1 A gay kaŋ Rabbi na Israyla izey no fulanzamey, g'i ka ngey ibarey kulu kaŋ go g'i windi kambe. Yasuwa zeenu gumo, a jiirey gooru. 2 kala Yasuwa n'a Israyla kulu ce, arkusey jine borey , alkaaley, da wongu nyaŋey, ka ne i m'a margu. A ne ise: " ay zeenu, ay jiirey mo gooru. 3 Araŋ kulu di hay kaŋ Rabbi te dumi cindey se araŋ sabbay se. Zamma Rabbi araŋ Irkoyo no wongu araŋ se. 4 Araŋ di mo, ay n'a dumi cindey kaŋ yaŋ cindi fay araŋ se caaca ra, i ma ciya kunda fo kulu se tubu, za Urdun, da dumey kulu kaŋ yaŋ ay tuusu, kal a ma to Teeku Beero gaa, wayna kaŋay haray. 5 Rabbi araŋ Irkoyo g'i tutti ga kaa araŋ jine, a g' i gaaray ga kaa araŋ jine, araŋ mo ga goro i laabo ra, ga may sanda mate kaŋ cine Rabbi araŋ Irkoyo na ci araŋ se nda. 6 Wa kay ga te bine-gaabi, ka sanney kulu kaŋ i hantum Musa asariya tira ra gana, ga goy ndey mo. Araŋ ma si kamba ka fay d'ey, ka koy kambe ŋwaari wala kamba wow. 7 Wa si araŋ boŋ margu nda dumi cindey wo kaŋ yaŋ cindi araŋ game ra. wa si i toorey ma ce, wa si ze ndey mo,wa si may se, wa si sududu mo i jine. 8 Amma wa araŋ boŋ haw Rabbi araŋ Irkoyo gaa, sanda mate kaŋ cine araŋ na te za doŋ ka kaa sohôn. 9 Rabbi na dumi beeri yaŋ, kaŋ gonda gabi gaaray ka kaa araŋ jine, boro fo mo kulu hal ga kaa hunkuna mana hin ga kay araŋ jine. 10 Araŋ ran afo kulu ga zambar gaaray, zama Rabbi araŋ Irkoyo no goono ga wangu araŋ se mate kaŋ a n'a ci nda. 11 Yaadinga wa haggoy d'araŋ boŋ gumo! kaŋ ga nan araŋ ma baa Rabbi araŋ Irkoyo. 12 Da day mo araŋ na banda bare, ga koy g' araŋ boŋ haw dumey wo kaŋ cindi araŋ game ra ga, da day araŋ margu ndey hiijay ra, hal araŋ yaada araŋ dey te afollon. 13 cimi araŋ ma bay kaŋ Rabbi araŋ irkoyo, si ye ka dumey wo gooray ga kaa araŋ jine. koyne. Amma a ga ciya araŋ se hirrimay nda kumsay, a ga ciya barzu araŋ carewey se nda mo karjiyan araŋ mayey ra, kal nan kaŋ araŋ kulu halaci laabu hanno kaŋ Rabbi araŋ Irkoyo n'araŋ no boŋ. 14 Nga ne sohô ay go ndunnya kulu fonda gana. wa bay d'araŋ biney kulu, da araŋ fundey kulu, kaŋ gomney kaŋ sanni Rabbi araŋ Irkoyo te araŋ se din, i kulu no kubay ba afo mana gaze. 15 Yaadin gaa, araŋ ma bay mate kaŋ cine gomney kulu kaŋ Rabbi araŋ Irkoyo ci din du ngey kubando, kala nd'a n'araŋ kulu halaci parkatak, laabu hanno kaŋ Rabbi araŋ Irkoyo n'araŋ no boŋ. 16 Da day araŋ murte alkawalo kaŋ Rabbi araŋ Irkoyo n'araŋ no gaa , nga no araŋ may de-koy waani yaŋ se hal araŋ sududu i se, kala Rabbi futa ma koroŋ araŋ boŋ, araŋ ga halaci nda waasi, laabo hanno wo kaŋ Irkoy n' araŋ no boŋ.