¹ Yehowa xonuxo nɛ Mɔse, yinu be: ² Wolanu nɛ Izraɛlviwo be: Nɛ nusuɖe le Izraɛviwo domɛ alo nyi amɛdjro sɔ evia sɔnan Molɔki lɔ, wola wuii: eduamɛtɔwo laxo ekpee. ³ Yi nyɛlɔ natrɔ axĩn ŋkumɛ ɖo nusua ŋtsi, yi naɖe ɖoɖa le duamɛ, ɖoŋtsi esɔ viawo sɔnan Molɔki, yi yixoɖi axĩn agbadɔ yi xoɖi axĩn nyikɔ kɔkɔɛa. ⁴ Vɔ nɛ duamɛtɔwo mia ŋkuvi ɖo amɛyɛ tsinɛ sɔ eviawo sɔnan Molɔki , yi woŋde wuii olɔ, nyɛlɔ, ⁵ natrɔ axĩn ŋkumɛ ɖo nusua kudo yo xomɛa kpata, yi naɖe ɖoɖa le dukɔnlɔ mɛ, kudo amɛtsiwo kpata le ahasi wɔɔ sigbebe yike nɛnɛ kudo Molɔki. ⁶ Nɛ amɛɖe yɔ aŋɔnliwo kudo gbɔngbɔnwo, benɛ yawɔ ahasi kudo wo lɔ, , natrɔ axĩn ŋkumɛ ɖo amɛlɔ, naɖe ɖoɖa le duamɛ. ⁷ Milakɔ miaɖekoe ŋtsi yi milanɔn kɔkɔɛ, ɖo enyɛ yinyi Yehowa , mia Mawu. ⁸ Mile ŋkuvi ɖo axĩn sewo dji, yi miwuaɖo wo dji. Enyɛ yinyi Yehowa , tsila kɔ miaŋtsi. ⁹ Nɛ amɛaɖe xofĩŋ do etɔlɔ alo enɔnlɔ, lɔ, wolawuii, ɖo etɔlɔ alo enɔnlɔ yi yixofĩŋ do: yo hun lava yiŋtɔ tadji. ¹⁰ Nɛ nusuɖe wɔ ahasi kudo nyɔnu esrɔntɔ ɖe lɔ, nɛ ewɔ ahasi kudo nɔnviɛlɔ yo srɔn lɔ, nusua kudo nyɔnua wolaku. ¹¹ Nɛ nusuɖe dɔn kudo etɔlɔ yo srɔn, yi yikpɔ etɔlɔ yo amămɛ lɔ, nusua kudo nyɔnua wolaku: wo hun lava wo tadji. ¹² Nɛ nusuɖe dɔn kudo yo toyɔvilɔ, wolawu woamɛ evea; wowɔ ŋkpɛnu baɖa: woawo ŋtɔ yo hun lava wo tadji. ¹³ Nɛ nusuɖe dɔn kudo nusuɖe sigbebe letsi wodɔnɔn kudo nyɔnu lɔ, woamɛ eveawo wɔ enunyɔnu; wolaku: woŋtɔ wo ehun lava wo tadji. ¹⁴ Nɛ nusuɖe ɖe enɔnlɔ yo vi nyɔnuvi lɔ, enyi ehlɔn: wolatɔzo woamɛ evea lo, benɛ enuvuĩnɖi yɛ ŋgbenɔn axo dodomɛɔn. ¹⁵ Nɛ nusuɖe dɔn kudo elanɖe lɔ, wolawuii; yi milawu elan lɔ. ¹⁶ Nɛ nyɔnuɖe gogo elanɖe yiwɔ ahasi kudii lɔ, wolawu nyɔnua kudo elan lɔ; woamɛ eveawo wolaku: woaŋtɔ wo hun lava wo tadji. ¹⁷ Nɛ nusuɖe ɖe dadalɔ tsinyi etɔlɔ alo enɔnlɔ yo vi lɔ, nɛkpɔ amamɛ nii yi yitsan kpɔ yitɔ lɔ, enyi ŋkpɛn yonu; wolaɖewo djole woanɔnviwo domɛ le duamɛ: ekpɔ amămɛ nɛ nɔvia, eladro yo nuvuĩn yo agban. ¹⁸ Nɛ nusuɖe dɔn kudo nyɔnuɖe tsile asiɖoanyi mɛ, yi yikpɔ amămɛ nii lɔ, nɛkpɔ ehunlɔ, yi nyɔnua tsan kpɔ ehuan gbɔxoe wɔɛ lɔ, wolaɖewo ɖjoɖa le duamɛ. ¹⁹ Ŋda kpɔ amămɛ nɛ enɔnwo yo dada , alo etɔwo yo dadaɔ, ɖo axo ŋtsimɛ woe: woladro wo nuvuĩn yo agban. ²⁰ Nɛ nusuɖe dɔn kudo tasia lɔ, ekpɔ amămɛ nɛ nyinɛa; woladro wo nuvuĩn yo agban, wolaku evi madji. ²¹ Nɛ nusuɖe xɔ nɔnvia yo srɔn lɔ, enumakɔmakɔ wɔ; ekpɔ amămɛ nɛ nɔnvia, wolanyi evi madjitɔwo. ²² Milawɔɖo axĩn sewo kudo ɖoɖowo kpata dji, yi milazɔn kudo wo, benɛ edu tsinɛmɛ da kplɔmi yi ŋgbe tumikɔŋgbe O. ²³ Miŋdawɔ ɖo dukɔn tsiwo ŋda nyan le miawo yo ŋkɔ; ɖo wowɔ enuyɛwo kpata tsinɛ ŋle nunuɔ nɛmi, yi ŋkpɔwo enunyɔnu. ²⁴ Ŋto nɛmi be: Miawo yilaxɔ edualɔ; nasɔɛ sɔnan mi: edu tsimɛ yi nyinɔnsi kudo anyisi le wɔ. Enyɛ yinyi Yehowa, mia Mawu, tsinɛ ɖemi ɖoɖa le dukɔnwo domɛ. ²⁵ Milado vovototo elan kɔkɔwo kudo makɔmakɔwo domɛ, xevi kɔkɔɛwo kudo makɔmakɔwo, benɛ miŋgbewɔ miadokoii enunyɔnuwo sɔto elan tsɛwo kudo xevi tsɛwo domɛɔn, sɔto elan tsiwo tanɔn le anyigban dji, tsiwo ŋfiɔmi be wole makɔmakɔwo. ²⁶ Milanɔn kɔkɔɛ nuŋ, ɖo ŋle kɔkɔɛ, enyɛ, Yehowa; ŋɖe mi ɖoɖa le dukɔnwo dodomɛ, benɛ mianyi tɔnyɛ. ²⁷ Nɛ nusuɖe alo nyɔnuɖe ɖo amɛkuku gbɔngbɔn le womɛ alo afankankan gbɔngbɔn lɔ, wolawu wo; wolaxo ekpe wo: woawo ŋtɔ wo hun lava wo tadji.