¹ Ban pua ya sawali Ejipti diema po. Diidi, O Diedo jagi ya tawalgu n kagi po, ki kpendi Ejipti diema nni; Ejipti yaaba buli digibi o nintuali, ke li ŋmadli kua Ejipti yaaba siiga, ke bi jigi cie. ² O Diedo yedi, "N ba sagni Ejipti yaaba, ban kɔni bi ŋmiali nni: nilo kuli ba kɔni yeni o kpiilo, yuakuli ń kɔni yeni o dɔnli bii o kuatalielo; dogu ba kɔni yeni dogu, diema ń tuogi diema. ³ Ejipti yaaba jama ba gbeni. N ba biani bi yanjaga fanma, bi ba bu i buli, ki tieni mi lingima yeni yaaba n boe yeni bi tinkpiba, a baayuadiida, bi jabaaba yeni a gbangbinda. ⁴ N ba taa Ejipti diema yaaba ki tieni ya bado n bia nui nni, wan diedi ba, ya bado n pia mi tuama n ba diedi ba; n Diedo, O Diedo, U Paaciamu Kuli Daano ñɔbonli n yeni." ⁵ Mi ñincianma ñima ba ñuudi, i kpenciami ba ñuudi, ki kuodi. ⁶ I kpenciami ñima ba nuugi; u kpenciamu, Nili kpentaana ba wadi, ki kuodi; ku sabgu yeni a kpenkankaga ba kuodi. ⁷ U kpenu, Nili balinma nni, ki cili u kpenñɔbu kani, ki ban gedi hali mi ñincianma nni, bonsɔngli kan sedi, ki taani yeni ban buli yaali i kuani nni kuli, ba kuodi. ⁸ A jankpaanla ba buudi ki fabni, yua n lu i janpiemi, Nili nni kuli ba buudi ki fabni, yaaba n lu i taali mo ya pala ba biidi. ⁹ Yaaba n tuuni yeni Leni tiidi gaali, ki taani yeni yaaba n lugi a cabipiena kuli gbanu ba kpe, bi pali ń wadi. ¹⁰ Yaaba n tuuni a caba yeni ti kpaldi tuona, yeni yaaba n tuuni ki pia ŋmaapani kuli ba cɔgi, bi pala ń biidi. ¹¹ Sowan badbijaba tie nani yanluodanba yeni. Farahɔn ceglitieba ji tie yanpiidanba i. Bi ba tieni ledi i, ki yedi Farahɔn, "N tie yanfodaano bijua i, n tie yognuba bado ya bijua i?" ¹² A yanfodanba nan ji ye le i? Nan cedi ban kadi ki waani a, O Diedo, U Paaciamu Kuli Daano ń bobni yaali Ejipti diema po. ¹³ Sowan badbijaba ji tie yanluodanba i,Menfisi badbijaba mo ji tie tofaadanba i; Bi kuani Ejipti diema mi tudma nni, bani ya yudanba n biandi Ejipti fanma. ¹⁴ O Diedo cedi ke Ejipti diema yaaba jigi cie, ke o niba ji ki bani ban tie yaali, bi tie nani ya daañugaado n dua ki falini o siindi nni yeni i. ¹⁵ Ejipti yaaba siiga, talginba, bi bulcinba, a piada yeni a luora kuli, obakuli kan fidi ki mindi pu, Ejipti po. ¹⁶ Lanya yognu, Ejipti yaaba baa tie nani bi puoba yeni i. Bi baa digbi, ki pia ti jawaandi, kelima, O Diedo, U Paaciamu Kuli Daano fii ki sedi bipo. ¹⁷ Juda diema ba tua Ejipti po i jeje bonli i. Nilo ya tiadi ba Juda po, kase ti jawaanciandi ń kua ba, kelima O Diedo ń bobni maama ki ba fii ki sedi bipo yeni. ¹⁸ Lanya yognu, Ejipti diema nni baa pia dogi mu (5), ke bi maadi Kanana maama, ki polni O Diedo, U Paciamu Kuli Daano yeli po. dogyendu baa yi U Yienu Dogu. ¹⁹ Lanya yognu, li padbinbindli baa ye Ejipti diema siiga, O Diedo po, bi ba seni bunbunli, u tinbianu kani, O Diedo po. ²⁰ Lani n ba tieni mi maalma yeni kasiedi ke O Diedo ye Ejipti diema nni. Ejipti yaaba ya yigni ki mia O Diedo, kelima bi mabni ba, o ba sɔni bipo o candaano yeni yua n ba kɔni ki ga ba, ki faabi ba. ²¹ O Diedo ba cedi ban bandi o Ejipti nni kuli, Ejipti yaaba kuli ba bandi O Diedo li daali mɔno. Bi ba gbaani ki pugi o, ki padi opo a pada, ki puni o bu paabu. Bi ba niani O Diedo i ñɔniani, ki go cɔlni li ñɔniani, ki kuani yi. ²² O Diedo ya pua ki mudi Ejipti, wani n go ba tebi ba. Bi ba guani O Diedo kani; O ba cengi bi jaandi, ki paagi ba. ²³ Lanya daali, li sanjali baa ye Ejipti, ki caa Asiiri, Asiiri yaaba baa caa Ejipti, ke Ejipti yaaba mo caa Asiiri; Ejipti yaaba baa gbanndi ki pugi O Diedo yeni Asiiri yaaba. ²⁴ Lanyognu, Israyeli ba taani yeni Ejipti yeni Asiiri, ban tua diema taa, yaama pia li seli ki tinga po; ²⁵ O Diedo, U Paaciamu Kuli Daano ba selgi ba, ki yadi mi yediŋanma bipo, ki yedi, "Li seli ń ya ye yani n niba Ejipti yaaba yeni Asiiri yaaba yeni Israyeli yaaba, N faali, min bua yaaba."