¹ Ŋjí bə́ mian xɔ cukú ɖòó lǝ tiŋ' kónŋta mǝ. Vɔ̃à milǝ xɔŋ ŋtáŋtá. ² Ɖóá ŋlǝ huanŋún də́ mian nu. Ŋwɔ Mawu yə́ ŋúnhuan ɖɛ nə́mi, ɖó ŋcɔ̃ àgɔ̃ mí nə́ ŋúncu ɖə́ká. Ŋdə́ǝ̀zǝ̀ bə́ mán cɔ̃mi díìsá nə́ Kristo sigbǝ amǝ lǝ alɔjí ŋtáŋtá ³ Vɔ̃à ŋlǝ vɔ̃nvɔ̃n nə́mi də́ ɖǝ̀kárɔkpa, sigbǝnə́ ǝ̀dàn brǝ Évà tó yə́ yǝ wɔ wɔ mǝ ǝnə́, mian tamǝ bubu wó .Ŋkáa trɔ̃ lǝ Kristo yə́ nyɔn və́və́ kǝ nyí ǝ̀cimatɔ̃á yə́ yomǝ ò. ⁴ Míán cɔ̃ɛ bə́ amǝɖə́ vá lǝ nú Yesu bu yə́ nyɔ nə́mi sə́ wú Yesu kǝ yə́ nyɔ mí nú nə́ mí ǝnə́. Nɔ̃nmí míán cɔ̃ɛ bə́ milǝ xɔ gbɔ̃ngbɔ̃n kǝ tóvò nǝ kǝ mí xɔa. Nɔ̃nmi míán gbǝ cɔ̃ɛ bə́ mi xɔ Mawu ǝnə́, nyɔn bú kǝ tóvò nǝ kǝ míxɔa. Mí lǝ dɔ̃n ǝnú ŋuna wójí kə́kə́. ⁵ Hùun, ŋ lǝ bui bə́ nyǝ ŋ' nyín gɔ̃mǝ̀ nɔntɔ̃ nə́ amǝ kǝ wó bui bə́ wó nyí Yesu yə́ dɔ̃kprávi nyɔ̃nŋgbian wó. ⁶ Vɔ̃à nə́ nyǝŋ' nyányɔn dòó cáaá, ə́ɖi Mawu nyɔn yá ŋ nyɛɛn. Lǝ núsíanú mǝ kídə́ nɔ̃nɔ̃nmǝ̀ ɖǝ̀síàɖǝ mǝán, mí ná mi ⁷ Kǝŋ bubɔ ɖǝ̀ǝɖkinyǝ bə́ má dóo də́ǝ̀jí ɖə́ǝ ŋjagɔ̃ia? Ɖó ŋ nú Mawu nyɔn nə́ mí fàà. ⁸ Ŋfi Mawu há ɖóo í cɔ̃ wó kpǝkpə́də́ amǝŋún sə́ wɔ nə́ mi. Kǝ ŋ lǝ hìnyán mǝ lǝ mian domǝ án, nyǝ ŋ'nyín àgbàn nǝ amǝ ɖə́kɛn ò. ⁹ Ɖó nɔnví Màkèdónì tɔ̃wó í wɔnǝ tiŋ' hínyán wó. Lǝ núsíanú mǝán, nyǝŋ' jí bə́ mán nyín àgbàn nǝmi ò, í mán lǝ wɔɛ nyɛɛn ǝnə́ tɛgbɛɛ. ¹⁰ Sigbǝ Kristo yə́ nyɔn dodó lǝ mǝnyǝán, wó ŋ'káa jí amǝ dódó də́ǝ̀ji də́kpin lǝ Àcáyi nútowó mǝ ò. ¹¹ Í càgbǝ núkeé tɔ? Nyǝŋ' rɔn míán nyɔngbɔ̃ íà? Mawu nyɛɛn. ¹² Í ǝnú kǝ ŋlǝ wɔa