¹ Fala ye yinba, yaaba ya ñinbiadi n fidi a caba nani i fiabi yeni, Etiyopi diema kpenciami po; ² Yinba yaaba n sɔni a tonda mi ñincianma po, ke bi caa yeni ti ñinbiadi yeni. Yinba ya tonda n kagi, ki caa tonma yeni, guani ki gedi mani ya nibuoli n fagi belibeli, ke bi gbani ñilgi yeni, ban jie yinba yaaba ŋanduna nni kuli yeni, ke i pia u paalu, ki paani i yibalinba yeni, guani mani i diema, i kpenciami ń gbie yaama nni yeni. ³ Yinba yaaba n ye ŋanduna nni kuli yeni yinba yaaba n ye ki tinga nni. diidi mani ya tuudcabli n see a juana po, cengi mani ban ba piebi li naatunli ya yognu. ⁴ Kelima O Diedo yedi nni ya maama ne, "N baa ye n yekaanu i, tanpoli po, ki nua yaali n tiendi tinga nni, nani ku yenwulgu ń ñigdi mi yenma nni maama yeni, bii, nani ku mangu tawalgu, u jetaagu wulgu yognu yeni. ⁵ U jetaagu ya nagi, ke ku daamɔngu tiidi puuni, ke mi puuma loni a luana, ke a luana beni, o ba cua ki landi, ki gbagbadi ya bena n ki pia luana, kaa pia fuoma. ⁶ O ba ŋa lanya niba kuli a juana bonyugda po, yeni ki tinga nni yandi po. A bonyugda baa jagi bi kpiema po, ku siagu, ke ti yandi mo jagi bipo ku fawaagu yognu." ⁷ Lanya yognu, ya nibuolu niba fagi bebeli, ke bi gbanu ñilgi yeni, hali yogu, ban jie ya niba ŋanduna nni yeni, bani yaaba n pia u paalu, ki paani bi yibalinba yeni, ke bi diema gbie yeni i kpenciami yeni, ba cua yeni bu paabu O Diedo, U Paaciamu Kuli Daano kani, bi ba cua yeni li padli, O Diedo ń ye naankani, Siyɔn juali po yeni.