¹ Miŋdawɔ legbaviwo nɛ miaɖokoe O, miŋdawɔ atsikpakpa alo axoeli ɖekpe nɛ miaɖokoe O, yi miŋda sɔ ekpekpakpa tsinɛ wolado atsan vovovowo ɖo mia dumɛɔn, benɛ miado eta gun nii O; ɖo enyɛ yinyi Yehowa, mia Mawu. ² Milawɔɖo axĩn sabbatiwo dji, yi vɔnvɔn nɛnɔn axĩn kɔkɔxoea ŋtsi. Enyɛ yinyi Yehowa. ³ Nɛ mikplɔ axĩn sewo do , yi mile axĩn sedodowo mɛ ɖo alɔmɛ yi miwɔɖo wo dji lɔ, ⁴ nanan edji ladja nɛmi ɖo yo gamɛ, anyigban lanan nukuwo lawɔ, yi atsiku sɛnsɛnwo lasɛn ekuwo. ⁵ zeɖeka tsinɛ milanɔn yovowɔku ɖeɔ sɔdo avamɛ lɔ, milaɖe vinkusɛnsɛn, yi vinkusɛnsɛn ɖeɖe layiɖo nukudodo mɛ; milaɖo akpɔnɔn xodo laɖɔ mi, yi milanɔn mia anyigban dji vɔnvɔn maɖotɔ. ⁶ Nanan ŋtsifafa lanɔn eduamɛ, yi amɛɖekpe ŋda gble mia alɔnwo mɛɔn; naɖe elanwuadanwo ɖoɖa le duamɛ, yi adekpe ŋdato mia dumɛɔn. ⁷ Milakplɔ mia fuŋtɔwo do, yi wolatsi adekpe nu mia ŋkɔ. ⁸ Amɛ amatɔn lakplɔ amɛ kavetakpo do, yi kavetakpo lakplɔ kotokun ɖeka do, yi mia fuŋtɔwo ladjan anyi le mia dekpe ŋkɔ. ⁹ Natrɔ ɖo mia ŋtsi, nanan mila dji yi mila sugbɔ ɖodji, yi nale axĩn nublabla mɛ ɖo alɔmɛ kudo mi. ¹⁰ Milaɖu nukuɖeɖe xoxowo, yi milaɖe xoxoawo to laɖɔli kudo yeyewo. ¹¹ Nanan axĩn nɔnxoe lanɔn miadomɛ, yi nyɛŋda nyan mi O. ¹² Nazɔn le mia domɛ, nanyi mia Mawu, yi milanyi axĩn dukɔn. ¹³ Enyɛ yinyi Yehowa, mia Mawu, tsinɛ ɖemi sɔso Egipti dumɛ, tsinɛ kplɔmi sɔso kluvinyɛnyɛ mɛ; ŋgban agban ɖoɖa le mia tadji, yi ŋnan mikɔ eta yidji tsinɛ mile zɔnzɔnkɔ. ¹⁴ Vɔ nɛ miŋde ɖo eto O, yi migbe etoɖoɖo dɔdasi tsɛwo, yi migbewo dji wɔwɔ lɔ, ¹⁵ nɛ mitsri axĩn sewo, yi mia luvɔn tsri axĩn ɖoɖowo, benɛ migbe axĩn dɔdeasiwo wɔwɔ yi miso axĩn nublablalɔ lɔ, ¹⁶ enutsinɛ nawɔ kudo mi ke. Nanan nunyranyranwo lava miadji, edɔwo tsinɛ ŋda gbɔndjio, tsikesi djĩĩn, tsinɛ lanan mia ŋkumɛwo laɖiku kudo mia luvɔn lakpe efun; milado mia nukuwo dokpo : mia funtɔwo lava ɖewo. ¹⁷ Natrɔ axĩn ŋkumɛ do mi, yi mia funtɔwo laɖu mia dji; amɛtsiwo tsri mia nyangbɔwo lakpɔ ŋsɛn ɖo mia dji, yi mila si tsinɛ woŋda kplɔ miado O. ¹⁸ Nɛ tovonɛ xɔn, migbe eto ɖoɖo ŋlɔ, nagbe xomi ze anŋdrɛ sɔwu ɖo mia nuvuinwo ta. ¹⁹ Nagban mia ŋsɛn yo dada, nanan mia anyigban lanɔn sigbebe gakpo nɛnɛ, yi mia nyigban lanɔn sigbebe gadjĩn nɛnɛ. ²⁰ Mia ŋsɛn lavɔ gbagbalo, mia nyigban ŋda nan enuwo O, yi atsikusɛnsɛn ŋda nan wo kusɛnsɛnwo O. ²¹ Nɛ milikɔmɛ yi migbe eto ɖoɖo ŋlɔ, nagbexo mi ze anŋdrɛ sɔwu ɖo mia nuvuinwo ta. ²² Nanan elanwuadanwo lava mia dji, tsinɛwo lawu mia viwo, tsiwo laɖu mia axomɛlanwo kudo lanan viɖe kpoyi lakpɔtɔ nɛmi; yi mia mɔnwo laɖɔ egbe. ²³ Nɛ etodɔn tsɛwo ŋde nan mitrɔ Ɔ, yi milikɔmɛ lɔ, ²⁴ nyɛtsan nalikɔmɛ yi naxo mi ze anŋdrɛ sɔwu ɖo mia nuvuinwo ta. ²⁵ Nanan adekpe lava mia dji, benɛ mabiɔ ehlɔn mi ɖo axĩn nublabla