¹ Yehowa xonuxo nɛ Mɔse, yinu be: ² Tonɛ Izraɛlviwo be: Nɛ wofian adjɔgbewo lɔ, nɛwonyi amɛgbetɔwo lɔ, wolanyi Yehowa tɔ le axo nukpɔkpɔ nu. ³ Nɛnyi nusuvi tsinɛ ɖo exoe ewui sɔyi katsiwui lɔ, ke axo asixɔxɔ lanyi ega homɛ sekɛl katsiwo; le kɔkɔɛxoea yo sekɛl nu; ⁴ nɛnyi nyɔnu lɔ, axo ga homɛ lanyi sekɛl egban. ⁵ Le exoe atɔn kudo ewui domɛ lɔ, axo nukpɔkpɔ lanyi sekɛl ewui nɛ nusuvi, yi nyɔnuvi lanyi ewo. ⁶ Le woetri ɖeka sɔyi exoe ewo lɔ, axo nukpɔkpɔ lanyi sekɛl atɔn nɛ nusuvi, yi sekɛl etɔn nɛ nyɔnuvi. ⁷ Le exoe katsiwui toŋtsi lɔ, axo nukpɔkpɔ lanyi sekɛl woeatɔn nɛ nusu, yi ewo nɛ nyɔnu. ⁸ Nɛ amɛtsinɛ do ngbea nyi woamɛnɔn kisɛkisɛ le axo nukpɔkpɔ nu lɔ, wolakplɔɛ sɔva nɛ nunɔnla, yi yilakan xomɛa nii, yi nunɔnla lakpɔ ega homɛa le nunɔamɛsi tsinɛ le nusua si. ⁹ Nɛnyi elan tsiwo wolatɛnŋ sɔwɔ avɔsa nɛ Yehowa lɔ, elan ɖekpekpe tsi wolasɔnan Yehowa ɖolanɔn kɔkɔɛ. ¹⁰ Woŋda ɖɔli , kudo wolasɔ baɖa ɖe ɖo enyui texoe looo, alo enyui ɖo baɖa texoe O; nɛ wolaɖɔli elan ɖe kudo eɖe lɔ, woamɛ eveawo ɖolanɔn nyuiɖe. ¹¹ Nɛnyi elan makɔmakɔwo, tsinɛ woŋda tenŋ sɔsa avɔ nɛ Yehowa Olɔ, wolasɔɛ sɔva fiɔn nunɔnla, ¹² tsi lakpɔ yo nɔnɔmɛ be ele nyuiɖe alo baɖa, yi nunɔnla yo nyɔn tsi yilanu dji wola nɔnte ɖo. ¹³ Nɛ wodjibe yaxloe lɔ, wolasɔ yo ga homɛ akpa atɔnlia sɔkpeɖo ŋtsi. ¹⁴ Nɛ amɛɖe kɔ yo axoe ŋtsi lɔ, wolasɔɛ ɖo anyi nɛ Yehowa, nunɔnla lakpɔ homɛ xɔxɔ nii gbɔ, benɛ yakpɔbe enyɔn alo enyran mɛ, yi wola nɔnte ɖo nunɔnla yo nukpɔkpɔ dji. ¹⁵ Nɛ amɛtsinɛ kɔ yo axoea ŋtsi be yagbe xloe lɔ, elasɔ ega homɛ atɔnlia kpeɖo ega ŋtsi, yi yilanyi yitɔ. ¹⁶ Nɛ amɛɖe kɔ yo agble tsinyi yo domɛnyinu ŋtsi nɛ Yehowa lɔ, ke wolado asi nii sɔso nuku tsinɛ yido ɖo edji ŋtsi, sekɛl ga katsiwo ɖo homɛr ɖeka yo nudodo dji. ¹⁷ Nɛnyi aseyesoso yo exoe gɔmɛdjedje dji yikɔ yo agble ŋtsi lɔ, ke nɛnɛdji wolado asi nii ɖo dji nɛ, ¹⁸ nɛnyi aseyesoso yo ŋgbodomɛ yi yikɔ yo agble ŋtsi lɔ, nunɔnla