¹ Lanya daali, bi ba yiini ya yanbu ne Juda diema nni: Ti pia ya dogu n paa; U Tienu faabi u bilinguona yeni u kpakpaana ke u tua ti wuonkaanu. ² Luodi mani a bulñɔna, ya nibuolu n tie niteginkaaba, kelima, bi tie nidugkaaba i. ³ Yua n kubi o yanjaga bonnŋanla, ki see ke li paa, a puni o mi yanduanma, kelima, o dugi apo. ⁴ Ya dugi mani O Diedo po hali ya yognu n ki pia gbenma; kelima, li O Diedo, wani O Diedo n tie ya tangu n ye ya yognu ń tuu ya yognu kuli. ⁵ Kelima, O guli bi japaadanba yaaba n den kua tanpoli, ki tudi ki luni i dogpaali, likuli ba jiidi tiipo, likuli ba jiidi ki duani tinga nni, ki nandi yeni mi tanbiima. ⁶ O ba cedi bi niñinniba yeni a tadma ń ŋmaa, ki madi o yeni bi taana. ⁷ O niteginka sanu caa sonsonli i, mi teginma sanu; A wangi yua n tiegi ya sanu n ki pia gɔgidima. ⁸ Nn, O Diedo, A bili ti, ki waani ti bujiali sanu i; Tin bua yaali, ke ti pali mani lipo n tie a yeli yeni a todma. ⁹ N lingi ke min la fini i, ku ñiagu kuli, Li tie mɔni i, n lingi fini i, yeni n yantiali yeni n pali kuli. Kelima, a ya jia a buudi ki tinga ne po, ŋanduna kuli niba ba bandi yaali n tie mi teginma. ¹⁰ Bi ya gbadi o nibiado po mi niñima, o kan bandi yaali n tie mi teginma. O baa golindi i mɔni, mi teginma diema nni, ki naagdi o biadma po i, o kan ya faami O Diedo bali po. ¹¹ O Diedo, A duoni a nuu, ki ba pua, ama, bi naa faami upo. Ama, bi ba la a buacianma a niba po i, i fee ń cuo ba, yeni i, ke u mu ba di ki buodi a yibalinba. ¹² O Diedo, fini n tieni ti mi yanduanma, kelima, tin tiendi yaali kuli, fini n bili li ti yantiali nni, ki todi ti ti tuona nni. ¹³ O Diedo, ti Tienu, canbaatianba diedi ti, ama, ti gbaandi ki pugi, ki jaandi a ya yeli po baba i. ¹⁴ Nani a tinkpila ń ji kan faadi, bii bi kpienba ń ji kan fii yeni. A cua ki jiaba ti buudi, ki cuo ba, ki bolni ba cain, ke bi sundi bipo. ¹⁵ A pugni ti buolu, O Diedo, a diadi, ki tandi ti buolu; lani n cedi ke ti kpiagdi a yeli; A diadi, ki tandi mi diema tinbiani kuli. ¹⁶ O Diedo, fala yognu, ti tiini ki caa a kani i; A ya jiini mi yebiadma tipo maama kuli, ti ti jaandi ki miadi a ya todma i. ¹⁷ O Diedo, ti nagdi a nintuali nani ya pua n punbi ki bua mali yeni, ki yigni ki mɔa yeni u maditugukɔnu yeni, Tinba li ye a nituali i. ¹⁸ Ti mɔko punbi, ke u maditugukɔnu mabni ti, ama, li tie nani ti mali fanma yeni i. Ti naa tieni liba kuli, ki ba faabi ki tinga po, ti go ki pugni liba kuli ŋanduna nni niba mo yapo. ¹⁹ N niba i tinkpiba ba guani ki faadi, i kpienba ba guani ki fii. Yinba yaaba n dua ti tandi nni yeni, fii mani ki yiini i pamandanyani; kelima ŋan puni ba ya miali tie yenma ya miali i, ki tinga mo ba cedi bi tinkpiba kuli ń faadi. ²⁰ N niba, gedi mani, kua mani i diena nni, ki gbagi ki luoni i bulñɔna; wuoni mani lan tieni waamu, hali yeni o pabiencianli ń ba jiidi, ki sɔngi. ²¹ Kelima, diidi, O Diedo ba ña o balkalkaanu, ki jia ti buudi yeni ki tinga nni niba, kelima bi tagli po; ki tinga ba dɔgdi ban den wuli ya sɔma kipo kuli, ki kan dɔgni ban kpaa yaaba kuli mo.