¹ Ǝnyǝ, pɔ̃lù, ŋlǝ kpráanú mí, tó Kristo yə́ ɖə́ki bubɔ kídə́ yə́ ɖɔnmǝ fáfá jí. Ŋnyínə́ amǝfáfá nə́ ŋlɛ kídə́ mí, vɔ̃à ŋwɔnǝ càncàn də́ mian ŋún nə́ ŋ diŋdin də́mi. ² Ŋɖǝnǝ kúkú nə́mi, nə́ ŋlɛ ɖɛ lǝ mian domǝ, nyǝ ŋ ɖólá hínyán ŋúnsɛn dódó kàkádéjí tɔ ò. Vɔ̃à ŋ bui bə́ nàán vá hínyán bə́ wóá dó ŋúnsɛn nə́ ŋ də́ ŋkɔ amǝ kǝ lǝ bui bə́ mí lǝ nɔn àgbǝ̀ lǝ ŋúntíranmǝ wó. ³ Kǝ̀ǝ̀ nyìbə́ mílǝ zɔn lǝ ŋúntíranmǝ íá, míŋ ɖólá wɔ àhùà lǝ ŋúntíranmǝ ò. ⁴ Ɖó àhùàwɔnú kǝ mí sə́lǝ wɔ ahuaa ŋ'nyín ŋúntírantɔ í ò. Kə́, wó wɔ Mawu yə́ ŋúnsɛn ɖə́káɖɛ bə́ wá sə́ crɔ̃n gbɔ̃ngbɔ̃n mǝ ŋúnsɛn gánŋ'gan wó. Wó kpɔ̃nə́ ǝ̀gàn ɖə́ vìxò nyɔn dadə́ ŋkɔwó jí. ⁵ Mílǝ crɔ̃n ŋúnsɛn ɖə́síàɖǝ kǝ cónə́ də́ Mawu nyányán ŋún cá. Mí cɔ̃nə́ tamǝ bubu ɖǝ̀síàɖǝ kǝ á có də́ Kristo yə́ bubu ŋúán. ⁶ Í mí sɔgbǝ̀ bǝ míán dɔ̃ntó nə́ amǝ mabu yə́ nú wɔwɔ ɖǝ̀síàɖǝ kpɔ̃ wó, zǝ̀ɖǝ̀ká nə́ míán mǝbubua nyɔ̃n séé. ⁷ Mí kpɔ̃ ŋunú nyɔ̃nŋgbín krékré có ǝnú kǝ lǝ ŋkɔ nə́ mian ŋún. Nə́ amǝɖə́ nyɛɛn bə́ yǝ lɛ nə́ Kristo a, ná ɖó ŋuín bə́ kǝ yǝ lɛ nə́ Kristo a, míán cáwó mí lɛ nyɛɛn. ⁸ Ɖó nə́ í gbǝ nyín bə́ ŋ dónə́ ɖǝ̀ǝkinyǝ də́ǝ̀ji hɔɛɖə́ká ɖóɖo có míán cɛ kpakpa, kǝ míán xótɔ̃ námí bə́ míán sə́ tu mí ɖóá í ŋ'kàá nyín nə́ míán sə́ crɔ̃n mí ò a, nyǝ ŋ'kàá ɖu ŋunkpɛn ò. ⁹ Nyǝ ŋ' lǝ jí bə́ inan ná nɔn sigbǝ bə́ ŋlǝ zín də́ mian jí tó tíŋ' nú ŋɔŋrɔn wó ŋún ò. ¹⁰ Ɖó amǝ ɖǝ wó lǝ nú bə́: «wéma wránɖíɖá ina wó lǝ və́və́ɖə́ í kpɔɔ̃gan . Vɔ̃à lǝ gòtàa, ə́ nyín gbɔ̃jɔ̃gbɔ̃jɔ̃tɔ í yə́ nyɔn wó ŋ' jǝ bə́ wóá sǝ ò.» ¹¹ Kə́ amǝ ŋuna wó mɔnkúí ná lǝ sǝ ǝnú kǝ mí nú də́ míán wéma kǝ mí ŋrɔn ɖíɖá wó gɔmǝ kǝ mí ŋ'lɛ cáò ,ǝnú ŋnan í míán wɔ kǝ mí lɛa. ¹² Mí ŋ'yi bə́ wá wɔ mí də́ ɖòɖó nu nɔ̃nmí wá cɔ̃ mí sə́ sɔ kídə́ amǝ kǝ kánə́fú wóɖə́ki wó ò. Vɔ̃à nə́ wó lǝ cɔ̃ amǝɖə́ jrə́ də́ amǝ ɖèá ŋún í lǝ cɔ̃ amǝ ɖə́ sɔ kídə́ amǝ ɖǝ̀áá, wóŋ' wɔ ŋunúnyányán ɖɛ ò. ¹³ Gàsíágàmǝ̀ an, mí ná lǝ kíkə́ míán ɖə́kiwó də́ǝ̀ji zɛn lǝŋún ò. Tóvò nǝ ŋuna án, míán nɔn ríxo kǝjí Mawu cɔ̃ mí dóá, ríxo kǝ diŋdin bóó də́ míán. ¹⁴ Cáá, mí ŋ' yi míán rího wó ŋgbə́ ò, kǝ mí kǝdə́ mian ŋúán. Mí nyín amǝ kə́lə́kə́lə́ tɔwó í vá kǝ dinŋdin də́ mí í kǝmí wɔ Kristo yə́ nyɔn dɛá. ¹⁵ Míŋ' dó míán ɖə́kiwó də́ǝ̀ji tó ríxoa ŋún có amǝ ɖǝ̀áwó dɔŋún ò. Tóvòà, kǝ í nyì bə́ míán xɔsǝ lǝ cin də́jíá, mí lǝ kpɔ̃ɔmɔn, míán ŋtáwó bo dɔ̃ lǝ kǝkǝ də́jí í lá gbǝ nɔn yə́ ŋtáŋtá yə́ ríxowó mǝ. ¹⁶ Mí lǝ nɔ̃nta kpɔ̃ ŋna càgbǝ míán tə́ŋún lǝ kaka Mawu nyɔn nə́ ə́gbǝ nyí nútomǝ kǝ lǝ àkpáɖə́ká nə́ mí ò. Mí ná vá lǝ dó míán ɖə́kiwó də́ǝ̀ji də́ ǝ̀dɔ kǝ mí wɔ lǝ amǝbúwó nyígbánjí. ¹⁷ «Vɔ̃ nə́ amǝ kǝ á dó ɖǝ̀ǝkia də́ǝ̀ji, ná dó ɖǝ̀ǝkia də́ǝ̀ji lǝ Axótɔ̃á mǝ.» ¹⁸ Ɖó ŋ'nyí amǝ kǝ lǝ dɔɔ̃dɔ ɖǝ̀ǝkia í wó dókpɔ̃ ò. Gànŋkə́, yéé nyí amǝ kǝ Axótɔ̃á lǝ dɔ̃á.