¹ Ban pua ya sawali, li bonlkaali jualɔngu po: Jerusalema, li tie ŋa ledi i, ke a niba kuli doni ki see bi diedi polu uu? ² Be ya po i, ke ti fuudi gbie u dogu nni ii, ke u dogu kuli gbie yeni fuugu uu? A niba yaaba n kpe, naa kpe tɔbu po ka, mi janjanma nanka den kpa ba. ³ A tɔtieba yudanba kuli den taani ki sani, ama, bi naa den ŋɔdi ba yeni dabana ka ki cuo ba; bi den cuo bikuli, ki taani yeni yaaba n den sani ki fagdi kuli. ⁴ Lanya po i ke n yedi, "Da nua mani nni yeni, cedi mani min buudi ninsiipiendi; Da lingi mani ke yin baagi nni, ki sɔngi n pali yeni ya fala yeni ya yebiadma n baa n buolu yaaba po." ⁵ Kelima, li daali tie jawaanciandi daali i, mi bolima, yeni li pabiidcianli daali, kelima, O Diedo, U Paaciamu Kuli Daano ń dɔgdi yaali ki waani li bonlakaali jualɔngu nni yeni, a bilinguona baa, ki mumudi, ke bi niba lóli li bubuuli, ki do li juali po, ki miadi mi todma. ⁶ Elami, bali li luoli. Bi tɔtieba, ti tɔturdi yeni bi tanjagiba ji nagdi i. Kiiri yaaba bobni, ki ñani bi gbankɔnditi, bu tɔbu po. ⁷ Jerusalema, a jualɔndi kuli gbie yeni tɔturdi. B tanjagiba mo bobni ki see a bulñɔna kani, bu tɔbu po. ⁸ Lanya daali, Juda ji ki pia gaapo; i ji pegdi i ninjoma, ki teli li juali po diedi jatiadi. ⁹ I nua ban pua ki padi Dafiidi dogu bilinguonli maama, li yiani yabi boncianli, i tieni li ñinbunbunli li juali tiipo, ki sengi mi ñima. ¹⁰ I cɔdi Jerusalema diedi, ki pua ki mudi a diena ki ba pugni li bilinguonli u paalu. ¹¹ I bobni li ñinbunbunli bilinguona lie yeni siiga, ki bua ya gaani ku ñinbuokpelgu ñima. Ama i naa tiadi ki ba buali ya tuonsɔnba n den tuodi ki bobni li buogu hali yogu. ¹² Lanya daali, O Diedo, U Paaciamu Kuli Daano yini kitaani yi, ke yin buudi, ki fabni, ki kuo i yudi yeni i langbiadi, ki la ti pabɔntiadi. ¹³ Ama, diidi mani, u badu yeni li pamanli n ji ye u dogu nni, ke bi kpaa a yangbenga, ki kodi i pee, ki ŋmani ti nandi, ki ñu mi daama; bi tua, "cedi mani tin di ki guo, ki go ñu ki guo, kelima saala ti ba kpe." ¹⁴ O Diedo, U Paaciamu Kuli Daano n dɔgdi, ki waani nni lankuli: "I kan baa sugli ya tuonbiadi ne po hali bada, ya caa yeni i kuuma," O Diedo, Ki Pia Gbenma Tienu n yedi lanya maama. ¹⁵ N Diedo, O Diedo, Ki Pia Gbenma Tienu yedi ya maama ne, "Gedi ki ban la Gufeneeri, Cebina, badidiegu yudaano, ki buali o, ¹⁶ 'A die be i, nekanba, a kpiilo tie bile i nekanba, ke a gbiidi a yuli po kakuli Ki gbiidi a kakucelu li juali po, ki lingi ku tangu nni, ke ban ti piini ŋa likani ii?" ¹⁷ Diidi, fini o gbanmandaano, O Diedo ba cuo ŋa, ki gbia gbia, ki fieni ki lu ŋa hali fagma. ¹⁸ O ba cedi ŋan baa ki bindi bindi nani li tankonkonli yeni, ki ban baa ya diema ya fanma n yabi nni. A baan kpe lanpo i, yeni ya tɔturdi n den tie a kpiagdi, fini yua n fiagi a caabaa diegu! ¹⁹ Mini O Diedo n ba deli ki ñani a a tuonli nni, ki jiini a ŋan ye ya yudandi kaanu. ²⁰ Lanya daali, N ba yini n naaciemo Hilikiya bijua Eliyakimi. ²¹ N ba taa a badiliadili ki lani o, ki ñagni o a gbanñagdigu, ki taa a paalu ki tieni o nuu nni. Wani n ba tua Jerusalema yeni Juda yaaba báa. ²² N ba bugni o buapiagu po Dafiidi diegu piemi; o ya luodi, nilo kan luoni, o ya luoni mo, nilo kan luodi. ²³ N ba kpaa, ki figni o, nani kpakpaali yeni, naani n juagi, O ba kali ti kpiagdi balkalkaanu, o báa diegu nni. ²⁴ Bi ba teni o o báa diegu kpiagdi kuli, li nikpela yeni li bila kuli, li paatieba yeni li talginba kuli baa luagi o ya po i nani mu tadñukaamu yeni a ñinboba yeni. ²⁵ O Diedo, Ki Pia Gbenma Tienu ń yedi ya maama n ne, "Ban kpaa ya kpakpaali, naani n juagi ne, bi ba ŋabi li, ki pua ki mumudi li, ki bili tinga nni, ya tugikpiagli n bi maa lipo yeni ba bodi cain; Kelima O Diedo n yedi yeni.