¹ Fala baa ye yaaba n tiini ki jii Ejipti, ki lingi mi todma, ki dugi i taami yeni ti tɔturdi po, kelima tin yabi maama, yeni bi tandanba po, kelima baa pia cɔli, ke bi fidu mo yabi maama po. Ama, bi naa faami Israyeli Tienu yua n gagdi ki ŋani yeni po, bi naa go lingi O Diedo mo! ² Ama, o pia mi yanfuoma, ki bani wan tiendi yaali, o ba fidi ki jiini mi yebiadma, ki kan lebdi o ñɔbonli. O ba fii ki sedi bi nibiadba diegu po yeni yaaba n tiendi yaali n ki tiegi, yeni ti tuonbiadi todkaaba po. ³ Ejipti yaaba tie nisaalba i, bi naa tie tienu, bi taami mo li tie gbannandi taami i, fuoma ya taami ka. O Diedo ya duoni o nuu, ki pua, yua n todi ba tuudi, ban todi yua mo ba ŋmadi ki baa; bikuli ba taani ki bodi i. ⁴ O Diedo yedi nni ya maama ne, "Nani o yangbanlo, bii, li yangbanpanli ń yi duni wan cuo yaali po maama yeni, ki naa yagni o yama ya yankpaala n taani ki cua ki bua deli o yeni, bá ke bi kuudi mɔno ki jiendi o yeni; O Diedo, U Paaciamu Kuli Daano mɔko ba jiidi yeni i, Siyɔn juali yeni o juabiga po, ki pua bu tɔbu. ⁵ Nani a bonyugda ń laandi bi bila po maama yeni, O Diedo mo baa guu Jerusalema yeni i; o ba tandi nui, ki pini ba, ki faabi ba, ki ya kubi ba. ⁶ Yinba Israyeli yaaba, lebdi mani ki guani yin den buli yua ki nunga yeni kani. ⁷ Kelima, li daali i, ke yuakuli ba lu o buli, yin tagi yii yeni i nui yeni, ŋanjilfa yeni wula yi kuli. ⁸ Ya jugsiega n ki tie nisaalo jugsiega n ba kpa Asiiri yaaba; ya jugsiega n ki tie nisaalo jugsiega n ba bolin ba. O ba sani ki jugsiega, o jawaaba mo ba sɔni a tuonpaala. ⁹ Ti jawaanciandi ba cedi ban dugi yua ya po yeni ń jie, ki sani, bi tɔtieba mo ya la O Diedo tɔbu tuudcabli, bi ba jie ki sani. O Diedo, yua ya mu n ye Siyɔn, ke o fanu mo ye Jerusalema yeni ya ñɔbonli n yeni." ^{8 9} hg