¹ Lanya daali, O diedo ba taa o jugsiecianga, yaaga luani ki mani polpoli yeni, ki muu, ki duoli mi ñincianma nni waa, yua n tiini mi ñima nni boncianla yeni, ya waa n pia u tɔgbadu yeni, o ba kpa mi ñincianma nni bonfuodibiado. ² Li daali i, ke i ba yiini O Diedo daamɔnmanma tiidi kuanu yani. ³ "Mini O Diedo n tie li kuanu guudo, N jɔgni u mi ñima yognu kuli. N guu u ñiagu yeni yienu kuli, kelima mii bua ban biidi u. ⁴ N pali kan be n daamɔngu tiidi kuanu po, kelima, n ya la konkoni yeni kongɔba, n ba pedi likuli, ki juu lan buodi cain; ⁵ Li nan yaa tie ke bi lingi ke min tua bi wuonkaanu yaaka, yeni, bi ba tɔgni mi yanduanma sanu, tin mangi yeni yaba. ⁶ Ya dana n kpendi, Jakɔbo buolu ba pudi a jiina; Israyeli ń bundi ki tieni ku puugu, ban taani ki gbieni ŋanduna kuli yeni a luanŋana." ⁷ I diidi ki sua ke O Diedo pua Jakɔbo yeni Israyeli buolu nani wan den pua yaaba n den pua ba maama yeni yo oo? I la ke o kpaa Israyeli yeni Jakɔbo buolu nani wan den kpaa yaaba n den kpa ba maama yeni yo oo? ⁸ O ki tieni yeni ka, ama, o piebi o faama, ki deli Jakɔbo yeni Israyeli niba, li daali o den sɔni puoli faawaabiadma i, ke mi cua ki deli ki yaani ba. ⁹ Yeni n tie, ban fidi ki ki ŋuudi ki duuni ki ñani Jakɔbo buolu tagli, o tuonbiadi sugli mo ń ba cua yeni yaali n ne: o ba cedi a padbinbinda yeni a tana ń mudi yomyomi, nani kaalo yeni, ban den juugi a ŋuba yeni tulaale ya buli tuudi daacaada kani mo ji kan sedi. ¹⁰ Kelima, nufanu pua u dociamu yeni u bilinguona, ki mumudi, u kaanu yeni a diena yaani, ke niloba kuli ki ye likani nani mi fanpienma nni yeni. A naabila dua lankani i, ki fuodi, ti yandi ŋmani lankani i, ti muadi yeni ti faatuudi. ¹¹ I beni ya kuodi, i yi kɔnli kɔnli, bi puoba ń cua ki duoduo, ki ban kuuni, ki cuoni bi mu, Li den tie ya niba n ki pia yama i. Lanya po i, ke yua n den tagi ba ki jie bi niñima, yua n den tagi ba ki den juogi ba mɔko. ¹² Lanya daali, O Diedo ba cili Efrati kpenciamu balinma ya diema ki ban tuoni Ejipti ñincina balinma ya diema nni, ki ya migni i tiidi, ki ya cenli yinba Israyeli buolu yaaba, yendo yendo. ¹³ Li daali, bi ba piebi li naatuncianli, ke yaaba n den bodi Asiiri diema nni, yeni yaaba n den yayadi Ejipti diema nni ń guani ki kpeni. Bi baa gbaandi ki pugi O Diedo Siyɔn juali yaali n gagdi ki ŋani, ki ye Jerusalema yeni po i.