¹ Diidi, o bado ba kali, ki gobdi mi diema yen mi teginma, bi badjaba mo baa gobdi yeni ti mɔnkundi. ² Yua kuli ba tua nani u denkaanu, u faalu po, nani u wuonkaanu, ku taafaagu po, nani mi ñinpuubkaama, ki tinkuonga nni yeni, bii, nani ku tanciangu sɔngu, li tinwagli nni yeni. ³ Lanwani ii, yaaba n nua nuni kan ya tie daaa, yeni nunbɔnga, yaaba n cengi yeni bi tuba mo, baa gbia bonŋanla. ⁴ Bi yantondanba ba maali bonŋanla yeni li yantiali, mu bidmu mo ba maadi bi yama nni, bonŋanla. ⁵ Bi ji kan yini yanluodaano bulcino, bii, ki yini niyuoyuogu, niŋamo. ⁶ Kelima o yanluodaano maadi o yanluomaama i, ki bobindi o pali nni mi biadma, o tuada ki cɔlni U Tienu sanu, ke o maadi ti maabiidi O Diedo po. o mundi o konkonbo mi jiema, ki fiedi u ñuñuunu ń pia yua, wan kubi ya ñima ki ba ñu. ⁷ Ku niyuoyuogu wani ya tuada bia boncianla. O tuuni yeni ya jatiadi n bia, ki ba bɔndi ki biani a luoda, bayeni o luodo ya pia i mɔni. ⁸ Ama, o bulcino yanjaga tie bulcinyajaga i, o go see, ki kubi ke li paa, o bulcinyanjaga nni. ⁹ Yinba ya puoba n maali ke bi ye mi yanduanma nni yeni, fii mani, ki cengi n maama; Yinba Jerusalema badsiaba yaaba n dugi i yula po yeni, cengi mani n maama. ¹⁰ Kelima, Ne yeni binli yeni a dana waamu, i jigi kuli ba cie, yinba ya puoba n dugi bi yula po yeni, kelima ku daamɔngu tiidi luana ba gbeni, jetaagu mo kantieni. ¹¹ Ya digbi mani, yinba ya puoba n maali ke i ye i yama nni; ti yanyangdi ń kua yi, yinba yaaba n dugi i yula po yeni. Yiedi mani i tialakaadi, ki ya ye mubili, ki yie ti yubɔntiadi, i ciaga nni. ¹² Pua mani i bena, kelima i kuaŋami po yeni i daamɔngu tiidi yii n luoni bonŋanla yeni po. ¹³ I konkoni yeni a kongɔba fii ki loli n buolu tinga, tin diedi ya nibuoli dogi kuli taani ki ye yeni li pamanli. ¹⁴ Kelima, ku badidiegu ba yaani, nilo kan ya ye, bi sani ki ŋa ya dogu n den gbie yeni niba boncianla yeni; ki juabiga yeni li tɔdiefagdili ba kpandi ki tua i fuaŋunbi pamanli yeni i wuonkaanu, ti yandi kuli yankpaakaanu, tin baa ŋmani naani ti yama nni; Mi yema lebdi ki ŋanbi ¹⁵ Hali yeni ya yognu ke O Diedo ba jiini mi fuoŋanma ki mii tipo, mi fanpienma ba kpandi ki tua tiikuanu, u tiikuanu mo ń tua fuasieli. ¹⁶ Lanwani ii, ti mɔnkundi ba kali mi fanpienma nni, mi teginma mo ń kali u tiikuanu nni. ¹⁷ Mi teginma tuona ba kaani mi yanduanma; mi teginma ñuadi n baa tie li yanŋaali, mi yemanma yeni laafia ya yognu ń tuu ya yognu kuli. ¹⁸ N niba baa ye yeni mi yanduanma, ya diedi nni ke li yanŋaali yeni li pamanli yema ba kali ki waagi. ¹⁹ Ama, a taatana ba pua ki guli li fuali nni tiidi kuli, u dogu mo ba bodi cain, ²⁰ yinba yaaba n buli i kpeni balinma, i baa ye yeni mi yemanma, ki go dagdi ki ŋa o nua yeni o ŋunbo, ban ya waa ki ŋmani bi yama nni.