¹ David tɔ. Yehowa, ŋle luvɔn tsinye doɔ ɖoɖa gbɔwò. ² Mawunye! ŋsɔ kaka ɖodji tsinye le nanaɔ: ŋkpɛn ŋgbe nyi tonyeo! Ne ketenyewo wóakpɔ djidjiɛ le ŋtsi nyeo! ³ Amɛyiwo ɖonu ɖeŋtsiwòa, ŋde kpɔnɔ ŋkpɛn o; voa ŋkpɛn nyi nɔn amɛyiwo trɔ le axo yomɛ le wóŋtɔ dodronu. ⁴ Yehowa! Na madjesi emɔ towòwo, fiaŋu afɔ-toxoe towòwo. ⁵ Kplɔŋu le axo nyawototomɛ, yi fiaŋu nu; ɖoa wòenyi ɖeɖekpɔkpɔ nye be Mawu, onyi nutexoewatɔ yi ɖaaa. ⁶ Yehowa! ɖoŋku axo nublanyuikpɔkpɔ kudo axo nunyuiwawa; ɖoa wóle yi ɖaaa. ⁷ Ŋgbe ɖoŋku sɔhɛnye mɛ yo vodadao alo nuvlo kpɔ nublanyui nu to axo nuzizikuku mɛ, to axo nunyuiwawa me, Yehowa! ⁸ Yehowa nyɔn yi le djɔdjɔɛ: yintsi efiɔnɔn yo emɔ nuvoɛnwatowo. ⁹ Ékplɔnɔn amɛbɔbɔɛwo le djɔdjɔɛnyenyɛ mɛ, éfiɔnɔnwó yo mɔ. ¹⁰ Yehowa yo mɔwo kpata nyi nuzizikuku kudo nutexoewawa, ne amɛyiwo le yo kadodo kudo eseawo mɛ ɖoasi. ¹¹ Ô Yehowa! to ŋkɔ towòadji, yi osɔnɔ mia nuvoɛn kenɔn mi ɖoa ŋkɔtowòalɔ lolo. ¹² Amɛde yi vɔvɔn Yehowa? Yehowa ɖenɔn yo mɔ yi lasɔa fiɔɛn. ¹³ Luvɔn yitɔ kpɔnɔ gbɔnɖomɛ le djɔgbenyui me. Yi yío djidjimɛ laxɔ djua lɔ. ¹⁴ Yehowa yo xolondjedje nyi amɛyiwo vɔni tɔɔ, yi yío kadodo nanɔn nukplan amɛngan. ¹⁵ Ŋtrɔ ŋkunyawo kpata ɖoɖa Yehowa gbɔ, ɖoa élaɖe afɔnyewo lé eɖɔ mɛ. ¹⁶ Kpɔŋu ɖoa yi nakpɔ nuzizi nu, ɖoa ŋtsin akogo yi ŋdo ɖo kpeɖonutɔ o. ¹⁷ Edji tsinye yo vevesesewo le gan wuɔŋu; ɖeŋu tole emɛ. ¹⁸ Kpɔ ayaɖuɖunye kudo fukpekpe tsinye ɖoa, yi nasɔ nuvoɛn tonyewo kpata keŋu. ¹⁹ Kplɔleyi ketenyewo sugbɔ ɖoa, yi nakpɔ nugnagnra baɖa yi ɖoɔ wóle ɖo ŋtsinye. ²⁰ Kpɔ luvɔn tsinye ta yi naɖeŋu! Ne nyegbe tsaka ɖoa ŋle xɔnamɛtɔ djiɔ so gbɔwò! ²¹ Ɖemanyamanyan kudo djɔdjɔnɔnɔ ne kpɔ tanu ɖoa ŋsɔ mɔnukpɔkpɔ tsinye daɖo djiò. ²² Ô Mawu! ɖe Izraɛl le yo vevesesewo kpata keŋkeŋ mɛ.