1 Yehowa xonuxo nɛ Mɔse le Sinaï toa dji, yinu be: 2 Tonɛ Izraɛlviwo, be: Nɛ milayiɖo anyigban tsinɛ ŋdasɔ nămi djia, ke anyigban laɖiɖoemɛ: eyɛ lanyi sabbati nɛ Yehowa yo dodoɖodji. 3 Exoe adin wolado enu ɖo axo agble mɛ, exoe adin wolaso axo vingble mɛ; yi wolaɖe nukua. 4 Vɔ exoe anŋdrɛgɔn lanyi sabbati yo xoe nɔnwo, ɖiɖiɖomɛ nɛ axo anyigban, sabbati nɛ nasɔdo Yehowa ɖo edji: ŋde gba donu le axo agblemɛɔn, yi ŋde gba ɖe axo vintsi domɛɔn. 5 Ŋde kpɔmɔ be nado nuku tsiwo guindje axo gbemɛɔn, yi Ŋda gban vinkuwo le vintsiwo tsinɛmɛ Ŋde djraɖo: ke bohun anyigban ɖola ɖiɖomɛ le exoexɔn mɛ. 6 Enutsinɛ anyigban lawa le yo sabbati mɛ lanyi nuɖuɖu nɛwo, axo subɔla nusu kudo subɔla nyɔnu, axo akpɛntetɔ kudo amɛdjro tsinɛ lanɔn anyi kudo wo, 7 axo anyiwo kudo elan tsiwo kpata le eduamɛ; agblemɛ nukuwo lazun nuɖuɖu. 8 Wolahlĩn sabbati amanŋdrɛ yo exoe, exoe anŋdrɛ texoe anŋdrɛ, yi sabbatiɛ yo exoewo lanɔn exoe katsi asiɖekɛ. 9 Le ŋkeke ewogɔngbe nɛ woetri anŋdrɛlɔa, wolaku ekpɛn xoxla; le avunlelegbewo dji, milaku ekpɛn xoxla edua kpata. 10 Yi milakɔ exoe katsiwoa dji, yi milaɖegbefan ablɔɖe le duamɛ nɛ duamɛtɔwo kpata: eyɛ lanyi aseyesoso nɛmi; amɛsiamɛ layiɖo yo nuwo gbɔ, yi amɛsiamɛ latrɔyiɖo yo xomɛ gbɔ. 11 Exoe katsiwogbe lanyi aseyesoso gbe nɛmi: miŋda donu O, yi miŋda ɖe enutsiwo miɔn le woɖekesi le agblewomɛɔn, yi miŋda ɖu vinku tsinɛmɛ woŋde djraɖo. 12 Ɖo aseyesoso yɔ: milakpɔɛ sigbebe enukɔkɔɛ nɛnɛ. Milaɖu mia agblenukuwo. 13 Le exoe xɔnmɛlɔ, amɛsiamɛ layiɖo yo nuwo mɛ. 14 Nɛ wosa nu alo woxle enu le nɔnviwo si lɔ, miadomɛtɔ ɖe ŋgbe tafu nɔnviɛlɔ . 15 Wolaxle enu le nɔnviwo si, le aseyesoso yo exoe dji; yi yilasa enua nɔwo ɖo exoe tsinɛmɛ wolaɖenu mɛ. 16 Exoea yo djiyiyi kudo yo ga yɔ; yi nɛ exoe ŋde sugbɔ lɔ, wolaɖiɖi ega kpɔtɔ; ɖo yo nuɖeɖe nudji yila sɛɛ nɔnwo ɖo. 17 Miadomɛ amɛɖe ŋgbe flu nɔnviɛlɔ, yi wolavɔn Mawu; ɖo enyɛ yinyi Yehowa, axo Mawu. 18 Miwɔɖo axĩn sewo dji, mizɔnle axĩn ɖoɖowo mɛ yi misɔwo do dɔwɔwɔmɛ; yi milanɔn nyuiɖe le duamɛ. 19 Edua lanan yo nukuwo, milaɖu kaka xodo laɖɔ mi, yi milanɔn anyi vɔnvɔn manɔmɛ. 