¹ O Diedo ba gbadi mi niñima, Jakɔbo puolŋuani po. O go ba guani ki gandi Israyeli yaaba, ki kaani ba bi diecema nni. Bi canba ba taani yeni ba, bikuli ń tua Jakɔbo buolu yaaba. ² I nibuoli ba ŋmagdi ba ki gobdi ki gedi yeni ba bi tinga nni. Lanwani ii, Israyeli buolu ba tuo ki ga ba bi O Diedo diema nni, bi jaba yeni bi puoba kuli, ban tua bi bi jatuada yeni bi potuada. Bi ba cuo yaaba n den diedi ba yeni, ki wangi ba fala yeni, ban tua bi yonbi. ³ Ya daali ke O Diedo ba puni a mi fuoma, a falaciamo po, a yanyagdi po yeni ban den cedi ke a tuuni ya tuonpaala yeni po, ⁴ ŋan yiini ya yanbu ne, ki ñuadi Babiloni bado, "Be ee, ke o tugtondaano yua den mabindi ti ji ki ye, ti japaaciandi pabiencianli gbeni cain! ⁵ O Diedo jendi bi nibiadiba gbadundunli, ki kɔnli bi paatieba badigbiamu, ⁶ Yua n den pua ki mudi i nibuoli, o pabienli nni kaa cedi, yua n den diedi i nibuoli diema yeni li pabiencianli, ki wangi ba fala kaa gbia bipo niñima yeni. ⁷ Mɔla ki tinga kuli ji baa mi fuoma yeni li yanŋaali; bi ji laa ti pamandanlaadi, ki yiini i pamandanyani i. ⁸ Bá Cipri tiidi yeni Liban Sediri tiidi mangi bi pala yeni yaali n tieni ne kuli; Li tiidi maadi, ki tua, 'Hali ban tudi a, ke a baa, tiicualo ji ki cua ki ba cua ti ki guli.' ⁹ Hali bi tinkpiba diema ń ga a laabaalo, bi bobni, ki ba kadi yeni a, ŋan ba pundi bikani ya yognu, ŋan den kpaa ki tinga nni badicianba yaaba kuli findi, ŋan den fiini ya nibuoli yuanba kuli bi badigbandi po yeni. ¹⁰ Bikuli ba maadi yeni a, ki yedi a, 'A mo ji tadi nani tinba yeni i. Amo ji tie nani tinba yeni i. ¹¹ Bi fegi ki luni a bi tikpiba diema nni yeni ya kogdimuanu n den mangdi a pali. A duanu n tie mi bedma, ke a sidibila mo tua a kpalpinkaabu.' ¹² Fini yua n den tie ku siŋaagu ŋmaabiga, yeni ku bijabuado, li tieni ledi ke a ñani tanpoli ki baa tinga nni maama ne! Fini yua n den paani i nibuoli kuli, li tieni ledi ke bi pua ki jiini a tiipo! ¹³ A den yedi a pali nni, 'N ba do hali tanpojoma, n ba kaani n badigbandi U Tienu ŋmaabila polu i, ki do ki kali i buli kadikaanu juali po, hali nijienu po. ¹⁴ N ba do, ki kpedi ki cie ti talwadi; N ba tua nani U Tienu, tanpoli badciamo yeni i.' ¹⁵ Yeni lankuli, bi pua ki jiini a bi tinkpiba buogu yu n ki pia bianu yeni nni. ¹⁶ Yaaba n la ŋa kuli baa cini bi nuni apo, ki ya nua ŋa cenm. Bi ba buali, 'Ya ja ne ka den cedi ke ki tinga migni, ki ñɔgni i nibuoli diema, ¹⁷ ki cedi ke ki tinga kpandi ki tua fanpienma, wani ka den pua ki mudi i dociami, kaa cabni o kpaada miali, ke bi kuni bi denpo oo?' ¹⁸ I nibuoli baditieba kuli, yuakuli dua yeni ti kpiagdi, o kakuli nni. ¹⁹ Ama fini wani ii, bi luni a, ke a fagdi yeni a kakuli, nani ya bikaaga n kpe ki naá tugu nni yeni. ke ban kpaa yaaba yeni ki jugsiega, ki tudi ki luni ba ku buogu nni yeni, pini ki lindi a nani tiayiekaagu yeni. ²⁰ A kan taani yeni ba kakuluaga, kelima a pua ki mudi a diema, ki kpaa a niba kuli. Bi ji kan taa bi nibiadba yeli i nibuoli siiga." ²¹ Bobni mani, ki kpa bi bonjala kuli, kelima bi baanba biadma po, ban da ti fii, ki diedi ki tinga ki gbieni ki ga yeni i dociami nni mi biadma. ²² "N ba fii ki sedi bipo" O Diedo, U Paaciamu Kuli Daano n yedi yeni. "N ba piini Babiloni yeli yeni o yaabila yeni o puolŋuani yaaba n ye Babiloni nni kuli." O Diedo n yedi yeni. ²³ "N ba cedi likani ń tua baagu, a guda kaanu, N ba tigni ba, ki pidi ba yeni mi bolinma ŋaanu i." O Diedo, U Paaciamu Kuli Daano ñɔmaama n yeni. ²⁴ "Laa pia tama, Min jagi yaali, lani n ba tieni; Min den bobni maama, li juodi yeni i: ²⁵ N ba pua ki mudi Asiiri yaaba n diema nni, yeni n juali po, N ba ŋmaa ki madi ba. N ba yuandi ki ñani ban lani Israyeli yaaba ya yonbipianli yeni ban bugni bi buapiadi po ya tugikpiaga." ²⁶ O Diedo ń bobni ki taa ya jaga ki tinga kuli po n yeni, Wan duoni ya nuu, ki ba pua i nibuoli kuli n yeni. ²⁷ Kelima, O Diedo U Paaciamu kuli Daano n jagi yeni, ŋma nan ba fidi ki yie opo? O duoni o nuu, ki ba pua, ŋma nan ba fidi ki jiini u? ²⁸ O bado Akaasi ń guani ya binli, li ñɔbonli den dɔgdi, ki yedi ya maama ne: ²⁹ Yinba Filisiti diema yaaba kuli, yin da mangi i pala, kelima ya gbadunduli den pua yi yeni kɔnli. Kelima yin jie waa ya kpe, waalabli n ba ña o niinni, li mo ya jiinli ba pudi ya waajunjundli n yugi. ³⁰ N buolu luora bila baa kpaa bi yandi n diema nni yankpaakaanu i, bi niñinniba mo dua yeni mi yanduanma i. Ama, N ba kpa Asiiri yaaba kuli, yaaba n sani ki ciadi mo, mi koma n ba kpa ba. ³¹ U bulñɔjabu ń buudi ki fabni, dociamu ń yigni i jawaandanyigni; Filisiti diema kuli ba mudi yomyomi. Kelia ku muñiigu ñani nijienu po, ki kpendi, jakɔndo nan ki ye o tɔgoli nni, ki ba pani gu u sanu. ³² Bi ji ba jiini Filisiti diema tonda ledi i? Jiini ba mani, ke O Diedo n maa Siyɔn dogu, ke o buolu nni talginba mo baa ya wuonkaanu n mɔni lankani i.