¹ Amoci bijua Esaayi ń ga ya laabaali, O Diedo kani, ke li nua Babiloni diema: ² O Diedo yedi: "Caani mani li tuudcabli ya juali n pidi milmilmili yeni po, ki yigni ki waani ba, yugdi mani i nui, ki waani ba ke ban tɔgni bi bulcinba bulñɔbu, ki kua. ³ N tuodi ki waani n niba yaaba n gagdi ki ŋani, N yini n jakɔnda yaaba n ba dɔgdi n pabienli, yeni yaaba ya pali n mani, n ya kɔni ki paadi po. ⁴ Ya cengi mani li juali po fuugu, li tie nani niwulgu yeni i! Ya cengi mani i nibuoli boncianla diema yaaba yaaba n taani fuugu! O Diedo, U Paaciamu Kuli Daano n tɔgni, ki bua diidi, tɔgola n bobni bu tɔbu po. ⁵ Bi ñani ya dogi n fagi boncianla, hali u tinbianu po. O Diedo yeni o pabienli tuonsɔntiadi cedi mi diema kuli gbanu wudi. ⁶ Buudi mani, ki figindi, kelima O Diedo daali nagi; yaali kpendi yeni fala yeni ya yebiadma n ñani Ki pia gbenma Tienu kani. ⁷ Lanya po i, ke i nugi yɔlgi, ke yuakuli ya pali wadi, ke o buoni o papaali. ⁸ Ti jawaanciandi kua ba, ke fala cedi ke bi tugdi nni mudi, ke bi buandi, nani ya pua n jiidi ki guo, ki bua mali yeni. Bi bi nua biyaba yeni i jeje, ke bi nuni mo mɔni nani li mukuanmɔnli yeni. ⁹ Diidi, O Diedo daali kpendi yeni ya pabiencianli n bia boncianla, ki ba kuani u nufanu mi diema nni, ki bolini ya tuonbiadi danba n kua mi niinni. ¹⁰ Tanpoli po ŋmaabila yeni ŋmaacali kuli yenma ji kan yendi. U yienu ba cili ki biigi hali ku saŋaagu nni, o ŋmaalo mo kan pendi, ki teni yenyenma. ¹¹ N ba dadi ki tinga nni niba, bi biadma po, ki jia bi nibiadiba buudi kelima ban tugi ya tagli po. N ba cedi bi yaaba n dongi bi yula japaadi ń gbeni, bi tugmɔndanba mo ya kafaama ń baa u bianu. ¹² N ba cedi bi jaba lama ń paagi nani wula mɔno yeni, bi nisaalba mo ya lama ń paagi nani Ofiiri wula lama yeni. ¹³ Lani n cedi ke n ba cedi tanpoli ń digibi, ki tinga mo ń migi ki kaanu, O Diedo, U Paaciamu Kuli Daano yeni o pabienli daali n ba tieni lankuli. ¹⁴ Ja kuli ba pegdi ki nɔnli o buolu po, ki sani ki guani o diema nni, nani ban deli ya pialo yeni, bii, ya pia n ki pia yankpaalo yeni. ¹⁵ Ban li nandi yua kuli, se ban kpa o, bi ya fidi ki cuo yua mo, bi ba kpa o yeni ki jugsiega i. ¹⁶ Bi ba ŋmaa, ki madi bi bila bi nintuali nni, ki kua ki bi diema nni, ki fagi bi diedi nni piama, ki ñii bi puoba ke bi nua. ¹⁷ Diidi, N tigi Medesi yaaba ke ban fii ki tuogi ba, bani yaaba n ki pia wula bii ŋanjilfa buama. ¹⁸ Bi ba yegi piemi, ki pupudi bi jawaaba. Bi kan gbadi canpandmu bii bila niñima, ki faabi ba. ¹⁹ Babiloni, mi diama kuli ya ŋamu ń taani naani, Kalide yaaba kuli ya jilma, O ba jiidi ki baa nani Sodomi yeni Gomori yyeni i. ²⁰ Hali nifiima ń tuu nifiima, nisaalo kan kali lanya diema nni. Sancenlo kan caani o jongu lankani, yankpaalo mo kan jadi ki sedi yeni o yankulu lankani. ²¹ Ama, ti muayanbiardi n baa dua likani. I fuasangbanli n baa dua bi diena nni; ti tɔgtɔgnuandi yeni a jaŋuaba n baa waa likani. ²² Ti muayandi n baa buudi ki jiendi bi kpepuona, ke i naamuuni kuudi bi diecianŋama nni. Babiloni yognu nagni, ke o daali mo kan pedi.