20 Nɛ minu be: Ŋde milaɖu le exoe anŋdrɛgɔn mɛ, ɖo miŋda donu alo laɖe enu O? 21 Nanan yayra mi le exoe andingɔn mɛ, yi yinan nuku exoe etɔn yo nuɖeɖe. 22 Milado enu le woetri enyigɔn mɛ, yi milaɖu nuku xoxotɔlɔ; kakavanan exoe asiɖekɛgɔn, sɔyi exoe yeyemɛ, milaɖu enutsiwo tsi anyi xoxo. 23 Woŋda sa anyigban yi yilatsi amɛasi ɖaaa; ɖo edua nyi tɔnyɛ, ɖo mile gbɔnyɛ sigbebe amɛdjrowo kudo eduamɛnɔntɔwo. 24 Le edu ɖekpekpe tsinɛ milaxɔ mɛlɔ, miɖola ɖo ese tsinɛ lanan be milatɛnŋ xloe anyigbanwo. 25 Nɛ nɔnviwo vanyi woamɛnɔn yi yisa yo texoe ɖe yo akpaɖe lɔ, amɛtsi nɛ kpatsɛ laxloe enua, amɛtsinɛ sɔgbɔ, yi lava xloe nutsinɛ nɔnvia sa. 26 Nɛ amɛɖe ŋde ɖo amɛtsi lakpatsɛ yi laxloe O, vɔ yiŋtɔ dji ega tsi yila tɛnŋ sɔ xɔ enua lɔa, 27 elahlĩn so exoe tsinɛ dji wosɔsa enua, yi yilatu efĩn kpɛtɛa nɛ amɛtsinɛ yidjra nualɔ nan, gbɔxoe layi yo texoe. 28 Vɔ nɛŋde kpɔ ega tsinɛ yilasɔtu efĩnlɔ Ɔlɔ, enutsinɛ yisa latsi alɔmɛ nii kakavanan aseyesosozan yo xoe dji; le aseyesosoa djilɔ, elayiɖo yo texoea, et amɛtsinɛ xloe enua lato. 29 Nɛ nusuɖe sa axoe tsinɛ amɛ latɛnŋ nɔmɛ le du tsinɛmɛ wotɔn ekpa trɔdo lɔ, ke ekpɔmɔn lagbe xɔɛ le gaxoxo ɖe mɛ kpoo; yo atsɛkpakpa le exoe ɖeka domɛ. 30 Vɔ nɛ axoea le edu tsinɛmɛ wotɔn ekpa trɔdo, vɔ woŋde xɔɛ le exoe ɖeka dodomɛɔn lɔ, elakpɔtɔ tsianyi nɛ amɛa kudo yo djidjimɛwo; ŋda to le aseyesoso gbeo. 31 Kɔxoemɛ yo axoewo tsinɛ woŋde ɖo egli trɔdo Ɔlɔ le sigbebe axoea kudo agblenyigban le ɖeka nɛnɛ; wolatɛnŋ xloe yi wolaɖe alɔ le ŋtsi aseyesoso gbe. 32 Vɔ tovonɛ Lewuiviwo yo duganwo kudo axoewo tsinɛ wolaɖo lɔɔ, Lewuiviwo kpɔmɔn laxɔ axoe tsinɛ woxloea. 33 Amɛtsinɛ laxloe Lewuivi yo xoea, lato lemɛ le aseyesoso gbe kudo edugan tsinɛ yixloea; ɖo Lewuiviwo yo eduwo nyi woŋtɔ tɔ, le Izraɛlviwo domɛ. 34 Agble tsiwo trɔdo Lewuiviwo yo duwo, ŋda nyi sasa O; ɖo woŋtɔ woatɔ yinyi ɖaaa sɔyi. 35 Nɛ nɔnviwo vanyi woamɛnɔn lɔ, yi ŋtɛntɛn ŋdele si Olɔ, wola kpeɖo ŋtsi; nɛnɛke wolawɔ nɛ amɛdjro tsinɛ le deuamɛ ɖo, benɛ yanɔn anyi kudo wo. 36 Ŋgbe dji ega ɖodji nii O, wolavɔn axo Mawu, yi nɔnviwo lanɔn gbɔwo. 