labu exoea sɔkuɖo exoe nɛnɛ tsinɛ kpɔtɔ sɔnan aseyesoso lɔ, yi wolaɖe eho ɖe le ŋtsi kpɔtɔ nii. ¹⁹ Nɛ amɛtsinɛ kɔ yo agblea ŋtsi be yagbetrɔ xloe lɔ, elasɔ ega homɛ atɔnlia kpeɖo ŋtsi, yi agblea latsanyi nii. ²⁰ Nɛ ŋde xloe agblea lɔ olɔ, vɔ wosɔ sa nɛ amɛbu lɔ, ŋde gbanyi xloexloe ke O. ²¹ Yi nɛ agblea ŋtsi vo le aseyesoso gbe lɔ, wolasɔ agble sɔɖo anyi nɛ Yehowa, yi yilatrɔzun nunɔnla yo domɛnyinu. ²² Nɛ amɛɖe kɔ yo agble tsinɛ yixloe ŋtsi nɛ Yehowa , yi ŋde nyi yo texoe olɔ, ²³ nunɔnla labu ega homɛ tsinɛ yilaxɔ, kakasɔnan aseyesoso yo xoea, yi nusua latu ega gbetsigbe wobu ega nii, sigbebe wosɔɛ ɖo anyi ne Yehowa nɛnɛ. ²⁴ Le aseyesoso yo xoea dji lɔ, agblea lagbe trɔyi nɛ amɛtsinɛ si woxloe le, kudo amɛtsinɛ yo domɛnyinu yinyi. ²⁵ Ega homɛ bubuwo ɖekpekpe lanɔn sekɛl kɔkɔɛ ŋtsi: sekɛl ɖeka lanyi guera ewui. ²⁶ Amɛɖe ŋde kpɔmɔn lakɔ yo lan yo tutugban ŋtsi O, ɖo enyi Yehowa tɔ sigbebe elan yo ŋkɔgbevi; enyi alo alĩn, nyi Yehowa tɔ. ²⁷ Nɛnyi elan makɔmakɔ lɔ, wolaxloe le ega homɛ tsinɛ wokpɔ ŋtsi, yi wolasɔ atɔnlia sɔkpee; nɛ woŋde xloe O, wolasɛɛ ɖo axo nukpɔkpɔ nu. ²⁸ Nusianu tsinɛ amɛɖe lasɔ fian adjɔgbe nɛ Yehowa, le enutsinɛ nyi yitɔ lɔ, woŋde gba sɛɛ, alo laxloe O, etɛnŋ nyi agbetɔ, elan, alo agble tsile yo domɛnyinu mɛ; enusianu tsi wosɔ fian adjɔgbe lanyi Yehowa tɔ kpata. ²⁹ Woŋda xloe agbetɔ ɖekpekpe tsinɛ wosɔ fian adjɔgbe O, ke wolawui yɔ. ³⁰ Enuwolia anyigban tɔ, alo agblemɛ nukuwo tɔ, alo atsikusɛnsɛn tɔ, wonyi Yehowa tɔ; enyi enu kɔkɔɛ nɛ Yehowa. ³¹ Nɛ amɛɖe be yaxloe enuɖe nɛ yo ewolia lɔ, elasɔ akpa atɔnlia kpeɖo ŋtsi. ³² Enu ewolia enyi kudo egbɔ tɔ, alo elan tsinɛ elankplɔtɔ sɔnɔn atsi kplɔnɔn lɔ, lanyi elia nɛ Yehowa. ³³ Woŋda glo womɛ kpɔ, be enyɔn alo enyran, yi woŋda ɖɔli elanɖe kudo nɔnvia O, woamɛ eveawo lanyi enu kɔkɔɛ, yi woŋda tɛnŋ xloewo O. ³⁴ Etsɛwo yinyi egbedoasiwo tsinɛ Yehowa sɔnan Mɔse nɛ Izraɛlviwo, le Sinaï toadji nɛ.