ki sedi ya mu n co kaa gbindi kani ii? ¹⁵ Kase yua n cuoni mi teginma nni, ki maadi i mɔni; yua n fali, ki yiedi ban fie yaali yeni u paalu, yua n ki bua jodi jiedi, ki biindi o tuba kaa bua wan gbadi nikpaba maama, ki piigi o nuni, kaa bua wan diidi yaali n bia; ¹⁶ Landaano ba maa, ki kua naani n kpedi; ya tanciangu n juagi n baa tie o wuonkaanu; o kan luo jiema, ñima mo kan pɔdi o. ¹⁷ A nuni ba la o badi, o ŋamu nni; a nnuni ba la mi diema ń tandi ki dagdi hali naani. ¹⁸ A ba guani ki tiadi yaali n den jiendi a yeni po, ki yedi, "Yua n den tie gɔndka yeni ye le i? Yua n den diidi ŋalmani yeni ye le i? Yua n den gɔndi ti diefagirdi yeni i kaanpaali yeni kua le i? ¹⁹ A kan ji la ti japaadi nibuolu yeni, ya nibuolu ya maama n paa yeni, yaaba ya maama n ki pia gbadma yeni. ²⁰ Diidi, Siyɔn po, ti tiendi ti tantaana yeni ti badu naankani, a nuni ba la Jerusalema, mi yanduanma kaanu, ban ji kan caadi ya jongu, ban ji kan dadi ki febi ya daacaada, ban ji kan lodi, bii jia ki cedi ya baabi. ²¹ Ama, lankani i, ke O Diedo baa ye yeni ti, ki ŋani tipo hali bonŋanla, o baa tie tipo kpenciami yeni ñinlaadi. Ban kudi ya ñinbiadi kan tɔgni likani, ñinbiaciandi mo kan pɔndi likani. ²² Kelima, O Diedo n tie ti buudi yudaano, O Diedo n tie ti gobdika, yua n bilgi yiko, O Diedi n tie ti bado; wani n ba faabi ti. ²³ A ñinbiagu baabi yɔlgi, i ji kan kubi ku daacaadigu bonŋanla, i kan fidi ki dadi ki tandi a caba bonŋanla; ti ba bɔgdi ti tiafagikaadi nekanba i, ba a diama mɔko ba baa bi biinu. ²⁴ O Dogu nni yaaba siiga, oba kuli ji kan yedi, "Mii paa, mii pia laafia" Ya nibuolu n kua Jerusalema nni ba bi tagli po sugli.