37 Ŋda do gadjiga nii O, yi ŋda biɔ enu ɖo enutsinɛ wodo nii dji O. 38 Enyɛ yinyi Yehowa, axo Mawu, tsinɛ kplɔmi sɔso Egipti yo dumɛ, benɛ masɔ Kanaan nyigban nami, benɛ manyi mia Mawu. 39 Nɛ nɔnviwo vanyi woamɛnɔn , yi yisɔ yiɖokoe sɔnanwo lɔ, ŋda sɔɛ sɔwɔ kluvi O. 40 Elanɔn gbɔwo sigbebe agbante sɔtɔ nɛnɛ, sigbebe ametsinɛ le gbɔwo; ela subɔwo kakavanan aseyesoso yo damɛ. 41 Yi yila tole gbɔwo, yi kudo eviawo, yi yilatrɔyi ɖo etɔlɔwo yo axomɛ. 42 Axĩn dɔlawo yonyi, tsinɛ ŋɖe tole Egipti dumɛ; woŋda nyi amɛtsinɛwo woladjra sigbebe amɛxloexloewo nɛnɛ O. 43 Ŋgbe kpɔ ŋsɛn ɖodji O, yi wolavɔn Mawu. 44 Dukɔn tsinɛwo trɔdo wo woelanyi axo kluvi nusu alo kluvi nyɔnu, woawo simɛ yi wolaxloe amɛ le. 45 Mikpɔ emɔn laxloe amɛdjrowo yo viwo tsinɛ le miadomɛ, kudo wo xomɛwo tsinɛ woladji le miadomɛ; yi wolanyi miatɔ. 46 Milaɖatsi wo daɖɛ nɛ mia djidjimɛwo, sigbebe wo tɔ nɛnɛ; mila ɖatsiwo ɖɛnɛ wo tɛgbɛtɛgbɛ. Vɔ sɔkuɖo mia nɔnvi Izraɛlviwo ŋtsi lɔ, amɛɖe ŋde kpɔmɔn benɛ yaɖu nɔnvia dji kudo akpasɛnsɛn O. 47 Nɛ amɛdjro ɖe, amɛɖe tsinɛ le gbɔwo va trɔzun gatɔ , yi nɔnviwo yɛ nyi woamɛnɔn vɔ sɔ yiɖokoe sa nɛ amɛdjro alo amɛɖe tsinɛ le amɛdjroa yo xomɛ mɛlɔ, 48 emɔnkpɔkpɔ le benɛ naxloe le gatsimɛ yi yisɔ yiɖokoe sɔsa: Nɔnvia kpɔmɔn benɛ yaxloe. 49 Nyinɛa alo nyinɛa yi vi, alo amɛɖe tsinɛ sɔ xomɛa mɛ; latɛnŋ xloe; alo nɛ nunɔn amɛsi le yiŋtɔ si lɔ, yiŋtɔ laxloe yiɖokoe. 50 Elahlĩn so kaka gbetsigbe yi woxloe vanan aseyesoso yo gamɛ; yi ega tsinɛ yilatu lanyi exoe nɛnɛ tsinɛ woxloe ŋtsi, yi wolahlĩn ɖo agbante dɔwɔwɔ tɔ nu. 51 Nɛ exoe gbogboɖe kpɔtɔ lɔ, elaxloe le exoe nɛnɛ tsinɛ yixloe kudo ega tsinɛ dji woxloe; 52 vɔ nɛkpɔtɔ exoe viɖe nɛ aseyesoso gamɛa , elakpɔɖo eyɛŋtsi , yi yilaxloe ɖo exoewo ŋtsi. 53 Elanɔn gbɔ exoe sia xoe sigbebe agbantedɔwɔtɔ, yi amɛtsinɛ gbɔ yilanɔn ŋda sɔɛwɔ akpasɛnsɛn dɔwɔnu le axo ŋkumɛɔn. 54 Ke nɛ woŋde xɔɛ lexa Olɔ, ke wolaɖatsi le yiŋtɔ kudo eviawo ŋtsi. 55 Ɖo tɔnyɛ yi Izraɛlviwo nyi kluvi nan; axĩn kluvi wonyi; tsinɛ ŋkplɔ sɔso Egipti dumɛ. Enyɛ yinyi Yehowa , mia Mawu.