¹ Kǝ ì nyìbə́ mí lǝ wɔ̃dɔ də́ǝ̀dua, mílǝ bíɔ̃ bə́ míŋ' kú xɔ Mawu yə́ mǝnúvə́və́ gbàale ò. ² Ɖó ə́lǝ núbə́ :«Gàxòxò və́və́ɖə́á mǝán, ŋɖóòtó wo, í lǝ ɖǝ̀ɖǝ̀ kpɔ̃kpɔ̃ yə́ ŋkǝkǝ jíá, ŋ kpə́də́ ǝŋúwo.» Kpɔ gàxòxò və́və́ɖə́á kǝ̀, ɖǝ̀ɖǝ̀ kpɔ̃kpɔ̃ yə́ŋkǝkǝa kǝ̀, ³ míŋ' lǝ cɔ̃ àfɔkrǝnú ɖə́kɛn də́ ŋkɔ nə́mí ò, ɖó míŋ' jí bə́ wóá ɖìgbɔ̃ míán dɔ̃ú ò. ⁴ Í vɔ̃à, lǝ mɔ̃síamɔ̃ nù, mí ɖǝ díìsá bə́ mí nyí Mawu yə́ dɔcɔ̃ví ŋtáŋtá, lə́ vǝ̀və́ də́də́ ǝnú mǝ, lǝ ramǝ kúkú mǝ, lǝ gbɔ̃jɔ̃gbɔ̃jɔ̃ mǝ, lǝ dòdókpɔ̃ wó mǝ, lǝ amǝxoxo mǝ, ⁵ lǝ amǝ lə́lə́tú wómə́, lǝ còcódə́ amǝ ŋún wó mǝ, lǝ ǝ̀dɔ sɛnŋún sɛnŋún wó mǝ, lǝ ǝ̀zàndó madɔ̃n arɔn wó mǝ, lǝ fifə́ mǝ, ⁶ lǝ kɔ̃kɔ̃ nyí nyí mǝ, lǝ ǝnúnyányán mǝ, lǝ jìgbɔ̃ngbɔ̃n blɛù mǝ, lǝ amǝ wɔwɔ mǝ, lǝ gbɔ̃ngbɔ̃n kɔ̃kɔ̃ mǝ, lǝ rɔ̃nrɔ̃n ŋ'táŋ'tá mǝ. ⁷ Mí nyí yə́ dɔcɔví wó lǝ ǝnyɔdodóá mǝ, lǝ Mawu yə́ ŋúnsɛn mǝ, lǝ ǝ̀sə́jí yǝ huawɔnúwó wɔwɔɖɛ mǝ nǝ alɔɖunu kídə́ alɔmíɔn. ⁸ Mí lǝ wɔ̃dɔ lǝ dòdóɖə́ǝ̀jí mǝ kídə́ ŋunkpɛn mǝ, lǝ amǝnyɔn vɔ̃ɛn núnú mǝ í kídǝ kàfùkáfú mǝ. Wó nú də́ míán ŋún bə́ mí nyí amǝ brǝtɔ̃wó vɔ̃à gànŋkə́ mí nyí àdòdó nútɔ̃ wó. ⁹ Mí wɔ̃nǝ̀ dɔ sigbǝ amǝ manyán-manyán wó ǝnə́, vɔ̃à wó dǝsi mí dín; sigbǝ amǝ kǝlǝ kú wó ǝnə́ vɔ̃à mílǝ àgbǝ̀; sigbǝ amǝ kǝ wó dɔ̃ntó nə́ wó ǝnə́ càgbǝ míán núvɔ̃ɛn wó tɔ kǝ wóŋ' còkúƒiɔ nóó ǝnə́. ¹⁰ Milǝ wɔ̃dɔkídə́ ramǝ kúkú vɔ̃à lǝ jìjɔ̃ mǝ gàsíágàmǝ̀; sigbǝ wɔamǝnɔn wó ǝnə́ vɔ̃à mí wɔ amǝ súgbɔ̃ nyí hɔ̃tɔ̃nɔn, sigbǝ amǝ ma wɔnú ɖɛ tɔ̃wó ǝnə́ vɔ̃à mí wɔ̃nú wó kə́únkə́ún ɖɛ. ¹¹ Kòrɛntítɔ̃ wó, mí nú àdòdó wó sééé nə́mí, í míán jí wó hunɖɛ gánŋgán. ¹² Ŋ nyí míán wó í tú míán jí wó ò, vɔ̃à mían ŋ'táwó í xáxá lǝ mían ɖə́kiwó mǝ tó mían ŋ'táwó sǝsǝ lǝ ranmǝ jí. ¹³ Ífia, lǝ̀ ɖɔ̃rìɖɔ̃rì ŋtáŋtá mǝán,( ŋlǝ xonu sigbǝ ɖóɖá ɖǝ̀vìwó ǝnə́) mí hun mian ji wó gánŋgán. ¹⁴ Míŋ' ká wɔ ɖǝ̀ká kidə́ amǝ ma xɔsa wó ò. Ɖó, ɖǝ̀ká wɔwɔ kǝə́ lǝ ǝnú jɔjɔ wɔwɔ kídə́ ǝnú majɔmajɔ wɔwɔ mǝ? Í ǝ̀kadódó kǝə́ lǝ ǝnú kɔkɔ kídə́ zùubru domǝ? ¹⁵ Ɖǝ̀ká wɔwɔ kǝə́ lǝ Bélial kídə́ Kristo domǝ? ¹⁶ Ǝnú wɔ də́ǝ̀du kǝə́ lǝ amǝ maxɔsǝ kídə́ amǝ kǝ xɔsǝ domǝ? Ɖǝ̀ká wɔwɔ kǝə́ lǝ Mawu yə́ ɖǝxoxo kídə́ vòdúwó domǝ? Ɖó mí nyí Mawu lǝàgbǝ̀yə́ ɖǝxoxo, sigbǝ Mawu nú bə́: «màán nɔn womǝ, í màán zɔn lǝ wó doŋdomǝ; màán nyí wó Mawu, í wóá nyí ǝ̀vinyǝ wó. ¹⁷ Càgbǝ ŋna tɔ: mí do lǝ wó mǝ, í mian má.» Áxótɔ̃ í núi: «Miŋ' káa tɔ̃alɔ ǝnú kǝ ŋ'kɔa ò, í màán xɔmi, ¹⁸ Màán nyí dàdà nǝmi, í míán nyí ǝ̀vìwó ŋ», Àxótɔ̃ ŋúnsɛntɔ̃ í núi.