¹ O Diedo, Fini n tie n Tienu, n dondi a, ki kpiagdi a yeli; kelima, a tieni yaalidgu tuona, ŋan taa ya yanjaga hali yogu, see bonŋanla, ki tiegi, kaa lebdi mo. ² Kelima, a cedi ke u dociamu tua tangbana baba, ke bilinguona dopaalu mo tua diegbendi, ke bi canba kaanpaali bodi cain, ke bi kan ji guani ki maa likani hali bada. ³ Lanya po i, ke ya nibuolu n pia u paalu kpiagdi a yeli, ke bi tugtondanba nibuoli mo fangi a. ⁴ Kelima, fini n den tua o tadmo wuonkaanu, o niñinnilo wuonkaanu, o pabɔnli daali; ki taacianga po, u wuonkaanu, yeni u sɔngu, u yienu ń gbadi yua po. Bi tugtondanba pabiencianli yognu, tie nani ya taacianga n nii, ki cadi li guonli yeni i, ⁵ nani ŋan yi paadi ku wulgu ki tinkuonga nni maama yeni, a paadi bi canba fuugu, nani ku tawalgu sɔngu ń yi paadi ku wulgu maama yeni, a go cuo ki sieni bi tugmɔndanba fuugu yeni bi yanbu yeni i. ⁶ O Diedo, U Paaciamu Kuli Daano ba bobni mi jaanjiema i nibuoli kuli po, li juali yeni po, mi jaanjiema yeni mi nankpama, yeni ya daakpelma n mani boncianla. ⁷ O ba bolini li juali po, ya kpalpinkaabu n liibi i nibuoli kuli po, yeni ya kpaldɔginkaabu n duagi mi diema kuli po. ⁸ O ba buoni mi kuuma hali ya yogu ń tuu ya yogu, N Diedo, O Di edo ba fiadi ti ninsiidi mu nunmu kuli po; O ba cedi i fee ń kagdi o niba, ki tinga nni kuli po, kelima O Diedo n yedi yeni. ⁹ Lanya daali, bi ba yedi, "Diidi, ti Tienu n ne; wani n tie tin dugi yua yapo, wani n faabi ti. Wani n tie O Diedo; ti dugi wani ya po i, tin mangi mani ti pala, ki waani ti pamankandikali o faabma po." ¹⁰ Kelima, O Diedo nuu n maa li juali yeni po; Bi nugi ki bili Mowabi o buoli nni, nani ban yi nugi timuakuondi ku dulbuogu nni yeni. ¹¹ Li buogu nni i, ke o ba tandi o nui, nani o ñinduglo ń yi tandi o nui maama ki dugi mi ñima yeni. Ama, yeni o mɔndli kuli, O Diedo ba pua ki jiini o japaaciandi yeni. ¹² O ba pua ki mudi a bilinguona, ki febi a kpakpaana yaa n kpedi boncianla yeni, ŋan nadi yeni mi tanbiinma.