¹ Ya sawali n ye Tiiri diema po. Buudi mani yinba Tarisisi ñinbiaciandi danba; kelima, diegu ki ye, mi bolinma po; ban ñani Cipri kpendegli po i, ke bi ga li sawali. ² Ya ŋmini mani yinba yaaba n kua mi ñincianma jaali po, kelima i jeje po; yinba Sidoni Kpenkpenda, yaaba n tuuni i tonda mi ñincianma nni, ³ U kpenciamu Nili balinma bonluonkaali kuli den tɔgi mi ñincianma nni i, ki kpendi Sidoni. Sidoni n den di Nili balinma bonluokaali kuli ñuadi Sidoni n den tie i nilanbuoli kuli daaga. ⁴ Ya ye yeni i fee, fini Sidoni yua n tie mi ñincianma kaanpaalu. Mi ñincianma yedi ya maama ne, "Mii baa madtugukɔnu, mii mali mo mii wubi jawaaba, ke bi fandi, mii go wubi jafanba mo." ⁵ Ejipti diema yaaba ya ga li laabaalo, bi gbanu ba ŋɔa nani Tiiri ń den ga li laabaalo, ki ke bi gbanu ŋɔni maama yeni. ⁶ Puodi mani mi ñincianma, ki gedi Tarisisi po yinba yaaba n kua li kpenjaali po. ⁷ Yinba li pamanli dociamu, yu n cili hali ya bina n kpelgi yeni, ya yema ne kpeli ki baa yipo oo? Yinba n den caa hali fagma ki ban pua ki paadi, ki diedi dogtoe yeni n ne ee? ⁸ Tiiri n den bɔgdi mu badfeglimu, u kpenkpenda den tie badibijaba i, ban den cɔlni yaaba boncianla ki tinga nni, ŋma n lanya yanjagli, ki fii ki sedi Tiiri po? ⁹ O Diedo, Ki Pia Gbenma Tienu n baa lanya yanjagli ki bua pua ki jiini yaali n tie jaapaaciandi kuli, ki dini ki tinga nni niba kuli ń den cɔlni yaaba ya kpiagdi kuli i fee. ¹⁰ Tarisisi bisalo, ya ko a tinga, nani u kpenciamu Nili balinma yeni, kelima ti ñinbiadi n ba sedi naani ji ki ye Tiiri dogu nni. ¹¹ O Diedo duoni o nuu, ki maani mi ñincianma po, ki cedi ke i nilanbuli diema kuli digibi; O yedi ke Kanana ń buoni o kaanpaali kuli. ¹² O Diedo yedi, "A kan ya bii ki jeli, ki mangdi a pali, fini Sidoni, ban ñii ya powandiali yeni u paalu yeni, fii, ki puodi mi ñincianma, ki gedi hali Kalide yaaba kpendegli po, Bá lanpo mɔno, a na kan baa fuoma." ¹³ Diidi Kalide yaaba diema. Li buolu ji ki ye; Asiiri yaaba den cuo ba ti yonbidi, ki gedi yeni ba mi fanpienma po, ti fuayandi ń dua naani. Bi den maa a diefagda yeni i kaanpaali, ama Asiiri yaaba tudi ki guli likuli, ki pua ki mumudi, likani ji tua diegbena i. ¹⁴ Ya buudi mani, yinba Tarisisi ñinbiaciandi, kelima, i wuonkaanu bodi cain. ¹⁵ Lanya daali, bi ba sundi Tiiri dogu po hali bina piilele, nani o bado ń ba tieni ya bina yeni. Bina piilele ya pendi, bonli ba tieni Tiiri nni, nani ban yiini ya poconconli yani, ki tua, ¹⁶ Fini ban sundi ya poconconli po yeni, taa ku kogdigu, ki pua, ki yiini i yani boncianla, ki gani ki lindi u dogu, lani n tie ban tiadi apo. ¹⁷ Bina piilele ya tuoni, O Diedo ba gɔndi Tiiri, ki todi u, un guani ki cili mi conconma, ki ya baadi i conconligi, u ba conbi yeni ki tinga nni nibuoli diema kuli. ¹⁸ Ama, u kan di u conconma ñuadi, kelima, un ba conbi ki baa yaali kuli, bi ba paadi ki bili li O Diedo po i. Un ba baa yaali kuli kan kua u ŋalmani nni, u baali kuli baa tie yaaba n tuuni O Diedo nintuali po i, U bonbaakaali kuli ba tua yaaba n tuuni O Diedo nintuali jiema yeni bi tiayiekaadi yaadi n dagdi po i.