¹ Sola, fala baa ye Efrayima daañukpiena, yaaba n yili ki badifegliga ki pia ti japaacandi yeni po, Samaari ń bobi ya tiadi n tie nani ya tiipuugu n kuodi ki waadi yeni, ki yiini ya jualɔngu n pia ti bugdi boncianla yeni po, ki tie nani mi daama ń guli yaaba ya yula po yeni i. ² Fangi mani i yula, O Diedo sɔni ya ja n pia mi tuama yeni u fidu, nani ya taafaalu n figi yeni a taatana ki pua ki mudi bonli kuli yeni, nani ya taafaaciangu n yi cedi mi ñima ń gbie, ki daa, ki puubi yeni a ñingola yeni; ku ba yidi badifegliga kuli, ki lu tinga nni. ³ Diidi, bi ba yidi Efrayima daañukpiena, japaadanba badifegliga ki lu tinga nni, ki ŋmaa. ⁴ Samaari ń bobi ya tiipuugu tiaŋandi, ki yiini ya jualɔngu n pia ti bugdi boncianla po yeni, baa tie nani ya kankanli n tuodi ki beni, ki sua ke a kankana sobdu yognu dá ki pundi yeni, yua n kpia ki la li kankanli ba cie li tontoni, ki ŋmani. ⁵ Li daali, O Diedo, Ki Pia Gbenma Tienu n baa tie badifegliŋanga, n pia ya balmaalma n ŋani, ki tie ŋamu, o buolu yaaba n sieni po, ⁶ O baa tie ti mɔnkundi yantiali, yua n kali ti buudi yudandi po, ki go tie fidu yaaba n deli yibalinba hali bi bulñɔna kani po. ⁷ Bani bi salga yidikaaba yeni bi sawalpuaba mɔko, ñuni mi daama, ki kpaa bi yula, mi daapaama biidi bi yula. Bi ñuni mi daapaama ki jadibi, bi yi ñu mi daapaama ki guo yo, ki ya jiagi ti buudi. ⁸ Bi jiedikaanu gbie yeni siindi baba i, bá kaanyendu ki ye ki ŋani. ⁹ Bi ñuadi, ki tua, "O bua waani ŋma i, mi yanfuoma, o ba pua ŋma yapo i, sawali, ki sɔgni o niima nni? Ban dá babdi yaaba li biili bii, ban dá li tugdi ya bila li biili yeni i? ¹⁰ Kelima, yikodi ń tuu yikodi, ñɔbonli ń tuu ñɔbonli nekanba, ñɔbonli ń tuu ñɔbonli neponba. ¹¹ Mɔmɔni i, O Diedo ya ba maadi yeni ya nibuolu ne, li baa tie maalanma nni i, yeni yua n maadi ki bidi. ¹² Hali yognuba, o den yedi ba, "Ne tie mi fuodma kaanu i, cedi mani yua n cɔgi ń kali ki fuodi, Mi fuodma yeni i baagi kaanu n yeni," ama, bi naa den cengi o maama. ¹³ Lanya po i ke O Diedo maama baa tie bipo yikodi maama ń tuu yikodi maama, ñɔbonli ń tuu ñɔbonli, waamu nekanba, waamu neponba; lani n tie, bi ya cuoni, ban tuudi ki baa, ki kɔnli kɔnli, ku diagu mo ń kpadi ki cuo ba. ¹⁴ To, cengi mani O Diedo maama, yinba yaaba n ye yeni li ñuali, ki gobdi ya niba n ye Jerusalema nni. ¹⁵ I maadi, ki tua, "Ti loli ŋantaadi yeni mi kuuma, ti maadi ki kadi yeni bi tinkpiba diema. Lanwani ii, ya yebiadma n kpendi ya pundi, mi kan jiidi tipo. kelima, mi tofaama n tie ti wuonkaanu, mi tonanma mo n tie tin ba sani ki deni naankani." ¹⁶ Lani n cedi ke N Diedo, O Diedo yedi, "Diidi, N bili li tanpuutanli Siyɔn nni, ya tanli n buugi ki paa boncianla, ya tanpuutanli n mɔni boncianla, ya taapuuli n ki pia begma. Yua n dugi li niinni, o kan di fee. ¹⁷ N ba cedi ti mɔnkundi ń ya tie o bonbiginkaali, mi teginma mo ń ya tie o diemaalo ñindaagu. A taatana ba figi ki guli bi tofaadanba wuonkaanu, mi ñinpuubkaama mo ń puubi ki yili bi tonandanba diedi. ¹⁸ Yin loli ya ŋantaado yeni mi kuuma ba tua fanma, i maadikadli yeni bi tinkpiba diema mo kan juodi. Mi yebiadma ya cua, mi ba puubi ki kɔdi ikuli. ¹⁹ Mi yebiadma ya cua ya yognu kuli, mi ba puubi ki wodi ikuli, mi ya cua siŋaagu kuli, i kan ciadi; yenjuogu yo oo, ñiagu yo oo, mi ba naa yi. Man tiendi ya fuugu baba mɔno baa pia ipo ti jawaanciandi. ²⁰ Kelima u duanu baa kɔbi ki kandi yeni mi duanitandma, bu kpapinkaabu mo baa waa yeni mi pinma." ²¹ O Diedo ba fii nani Parasimi juali po yeni i; o baa cuoni nani Gabahɔn jualɔngu nni yeni i, ki tuuni o tuonli, o tuonli yaali n pia ku yaalidgu, yeni o tuada yaa n pia mi yenmaalma. ²² Lanwani ii, mɔlane, yin da jeli yeni ñuali, yin la ya piana ń da ti saa, ki mubni i tulu. N gbadi N Diedo O Diedo, Ki Pia Gbenma Tienu kani, ki tinga kuli bolinma baani ki gbeni o. ²³ Yin faami, ki cengi n maama; diadi mani i tuba, ki cengi n maama. ²⁴ O kpaakuolo ya bua buli o bonbulkaali, yognu kuli i, ke o ko, ki balgi, ki mɔndi a bana, ki dɔdi o kuanu nni ii? ²⁵ O ya bobni mi kpaafanma ki gbeni, o dá ki yi yadi i kpinbii ka aa, ki buli, ki fuonfuoni ya bima n gbengi, ki yuandi ki juuni ya tiibuolu n paa i kuni po oo? ²⁶ O Tienu n wangi o wan baa tuuni maama, ki bili o a ñɔbona yeni a sanbila yeni mi yanfuoma. ²⁷ I nan bani ke bi kan taa dipualanbana ka, ki pua ki ñani i ñinkpinbii, I nan go bani ke takapiila kan cuoni tiina po, ki ciadi ŋa nani lan cuoni ki pua i dii maama yeni. ²⁸ Takapiila yi cuoni ti diipiandi po, ki pua ki ñani mi dibima, ama, takapiila kan cuoni dibima po, ki nandi ma man tua yoma bu saabu po. ²⁹ Ne kuli nani O Diedo, Ki Pia Gbenma Tienu kani i, wani yua n ki pia lie, mi tundma kani, ki go pia mi yanfuoma boncianla.