¹ Yehowa tonɛ Mɔse be: Tonɛ Aarɔn yo vi nunɔnlawo, be: Nunɔnla ɖe ŋda wɔ yiɖekoe makɔmakɔ sɔkuɖo amɛkuku ŋtsi O, ² nɛ ŋde nyi yo xomɛtɔwo ɖeka kpoyɔ, enɔnlɔ, etɔlɔ, alo nɔnviɛ lɔ, ³ kudo nɔnviɛ nyɔnuvi tsiŋde kpɔ yi nusu gbɔɔ, tsinɛ gogoii yi nusuɖe ŋde kpɔ ɖii O. ⁴ Efiɔ tsinɛ le dukɔn domɛ , ŋda xoɖi yiɖokui agblekɔ nɛ yiɖekui O. ⁵ Nunɔnlawo ŋda gble xlɔ tadodomɛ klolooo O, yi ŋda xlɔ yo eguin akpaɖe daɖɛɔ, yi woŋda tewui yo ɖekui O. ⁶ Wolanɔn kɔkɔɛ nɛ wo Mawu, yi wo ŋda gble ekɔ nɛ wo Mawu yo ŋkɔ; ɖo wosɔnɔn numɛmɛvɔsa tsinɛ nyi wo Mawu tɔ sɔyinɔn nɛ Yehowa: woɖolanɔn kɔkɔɛ. ⁷ Woŋda ɖe nyɔnu ahasitɔɔ alo gboloo, woŋda ɖe nyɔnu tsinɛ asua gbe O, ɖo wole kɔkɔɛ nɛ wo Mawu. ⁸ Wolakpɔ nunɔnla be ele kɔkɔe, ɖo woawoe sɔnɔn axo Mawu yo nuɖuɖu sɔyinɔn nii; elanɔn kɔkɔɛ nɔn, ɖo enyɛ Yehowa tsinɛ kɔnɔn miaŋtsi , ŋle kɔkɔɛ. ⁹ Nɛ nunɔnla yo vi xoɖi yiɖokui yi wɔ ahasi lɔ, exoɖi etɔlɔ: wolatɔzoe. ¹⁰ Nunɔnla tsinɛ leta nɛ nɔnviɛwo, tsinɛ wosi ami nan , kudo tsinɛ woɖo yi dawu niia , ŋda xlɔ eta kudo ŋda zɛn yo awuwo O. ¹¹ Ŋda yiɖo amɛkuku ɖe gbɔ , yi ŋda wɔ yiɖokui makɔmakɔ, ɖo etɔlɔ, alo enɔnlɔ ŋtsi O. ¹² Ŋda tole agbadɔa mɛɔn, yi ŋda xoɖi yo Mawu yo agbadɔɔ; ɖo yo Mawu yo amisisi nyi kuɖo le tadji nii. Enyɛ yinyi Yehowa. ¹³ Elaɖe nyɔnu tugbɛdjɛvi tsŋde djesi nusu O. ¹⁴ Ŋda ɖe ahosi, alo nyɔnu tsinɛ asua gbe, alo tsinɛ woxoɖi alo gbolo; vɔ nyɔnuvi tsinɛ le axoea yilaɖe yo dukɔn mɛ. ¹⁵ Ŋda ɖigbɔ eviawo le yo dumɛviowo domɛɔn ; ɖo enyɛ yinyi Yehowa tsinɛ kɔ ŋtsiwo. ¹⁶ Yehowa xonuxo nɛ Mɔse, yinu be: ¹⁷ Tonɛ Aarɔn, be: Nɛ viawo alo yo djidjimɛ viwo domɛtɔ ɖe tsinɛ ŋdele nyuiɖe le afɔgbɔ alo alɔgbɔɔ, benɛ yava gogoŋ asɔ yo Mawu nuɖuɖu vaɔ. ¹⁸ Amɛsiamɛ tsinɛ ŋdele nyuiɖeo ŋdatɛnŋ gogoŋ O: ¹⁹ nusu ŋkuvigbangbanɔn, matakli, alo ŋɔntsi gbangbanɔn, alo amɛtsinɛ yo ŋtsilan djidji; nusuɖe tsinɛ afɔ alo alɔ ŋɛna; ²⁰ amɛtsi ɖokpo alo amɛtsinɛ ɖiku, tsinɛ nuɖe le ŋkudjina, akpakuisinɔn, agbuinɔn alo nɛku gbangbanɔn. ²¹ Amɛɖekpekpe tsinɛ so nunɔnla Aarɔn yo xomɛamɛ , tsinɛ laɖo ŋtsigbe yo masɔmasɔ lɔ, ŋda gogo Yehowa benɛ yasɔ numɛmɛvɔsa sɔva nii O; ɖo yo ŋtsi ŋde sɔɔ: yiŋtsi ŋde kpɔmɔn benɛ yasɔ nuɖuɖu vɔsa sɔvanɛ yo Mawu O. ²² Elatɛnŋ ɖu Mawu yo nuɖuɖu, nutsiwo le kɔkɔɛ ŋtɔ kudo tsiwo le kɔkɔɛ. ²³ Vɔ ŋda yiɖo xɔmɛsovɔa gbɔɔ, yi ŋde kpɔmɔn lagogo avɔsakpea lɔ, ɖo yo ŋtsigbe ŋde sɔgbe O; ŋda xoɖi axĩn kɔkɔɛxoea lɔ, ɖo enyɛ yinyi Yehowa, tsinɛ kɔnɔn wo ŋtsi. ²⁴ Nɛnɛyi Mɔse xonuxo nɛ Aarɔn kudo yo viwo, kudo Izraɛviwo kpata nɛ.