1 Ya sawali n dɔgdi Mowabi diema po. Ñiayengu baba i, ke bi pua ki mudi Mowabi diema, ki kuani mi niba li pabɔnli nni; bi pua ki mudi li diema nni Ari dogu, ki pua ki mudi Kiiri dogu. 2 Bi doni i buli ń ye naani, Dibɔn buciamo kani ki buudi; Bi gedi Nabo yeni Medeba buli kani ki buudi. Bikuli kuo bi yula yuminli, ki kogdi bi langbiadi. 3 Bi lani li pabɔnli tiadi, ki waa i sani nni; bi diedi polu yeni bi daadi nni, bi niba buudi ninsiipiendi, ki wolni. 4 Hecebɔn yaaba yeni Eleyale yaaba kuudi ki lingi mi todma; Bi gbia bi yigni hali Yahasi dogu nni. Lanya po i, ke Mowabi tɔtieba kuudi ki lingi mi todma, kelima, bi jie boncianla, ki luodi. 5 N yigni ki buudi yeni n pali kuli, Mowabi po; yaaba n sani ki ciadi tiini ki caa Sowari yeni Egilati Celiciya po. Bi tiini ki do Luhiti po, ki buudi yeni li pabɔnli; Horonayima sanu po, bi buudi ki fabni yeni li pabɔnli, kelima ban pua ba ya nufanu po. 6 Nimirimi ñima fuadi ki kuodi; ti muadi kuodi, ke ku muabigu mo waadi, mua sɔangu ji ki ye, li kuli kuodi. 7 Bi duo yaali n pia buama, ke bi den begni kuli, yeni yaali n sieni kuli ki sani ki duodi ki gedi i kpentiidi kani. 8 Li bubuuli yeni i yigni gedi Mowabi tinbiani kuli po; Li bubuuli yani i fanfanbni pundi hali Egilayima yeni Beeri Elimi po. 9 Kelima, Dimoni ñima kuli gbie yeni sɔma i; ama, N ba pugni mi fala yeni mi yebiadma Dimoni po. N ba cedi o yangbanlo ń fii ki sedi Mowabi yaaba, yaaba n sani ki ciadi, ki taani yeni yaaba n ye Dimoni dogu po kuli.