ɖə́ǝ, màán yijí í lǝ wɔɛà, càgbǝ má ɖǝ tiŋ' kakádə́jí jíi bə́ wá xonu có ǝŋũnyǝàn kídə́ kakádə́jí càgbǝ kǝ wá kɔ̃ wó ɖə́ki wó də́ǝjìá ( càgbǝ wóá cɔ̃ wó sigbǝ ǝ̀dɔ ɖə́ká wɔtɔ̃ kídə́mí ǝnə́). ¹³ Ɖó amǝ ŋnan wó mɔnkúí wó nyín Yesu yə́ vixo yə́ núkprátɔ̃wó, ǝ̀dɔ wɔtɔ̃ kǝ brǝnǝ amǝ wó. Wó cɔ̃nə́ wó ɖə́ki wó trɔ̃nə́ Yesu yə́ Póstòló wó. ¹⁴ Í ŋ'fíán ò, dó sátànà ŋtá trɔ̃nə́ zun dɔ̃lá kɔkɔ. ¹⁵ Ŋ nyí ǝnú fíán mǝ gánŋgán ɖə́ í ò nə́ yə́ súbɔ̃víwó cá lǝ trɔ̃ zun súbɔ̃ví dodó wó. Wó vɔvɔmǝ ácó wódɔ̃ wɔwɔ wó gbe. ¹⁶ Ŋtrɔ̃ lǝ núi, amǝɖə́ ŋkáa bui bə́ yiŋ' tagbɔ̃ ŋlǝ wɔ̃dɔ ò, vɔ̃à nə́ ì nyin ǝnə́án, mí xɔŋ sigbǝ amǝ ma wɔ̃tagbɔ̃ɖɛ ǝnə́ càgbǝ mán tə́ŋ' dó ɖǝ̀ǝkinya də́ǝ̀ji hɔɛɖə́ká. ¹⁷ Ǝnú kǝ ŋ lǝ nú də́ kàkádə́jí kǝ dòdó də́ǝ̀ji lǝ̀mǝ̀ ŋúán, Axótɔ̃á ŋ' sə́ kǝò, vɔ̃à ŋlǝ xonu sigbǝ amǝ ma wɔ̃ tagbɔ̃ɖɛ ǝnə́. ¹⁸ Ɖó amǝ sùgbɔ dónə́ ɖǝ̀ǝkia də́ǝ̀jí càgbǝ ŋúntíran tɔ, nyǝ cá mán dó ɖǝ̀ǝkinyǝ də́ǝ̀ji. ¹⁹ Ɖóá mixɔnǝ amǝ ma wɔ̃ tagbɔ̃ɖɛ wó kídə́ jìjɔ̃. Mian ŋtáwó mi cin lǝ ŋunú nyányán mǝ. ²⁰ Ɖó mixɔnǝ amǝ kǝ cɔ̃nə́ mi, sə́ wɔnǝ yə́ mǝ xǝxǝrǝ, nə́ ìlǝ zán mi, nə́ ìlǝ kpɔ̃ bə́ yǝ wúugan mí, nɔ̃mí nə́ ìlǝ xòtómǝ nə́mi. ²¹ Ǝŋun lǝ kpɛnŋ bə́ má nú bə́ mi nyín amǝ gbɔ̃jɔ̃ wó sùgbɔ bə́ míán wɔnə́. ɛɛɛn, nə́ amǝ ɖə́ lǝ kíkə́ ɖǝ̀ǝkia də́ǝ̀ji (ŋlǝ xonu sigbǝ cukúnɔn ǝnə́), nyǝcá màán kíkə́ ɖǝ̀ǝkinyǝ də́ǝ̀ji. ²² Wó nyí Hébrùì tɔ̃wó íà? Nyɛn cá. Wó nyín Ísràɛl vì wóà? Nyɛn cá. Wó nyín Abràhàm yə́ jijimǝ ví wóà? Nyɛn cá. ²³ Wó nyín Kristo