¹ Rɔ̃nrɔ̃n tɔ̃wó, kǝnyíbə́ míwɔ ǝ̀zǝ̀də́də́ ŋnan wó dɛá, míán kɔ míán ɖə́kiwó ŋún lǝ núsíanú kǝ xònǝ̀ɖu míán ŋúntíran kídə́ míán gbɔngbɔn. Míán lǝ kprɔ kɔ̃kɔ̃ do lǝ vɔ̃nvɔ̃n nə́ Mawu mǝ. ² Mí kpɔ̃ tohó ɖə́ká nə́ mí! Mí ŋ' jíiguǝ lǝ amǝ ɖə́kɛn ŋún ò. Mí ŋ' dákpa amǝ ɖə́kɛn ŋún gbo míán kpɔɔ̃gomǝ lǝ amǝɖə́ŋún ò. ³ Ŋ nyí nə́ wá cò kúfio nə́ mí í wɔɛ bə́ ŋ lǝ nú ilá ò. Ɖó ŋnú váyi va bǝ mi ɖó tohó ɖə́ lǝ míán jí wó mǝ; bə́ nə́ míán nɔn àgbǝ nɔ̃nmí míán kú də́ǝ̀du. ⁴ Ŋ kádə́ míán jí sùgbɔ í ǝ̀jì lǝ jɔŋ də́ míán ŋún sùgbɔ ǝ̀jí lǝ jɔŋ tómǝ nə́ í gbǝ nyí míán ranmǝ kúkú wó mǝ cá. ⁵ Kǝ mí yi Màsǝ̀dónì ɖǝ̀cáá , mí ŋ' gbɔn lǝ míán ɖə́kiwó mǝ ò. Tóvò nǝ ŋna, mí lǝ tó àhùà wo mǝ lǝ gbaŋgba kídə́ vɔ̃nvɔ̃n lǝ jìmǝ̀. ⁶ Vɔ̃à Mawu kǝ dónɔ̃n ǝ̀gan amǝkǝ ranmǝ kúwóá ǝ̀dóògan mí tó Títò yə́ vává mǝ. ⁷ Ŋ nyí tó yə́ vává mǝ ɖǝ̀ɖǝ̀ í Mawu dóogan mí ò. Ǝ́có Títò cá yə́ gándóámǝ kǝ í xɔ có míán gbɔ̃á gbɔ̃. Ǝ́ xonu nǝ̀mí có míán rɔnrɔn ŋún, kídə́ míán xomǝfíɛn ŋún kídə́ míán ɖə́cɔ̃ lǝ̀ ɖǝmǝ gánŋgán ŋ an. Càgbǝ ŋnan tɔ̃á, ǝ̀ vívíŋ sùgbɔ. ⁸ Kǝ ì nyìbə́ tiŋ' wóéma kú ranmǝ nə́míán, nya ŋ'cɔɔ̃ɖǝ lǝ jí ò. Vɔ̃à ŋ sǝ vǝ̀və́ yá kǝ̀nyìbə́ ə́cɔ̃ ranmǝ kú mí an. Vɔ̃à ranmǝ kú mí nə́ gàmǝ̀ ɖǝ̀í. ⁹ Ífia, ǝ̀jì lǝ jɔŋ. vɔ̃à ŋ' nyí càgbǝ kǝ ranmǝ kú mí taɖóí ó, vɔ̃à càgbǝ kǝ míán ranmǝ kúkú á ná míán jímǝ tɔ̃trɔ̃í . Mí wo xomǝfíɛn kɔkɔ kǝ í nyínə́án, miŋ' wɔnú gúgú ɖə́kɛn càgbǝ míán tɔ ò. ¹⁰ Ɖó xomǝfíɛn kɔkɔ hɛnǝ jìmǝ̀ tɔ̃trɔ̃ kǝ kprɔnǝ amǝ yidə́ ɖǝ̀ɖǝ̀ kpɔ̃kpɔ̃ kǝ wóŋ' sǝnǝ vǝvə́ də́ta í. Gàɖǝ̀ó mǝán, xíxə́ámǝ yə́ xomǝfíɛn hɛnǝ ǝ̀kú vá. ¹¹ Mí kpɔ̃ càncán gánŋgán kǝ xomǝfíɛn nyɔ̃nŋ'gbin wo lǝ mian mǝ an. Míán cancán góŋ'góŋ' án gánŋgán í ɖǝdíìsá bə́ minyí amǝ man nyáàɖǝ̀wó. Míán makádə́jí, míán bibi yéŋ'yéŋ' kídə́ míán jijí wó gánŋgán bə́ míán kpɔ̃ bə́ ǝnyɔn jɔjɔ ná vámǝ! Lǝ núsíanú mǝ án, mian ŋ'táwó mí ɖóòkpə́jí bə́ mí nyí ǝ̀dǝmanyán tɔ̃wó lǝ ǝnyɔn ŋna mǝ. ¹² Tógbɔ̃ bə́ ŋ ŋrɔnú nə́mí án, nyɛn ŋ' ŋrɔɛn càgbǝ amǝ kǝ ŋ' wɔ baɖa ò, nɔ̃nmí càgbǝ amǝ kǝ ɖu núvoɛn yə́ ya ò. Ŋ ŋrɔn nú càgbǝ míán vǝvə́ də́də́ ǝnú nə́ míán ná zé lǝ̀ Mawu yə́ ŋkɔ. ¹³ Càgbǝ ŋnatɔ í mí xɔ ŋúnsɛn dódó. Gbǝ sə́ kpə́, míán ŋ'táwó gán dóámǝ wóá, mígbǝ lǝ kpɔ̃ jíjɔ̃ dǝ̀jí càgbǝ Títò yə́ jijɔ ta, ɖó yə́ gbɔngbɔn xɔ fafá tó mian wo séé jí. ¹⁴ Ɖó nə́ ŋ có mí sə́ ɖə́ àbɔ̃ á, ŋkpɛn ŋ' ɖibrə́ ŋ ò. Tóvò a, sigbǝ núsíanú kǝ mí nú nə́ mí an nyí àdòdó á, míán ɖə́ki dódó déèji nə́ mí lǝ Títò gbɔ̃á zun ŋ'táŋ'tá. ¹⁵ Yə́ rɔnrɔn nə́ mí gbǝ gánŋ'gán kə́, nə́ í ɖoŋun míán mǝ bubu í sigbǝ mi xɔɛ dó kídə́ vɔ̃nvɔ̃n kídə́ hùn hùn tìtìtì. ¹⁶ Ǝ́lǝ víví ŋ` dóŋ kádə́ mian jí sùgbɔ.