¹ Sɔni mani a pabila, mi diema yudaano po, ki ña Sela, ki tɔgni mi fanpienma nni, ki ban do Siyɔn bisalo juali po. ² MOwabi puoba se Arinoni kpenu kani, nani ban deli ya nuanga, bii, ban pua ki yodi ya nuantediga, ke mu nuanmu waa, ki puagi yeni. ³ Bi tua Jerusalema yaaba, "Teni ti mani i cegli, taa mani a yanjaga, lingi mani tipo u wuonkaanu, nani ku ñiagu yeni, wuoni yaaba n sani ki ciadi, ki gedi i kani, da cedi mani ban bandi ban ye naani. ⁴ Cedi mani ban ya ye i siiga, bani Mowabi niba, yaaba n sani ki ciadi, ki cua ki mia yi ti candandi yeni; yin tua bi candanba, ki wuoni ba, bi tugmɔndanba ń da bandi ban ye naani." Kelima, fala yeni mi yebiadma ba pendi, ku tugmɔngu ń gbeni, hali yeni ya yognu ke yaaba n cua yeni li mabinli ń ba bodi mi diema nni. ⁵ Mi ŋanma yeni mi teginma n ba pugni ti badigbandi u paalu; Dafiidi puolŋuanu n ba kali yeni ti mɔnkundi, o badkalkaanu. Y a bujiali n lingi ti mɔnkundi ki tiendi yaali n dagdi n ba kali Dafiidi gbandieli nni yeni mi teginma. ⁶ Ti gbadi Mowabi japaadi yeni o kafaama po, o dongi o yuli, ki fiindi li pabienli. Ama o japaadi kuli tie fanma i. ⁷ Lani n cedi ke Mowabi buudi Mowabi po, bikuli wolni i! I buudi ki fabni kelima ban bolini Kiri Hareseti yua den tiendi reseni kpama cieceina po i. ⁸ Hecebɔn tiikuani kuodi ki taani yeni Sibima daamɔngu tiidi kuani kuli. yini ya daama i ke u dogu yudanba den yi ñu, ki guo, ki gaadi. li tiidi kuanu den tandi ki pundi Yayeseli, ki ban kua hali mi fanpienma po. Li tiidi bena den yiini mi ñincianma po i. ⁹ Lanya po i ke n ba buudi Sibima daamɔngu tiidi po, nani Yayeseli yaaba ń buudi maama yeni. N ba buudi ki sɔngi Hecebɔn yeni Eleyale yaaba, yeni n ninsiidi, kelima i jetaagu yognu i, ke bu tɔbu den cua ki ludi yi. ¹⁰ Li pamanli yeni i yigni gbeni i tiidi kuani nni, i yani yeni i pamandanyigni mo gbeni ku daamɔngu tiidi kuani nni. Obakuli ji kantuodi daamɔngu ti daatiadi nni, kelima, n cedi ke li pamanli yeni i yigni gbeni yua n tuodi mi daama po. ¹¹ Lani n cedi ke n pali yiini nani u kogdimuanu yeni Mowabi po, ke puanga nni mudi, yeni li pabiidli, Kiri Hareseti po. ¹² Mowabi cɔgni o yuli, ki do a juana po, ki bua ban jaandi o buli padbinbinda po, ama, o kan baa pu o jaandi po. ¹³ Lani n tie O Diedo ń den tuodi ki yedi ya maama, Mowabi diema po. ¹⁴ O Diedo go yedi mɔlane ya maama ne, "Ne yeni bina taa, Mowabi kpiagdi ba tua fanma; Bá yeni o nibima ń yabi maama kuli, yaaba n ba sieni kan ya dɔa fuoma, li kan ya pia mayuli."