¹ Ban pua ya sawali Damasi po. ² Diidi, Damasi ji kan ya tie dogu moko. Siiri ba tua diegbena i. Likani ba tua i yankuli ń baa dua naani, ki fuodi, ke niloba kuli kan yagi bi yama. ³ Ya dociami n pia a bilinguona ba bodi Efrayima diema nni, li bali mo ba ña Damasi dogu nni, yaaba n ba sieni Siiri diema nni mo kan cie Israyeli yaaba. O Diedo, U Paaciamu Kuli Daano ñɔbonli n yeni. ⁴ Lanya daali ya pundi, Jakɔbo kpiagdi ba jiidi, ki wadi, o gbengidi mo ń kpandi, ki tua dondongu. ⁵ Li baa tie nani ban taagi ku kpaangu ya yognu, ke o kpaakuolo liegi a dikala yeni i, li baa tie nani ban yi liegi a dikala Refayima jualɔngu kuani nni maama yeni. ⁶ Yaali n ji ba sieni Israyeli baa tie bonliegikaali, nani ban yi pua ki cenli olifie tiidi luana yeni i gbiami yeni: tanpoli po kan luo luana lie, bii, luana taa, ya bena mo n luoni boncianla kan luo luana na bii amu; O Diedo, Isryeli Tienu ñɔbonli n yeni. ⁷ Li daali, o nilo ba gbagi ki diidi U Tienu, o tagido, ki yaadi bi nuni ki nɔnli Israyeli Tienu, yua n gagdi ki ŋani yeni. ⁸ Bi kan nɔnli bi padbinbinda, bi nui tuonli, bi go kan diidi bi nubila ń tagi yaali mo, Acera budaacaardi yeni u yienu nannanna. ⁹ Lanya daali, bi ba sani ki ŋa i dogpaali n den tie wuonkaani, nani Israyeli yaaba ń den nagdi ke Hefa yaaba yeni amola yaaba sani ki ŋa bi dogi maama yeni, li ba tua pabɔnli bonli i. ¹⁰ Kelima i sundi i faabma Tienu, kaa tiadi ya tangu n tie i fidu po. Lani n cedi ke i ŋuu ya tiidi n tie i buli yanbuama, ki ń ŋuu i tiilandi i buli po, ¹¹ yin den ŋuu li tiidi ya daali, ki koni ki ŋanbi li kuanu, i den bundi lanya daali i, li siŋaagu i, ke i bonbulkaali den pudi, ama, u jetaagu yognu, yin ba di ya yognu li tiidi ñuadi yeni, ku kpaangu den sani ki bodi, lanya yiani ki pia ñɔgu. ¹² Sola! ya fuugu ne tie ya nibuoli n ki pia cɔli ya fuugu i, li fuugu naani mi ñincianma ya fuugu yeni i, li fuu ki duni nani a ñingola ya dunli yeni i! ¹³ Li nibuoli baa duni nani a ñingola yeni i, ama U Tienu fu yeni li nibuoli, ke bi sani ki fagdi, o ba deli ba nani ku faagu ń yi piebi ki lendi ya muakuongu a juana yuli po yeni i, bii, nani o finfinglanjuangu ń fiini ya tangungu yeni i. ¹⁴ Ku yenjuogu ya cua, i jeje mo cua n yeni! Hali yeni lan ba fandi, ke baa ji ye! Lani n tie yaaba biidi ti ya biinu n yeni, bani yaaba n tulini ti ki fagni ti yeni ya biinu n yeni.