¹ Diidi, O Diedo bobni ki ba bolini ki tinga, ki biani ki niba, o ba lebdi ki tinga nunga, ki yayadi ki niba. ² Lanyognu, li ba tua yenma i, li nitaanli po yeni salga yidka po; o naaciemo po yeni o canbaa po; o potuado po yeni o cannaa po, o bondaalo po yeni o bonkuado po; Ban dini ledi yua yeni yua n ledi po; ban pia yua ya panli yeni o pandaano po. ³ Bi ba pua ki mudi ki tinga kuli, ki fagi ki ŋalmani kuli; kelima, O Diedo yedi ya maama ne. ⁴ Ki tinga kuodi, ki ye yeni li pabɔnli, ki tinga kuodi boncianla, ki waadi, ki tinga nigbenga dondi, ki kuodi. ⁵ Ki tinga nibima n biidi ki tinga, kelima bi miidi ti yikodi, ki lebdi mi ñɔmaama ñɔbona, ki fidi ya ŋantaado n den loli ya yogu ń tuu ya yogu kuli po. ⁶ Lani n cedi ke ti solindi biani ki tinga, kelima ki niba tagli kuli po. Ki tinga niba dini ki buodi, niba waamu baba n sieni. ⁷ Mi daamanma ye yeni li pabɔnli, ku daamɔngu tiidi kuodi ki waadi, yaaba ya pala n bi mani kuli ji duni i. ⁸ Li pamanli gangaana moe gbeni, ku jelgu lanbu yeni ku pamanli kuli gbeni. ti kogirdi moe manu gbeni. ⁹ Bi naa ji ji ñu daama, ki yiini i yanmani, mi daabiadma mo ji to, yaaba n ñu ma po i. ¹⁰ Niba ń ki ye ya diedi nni libi ki baa, ki mumudi, a diena kuli luo i, noliba kuli ji ki kua li diena nni. ¹¹ Bi buudi, ki fiali, ki lingi mi daama i sani nni; pamanli kuli gbeni, mi diema nni pamankandikaali bodi cain. ¹² I dociami pua nufanu, ke a bulñɔna mumudi ti diegbendi nni. ¹³ Kelima mi diema nni kuli, yeni i nibuoli kuli siiga, li baa tie nani ban cenli Olifie luana ya yognu i, nani ban sobdi ku daamɔngu tiidi luana ki gbeni ya yognu yeni i. ¹⁴ Yaaba n ciadi mi yebiadma nni, duoni bi nialu, ki yigni yeni li pamanli, ki dondi O Diedo kpiagdi, bi yigni ki mangdi bi pali hali mi ñincianma po. ¹⁵ Lanya po i, keli buali ke yinba yaaba n ye puoli po, yin yigni ki kpiagi O Diedo, yinba mi ñincianma nni kpedega yaaba, kpiagi mani O Diedo, Israyeli Tienu yeli. ¹⁶ Hali u tinbianu diema po, ti cengi ke bi yiini i yani, ki tua, "Ti kpiagdi ye yeni yua n tiegi!" Ama, mini wani yeni, "N bia n yeni, n bia n yeni u nufanu pua nni! I janbi danba janbdi, i janbi danba janbdi boncianla." ¹⁷ Ti jawaanciandi, ku buogu yeni i taali diadi jaagi i yula po, yinba ki tinga nni niba. ¹⁸ Yua n sani ki ciadi ti jawaanciandi, ba baa ku buogu nni, yua n fidi ki tabi ki doni, ki pundi ku buogu siiga nni, o ba baa ku diagu nni. Kelima, tanpoli takobona luodi, ke ki tinga tanpuuna mo migni. ¹⁹ Ki tinga ba mudi yomyomi, ki tinga pudi ki yagdi yagdi; ki tinga ba migi boncianla. ²⁰ Ki tinga baa jadbi nani o daañugaado yeni i, ki ba pua i yiani nani diewudungu yeni. Ki niba tuonbiadi kpiagu yabdi ki kandi, ki ba baa, ki ji kan fii mɔko. ²¹ Lanya daali, O Diedo ba waani tanpoli tɔgola fala, ki fiini mi yebiaadma ki tinga nni badcianba po. ²² Bi ba taani ba, nani ban dogni ya kpaadi ku buogu nni yeni i, ki luoni ba li kpaadidieli nni; a dana boncianla ba pendi yo, ban jia bu buudi, ki cuo ba. ²³ I fee ba di o ŋmaalo, u yienu mo ba fiagi, kelima O Diedo, Ki Pia Gbenma Tienu kali o badkalkaanu, Siyɔn juali po, yeni Jerusalema nni, ti kpigdi baa ye o nikpela nintuali.