yə́ súbɔ̃ví wóà? (Ŋlǝ xonu sigbǝ amǝ ma wɔ̃ tagbɔ̃ɖɛ ǝnə́.) Ŋnyíi sə́ wú. Ŋ nɔn ǝ̀dɔ sɛɛnŋún- sɛɛnŋún wó mǝ, lǝ gàkpáwó sùgbɔ mǝ, lǝ xòxò kǝ tóŋún dí wó mǝ, í ŋdónə́ǝ̀go ǝ̀kú fɔkú sùgbɔ. ²⁴ Lǝ Yúdà tɔ̃wó gbɔ̃á, ŋxɔ «Hòoka ə́di dǝ̀ká wó.» Zǝ̀àtɔ̃n . ²⁵ Wó xɔŋ zǝ̀tɔn kídə́ àtí. Wó dàkpə́ŋ zǝ̀ɖǝ̀ká. Ŋbú kídə́ tɔjí hún zǝ̀tɔn. Ŋwɔ ǝ̀zan ɖə́ká kídə́ ŋkǝkǝ ɖə́ká lǝ àxu yə́ doŋdomǝ. ²⁶ Ŋwɔ mɔ̃nzɔnzɔn wó də́nu, ŋ nɔn àfɔkú mǝ lə́ ciwó mǝ, lǝ àfɔkú mǝ tó frafitɔ̃wó jí, lǝ àfɔkú mǝ tó nyǝ ŋtá yə́ dumǝ tɔ̃wó jí, lǝ àfɔkú mǝ tó amǝ ma xɔsǝ tɔ̃wó jí, lǝ àfɔkú mǝ lǝ dùgan mǝ, lǝ áƒɔkú mǝ lǝ zògbǝ̀ nyígbán jí, lǝ àfɔkú mǝ lǝ àxu jí, lǝ àfɔkú mǝ tó vìxò nɔnví wó jí. ²⁷ Ŋtó ǝ̀dɔ̃ sɛɛnŋún- sɛɛnŋún kídə́ ayaɖuɖuwó mǝ, í lǝ ǝ̀zan sùgbɔmǝ arɔn mandón- mandón, lǝ fifé kídə́ cikɔmǝ mǝ , gàsíágàmǝ̀ lǝ nubábrá mǝ , lǝ vùvɔ̃ kídə́ amán- amán nɔnɔn mǝ . ²⁸ Í, lǝ ŋunan wó sééé ŋgbə́á ŋkǝŋkǝ wó zínnə́ də́ǝ̀jinyǝ nə́ tiŋ jiɖǝɖǝ də́ Mawu ha ɖǝ̀síàɖǝ ŋún. ²⁹ Mɛɛn í gbɔ̃jɔ̃, í ŋ'nyín nyǝ ò? Mɛɛn tutu amǝ bú də́ ǝnúvɔ̃ɛn mǝ, í nyǝ ŋ'tɔ̃ɛ zò ò? ³⁰ Nə́ ŋɖóá kɔ̃ ɖə́ǝ̀kinyǝ də́ǝ̀jiá, màán vá kɔ̃ ɖə́ǝ̀kinyǝ də́ǝ̀ji càgbǝ tiŋ' gbɔjɔgbɔ̃jɔ̃ wó ta. ³¹ Mawu kǝ nyín dàdà nǝ Àxótɔ̃ Yesu Kristo, amǝ kǝ wó dó də́ǝ̀ji sə́ yi mavɔa, nyán bə́ nyǝ ŋ' lǝ xovì ò. ³² Lǝ̀ Dàmásì a, ǝ̀fiɔ Arétas yə́ du dɔ̃ nu nɔn tɔ̃ nán wó lǝ cɔ̃ Dàmàsìtɔ̃ wó dua càgbǝ nə́ wá lə́ŋ. ³³ Vɔ̃à wó cɔ̃ŋ də́ kisi ɖə́ká mǝ í ɖiŋ tó fɛtɛri nu lǝ ǝ̀grì gɔmǝ, í ŋ ɖǝ lǝ yə́ sí wó mǝ.