¹ Ban pua ya sawali, yaaba n ye mi ñincianma fanpienma nni po. Nani ya taafaaciangu n figdi, ki fuu, ki ñani niganu po yeni, yibali ñani ban jie ya diema ya fanpienma po, ki kpendi. ² N la ya bonlakaali n pia ti jawaanciandi: I janbi danba li kubi bi janbi i, yaaba n pua ki biandi fanma mo li pua ki biandi i. Elami yaaba, gedi mani ki pua ki diedi ba, Medi yaaba, lindi ki cebni ba mani. O Diedo yedi, "N ba cedi Babiloni ń wangi yi ya fala kuli ń gbeni. ³ Lani n cedi ke n ciaga ye yeni u kɔnu; n ciaga kɔni nani ya pua n punbi ki bua mali yeni i; Min gbadi yaali cedi ke n puanga nni mudi; min la yaali cedi ke ti yanyagdi pia nni. ⁴ N yama yagi, ke n jie ki luodi, ti jawaanciandi cuo nni. Ku yenjuogu nni, min tama ke mi kuugma ba cua npo ya yognu yeni, i yanbani ń cuo nni li yognu n yeni. ⁵ Bi sieni mi jiema, ke bi kaa ki di ki go ñu, ke yaaba n guu u dogu mo see ki guu; o nilo kpaandi ki yedi, "Fii mani a jakɔnda yudanba, bobni mani i tɔtiadi ki sɔgi i gbankɔditi mi kpama. ⁶ Kelima O Diedo ń yedi nni ya maama n ne, "Gedi, duoni ki seni o doguudo, o ba waani a wan nua yaali. ⁷ O ya la tɔturgu, ke i taami dia, li ŋungoli, yeni li yuoyuogoli, wan faami bonŋanla, ki ŋanbi ki diidi, ki kpaandi ki togdi." ⁸ O doguudo den duoni u nialu, ki kpaandi, "N Diedo, N see ki guu u yensiinu yeni ku ñiagu kuli, kaa ŋmiagi n kaanu bá waamu." ⁹ N nua tɔturgu, ke taami lie dia, ki kpendi. O go den yedi, "U baa, Babiloni baa, ke u buli yeni u nannana kuli baa tiipo, ki mumudi." ¹⁰ Hain, n niba, ban pua yaaba nani bi pua i dii u jalu nni yeni! Min gbadi ya maama O Diedo, U Paaciamu Kuli Daano, Israyeli Tienu kani, N waani a mani i. ¹¹ Ban pua ya sawali Duma diema po. Bi sedi hali Seyiiri, ki kpaandi ki buali, "O doguudo, ku ñiagu taa ki dagdi le i? O doguudo, ku ñiagu taa ki dagdi le i?" ¹² O doguudo jiini ki yedi, "Ku siŋaagu kpendi ii, ku ñiagu mɔko kpendi. I ya ba buali ki pugni, yin buali; ama yin go guani yogtianu." ¹³ Bi pua sawali Arabi diema po. I ba duani ku ñiagu Arabi fanpienma nni, yinba Dedaani yaaba yen i yankuli. ¹⁴ Tuogi mani yeni mi ñima ki teni u ñuñuunu ń pia yaaba; Yinba Tema diema yaaba, tuogi mani yeni mi jiema ki teni yaaba n tiini. ¹⁵ Kelima, bi tiini ki jugsiega i, ya jugsiega n ki ŋuu ki tuagu nni, yeni ya gbankɔditi n tiegi, yeni bu tɔbu ń bia maama. ¹⁶ O Diedo ń yedi nni ya maama n ne, "Ne yeni binyenli kakap, nani li lebli ń cɔdi a dana maama yeni, Kedaari kpiagdi ba bodi. ¹⁷ Yaaba n ba sieni Kedaari dabantuada yeni bi tɔtieba siiga baa tie waamu baba i." O Diedo, Israyeli Tienu n yedi yeni.