¹ Sola, Ariyeli, fala ba jiidi a po, Dafiidi ń den pua ki paadi, ki diedi ya dogu! Fini Ariyeli, bá yeni ŋan tiendi mi jaanma binli ń tuu binli kuli. ² Ama, N ba waani Ariyeli fala, ki cedi li bubuuli yeni i fanfabni baba n sieni; u dogu ba kpandi ki tua Ariyeli binbindli. ³ N ba fii ki sedi apo, ki kagni, ki lindi a, ki sieni bi tɔtieba ban lindi ki cebni a, ki caani bi tɔtieba wuonkaani, ban ludi a ki baa ŋa. ⁴ N ba pua ki jiini a, a baa dua tinga nni i ki maadi; a maama kuli baa ña ti tandi nni. A nialu baa tie nani fanfandigu ya nialu yu n ña tiipo yeni i, a baa ye mi tama nni i, ke a nialu dingi, ke a sɔbni ki maadi. ⁵ Ya nilgu n taani ki tie a yibalinba baa tie nani u tangulingu yeni i, li nilgu yaaba n fiini mi jama apo yeni baa tie nani ku faagu ń piebi ki fiini ya muayoma, ke mi yaadi ki bodi yenma yeni i. ⁶ O Diedo, Ki Pia Gbenma Tienu ba cua a kani yeni i taatantandi, mi tindigma, ku fuuciangu, ku faaciangu, yeni ya taafaaciangu n pia mi jama, yeni ya mupienu n di ki buodi. ⁷ Li baa tie apo nani dangdi yeni i, nani ñiagu bondɔgdikaali yeni i: Ya nilgu n ñani i nibuoli kuli diema nni ba taani ki kɔni yeni Ariyeli, ki baa o kaanpali kuli. Bi ba fiini mi jama ki tuogi o wani yeni o bilinguona kuli, ki baa o. ⁸ Li baa tie nani ya konkonbo n dangi ke o di mi jiema yeni i, o ba findiki sua ke o ye tugukuongu. Li baa tie nani u ñuñuunu ń pia yua, ke o dangi ke o ñu mi ñinŋanma yei i, o ba findi ki sua ke u ñuñuunu n bua kpa o, ke o ye yeni nialikuongu i. Li baa tie yeni i, ya nilanbuoli n taani, ki yabi boncianla, ki bua kɔni yeni Siyɔn juali yeni mo yapo. ⁹ Sedi mani suo, ti jawaandi ń kua yi, yin luodi ŋubi mani ki tua juanba! Ya tie mani nani daama n kubi yi yeni, ama ki naa ñuni daama ka; ya jadbi mani ki naa ñuni daapaama ka ki guo. ¹⁰ Kelima O Diedo wuli ipo mi guama yantiali, ke i tigindi. O pii bi sawalpuaba nuni po, ki libni ki pibni a baayuadiida mo ya yula. ¹¹ Lanya bonli kuli dɔgdima baa tie nani ba taa ya tigbabkaali, ki luoni, ki teni yua n bani u cogu, ki yedi o, "Cogi ya tili ne." Omo ń guani ki jiini, "N kan fidi, kelima, li gbabi ki luo i." ¹² Bii, ban taa li tili ki teni yua n ki bani cogu, ki yedi o, "Cogi li tili ne," omo ń guani ki jiini, "Mii bani cogu." ¹³ O Diedo yedi, "Ya nibuolu ne nagdi n nintuali yeni bi ñɔna baba i, ama bi pali fagi yeni nni; bi dondi nni yeni bi ñɔgbana kelima, li tie bipo maasuagu i. ¹⁴ Lani n cedi, ke N bobni ki baa tiendi ya nibuolu ne siiga, yaalidgu bona yognu kuli. Bi yanfodanba yanfuoma ba sani, ki bodi, bi ninfandanba mo ya ninfanbu ba sani, ki fagdi, ki ban wuoni. ¹⁵ Fala baa ye yaaba n dɔgindi O Diedo bi yanjaga, yeni yaaba n tiendi bi tuona li biigli nni. Bi maadi, ki tua, "ŋma nan nua ti, ŋma nan bani ti ii?" ¹⁶ Ne yaa tie yanluoma yaaka! Bi ba fidi ki taa o tiamaalo wan tua yɔgu uu, bii, ban tagi ya bonli, ba yedi yua n tagi li, "A naa tagi nni," bii, li bobli ń yedi o bobmaalo, "A naa pia yama aa"? ¹⁷ Ne yeni lan ba yani waamu, Liban ba tua tiikuanu, u tiikuani mo ń tua fuali. ¹⁸ Lanya daali, bi ba cogi li tili, o womo ń gbadi, o juamo mo ya nini baa nua li biigli nni. ¹⁹ Ban den wangi yaaba fala baa pugi O Diedo yeni li pamanli, a luoda baa gbaandi bi niba siiga, ki pugi Israyeli Tienu yua n gagdi ki ŋani yeni po. ²⁰ Kelima o tugmɔndaano yema ba juodi, yaaba n laa, ki ñuadi kuli ba bodi. Yaaba n wuondi, ki tiendi ti tuonbiadi ba bodi cain, ²¹ Yaaba n den caa ki kaa u tingbangbaabu, ti buudi yudanba kani, bi lieba po, ki maadi ki lolgi yua n ki pia tagli ku maadiagu, ti buudi yognu, ki jiagi ti buudi yeni mi tofaama, ki co o niteginka. ²² Lanya po i, ke O Diedo yedi ya maama ne, ke mi nua Jakɔbo buolu; O Diedo, yua n den daa ki faabi Abrahama, "Mɔla wani ii, Jakɔbo buolu ji kan fiagi, bi nunmu ji kan bɔndi. ²³ Kelima, o ya la min tieni yaali o puolŋuani siiga, bi ya la n nui tuona, bi ba bandi min tie yua. bi ba jaandi ki kpiagi n yeli, ki bandi ke N tie Jakɔbo Tienu yua n gagdi ki ŋani, ki ya fangi Mini, Israyeli Tienu. ²⁴ Bi yanluodanba ba baa mi yama, yaaba n den fiindi mi yenyiema mo ń baa i tundi yeni mi yanfuoma."