ŋtsi; nɛ mibɔɖo mia duganwomɛ lɔ, nanan edɔvuin sɔva mia domɛ, yi milatsi mia funtɔwo lɔwomɛ. ²⁶ Nɛ ŋgble mia kpɔnɔn domɛ lɔ, nyɔnu amɛwo lamɛ akpɔnɔn le adokpo ɖeka dji nɛ mi yi wolahɛn akpɔnɔn viɖe sɔva nɛmi; milaɖuii, ganke xodo ŋda ɖɔ mi O. ²⁷ Nɛ, tovonɛ eyɛ, migbe eto ɖoɖo ŋ yi milikɔmɛ lɔ, ²⁸ nyɛtsan nasoɖo miaŋtsi , nado dɔmɛzoe yi naxo mi ze anŋdrɛ sɔwu ɖo mia nuvuinwo ta. ²⁹ Milaɖu mia vi nusuviwo yo lan kudo mia vi nyɔnuviwo yo lan. ³⁰ Nagban mia vɔsakpewo, nagban mia atsikpakpawo tsinɛ miwɔ nɛ ewoe, nanan milada mia amɛkukuwo ɖo mia legbaviwo dji, yi milanyi enunyɔnu nuŋ. ³¹ Nagban mia duwo wolatrɔzun glikpo, nakankan mia kɔkɔɛxoewo lazun axoedo, yi nyɛŋde gba kpɔ djidjɔ le mia lĩnfĩnwo ŋtsi O. ³² Nakankan edua, yi mia funtɔwo tsinɛ le edjiwo ŋda kanɖo edji O. ³³ Nakankan mi ɖo dukɔnwo domɛ yi nada adekpe domi. Mia du lagban, yi mia duganwo lanɔn xluxlu. ³⁴ Sɔyidji anyigban lakpɔ gbɔdjɔɛ, le gatsimɛwo kpata yilanyi zogbemɛ , yi milanɔn mia funtɔwo yo dumɛ lɔ; edua laɖiɖo mɛ, yilakpɔ gbɔdjɔɛ. ³⁵ Gaxoxo tsimɛ yilagban lɔ, gbɔdjɔɛ lanɔn anyi, tsine ŋde nɔn anyi le sabbitiwo mɛ, le gatsimɛ yi minɔn emɛɔn. ³⁶ Nagbɔdjɔ amɛtsiwo lakpɔtɔ tsi miadomɛ, le wo funtɔwo domɛ; amakpa xuxu yo gbeɖiɖi lanan wola xudu; wolasi sigbebe letsi wosinɔn le adekpe yo ŋkɔ nɛnɛ, yi woladje anyi tsinɛ amɛɖe ŋde dja kplɔwo O. ³⁷ Wolalɔ wonɔnɔnwo ladje anyi sigbebe letsi wodjenɔn anyi le adekpe nu nɛnɛ, tsinɛ amɛɖekpe ŋde dja kplɔwo do O. Miŋda tɛnŋ nɔte ɖo mia funtɔwo yo ŋkɔ; ³⁸ milatsrɔn le dukɔnwo domɛ, yi mia funtɔwo yo du lami miiŋ. ³⁹ Amɛtsiwo lakpɔtɔ le mia domɛwo laku ɖo wo nuvuinwo ta, le mia funtɔwo yo dumɛ; wolatsrɔn le wo tɔwo yo nuvuinwo ta. ⁴⁰ Wolahun wo nuvuinwo kudo yo tɔwo tɔ mɛ, le wo vodadawo tsinɛ wowɔ le ŋtsinyɛ, kudo ekɔ tsinɛ wolia ɖo ŋtsinyɛ, ⁴¹ nuvuin tsinɛ ŋtsi nyɛtsan nasoɖo wo ŋtsi ɖo, le gatsimɛ yi nakplɔwo sɔyi wo funtɔwo yo dumɛ ɖo. Yi wo dji masomaso nɛ bɔbɔ, yi wolatu efĩn ɖo wo nuvuiwo ta. ⁴² Naɖo ŋku Yakɔbo yo nublabla dji, naɖo ŋku Izaka yo nublabla dji kudo Abraham yo nublabla dji, yi naɖo ŋkuvi edua dji. ⁴³ Edua latsi tooto ɖo wo ŋtsi, yi elakpɔ gbɔdjɔɛ le gatsimɛ yi wogble daɖɛ; yi wolatu wo nuvuinwo yo efĩn, ɖoŋtsi wotsri axĩn ɖoɖowo yi wo dovlo axĩn sewo. ⁴⁴ Vɔ, gatsimɛ yi wolnɔn wo funtɔwo yo dumɛ lɔ, nyɛ ŋde gba sɔwo sɔdanŋkpɛn ke O, yi wo ŋde gba nyi nunyɔnu nuŋ ke kakabe magbe tsrɔnwo ke O, benɛ maso axĩn nublabla domɛɔn; ɖo enyɛ yinyi Yehowa, wo Mawu. ⁴⁵ Naɖoŋku le ŋzizikumɛ ɖo nublabla xoxoa ŋtsi, stinɛ mɛ ŋɖewo tole Egipti yo dumɛ, le dukɔnwo domɛ, benɛ manyi wo Mawu. Enyɛ yinyi Yehowa. ⁴⁶ Etsɛwo yinyi djidjiwo, ɖoɖowo kodo esewo, tsinɛ Yehowa ɖo le yi kudo Izraɛlviwo domɛ, le Sinaï toa dji , to Mɔse dji nɛ.