¹ Yehowa xonuxo nɛ Mɔse yinu be: ² Tonɛ Aarɔn kudo eviawo kudo Izraɛlviwo kpata be: Enutsi Yehowa ɖo ke. ³ Nɛ Izralɛlvi nusu tsinɛ so Izraɛl xoedomɛ ɖe do ewui vemɛ nɛ enyi, alĩn alo egbɔnɔn ɖe le asaramɛ alo yo godo, ⁴ vɔ ŋde sɔɛva Mawu yo agbadɔa nu , benɛ yanyi nuɖuɖuvɔsa le Yehowa yo ŋkumɛ, le Yehowa yo nɔnxoe Olɔ, ke edo ehlɔn, ehun lava amɛa yo tadji, ekɔ ehun ɖɛ, wolatsrɔn amɛa ɖoɖa le dukɔnlɔ dodomɛ. ⁵ Yiŋtsi Izraɛlviwo , tsinɛ wolayi sa avɔ le gbewomɛ lɔ, wonɛhĩn sɔva nunɔnla gbɔ, le Yehowa yo ŋkumɛ, le Mawu yo agbadɔa ŋkumɛ, benɛ woasɔɛ ɖo ŋkumɛ nɛ Yehowa sigbebe akpedavɔsawo nɛnɛ. ⁶ Yi Nunɔnla lahlĩn ehunlɔ ɖo yehowa yo avɔsakpea dji , le Mawu yo gbedoxɔa mɔnu; yi yilafiɔn amialɔ, tsinɛ lanyi huĩnhuĩn gbligbligbli le Yehowa yo ŋmɛ. ⁷ Woŋde gba sɔ wo avɔsagbowo , sɔsa avɔ nɛ yo azizawo tsinɛ wosubɔnɔn san O. Eyɛ lanyi ɖoɖo tɛgbɛtɛgbɛ nɔnwon kudo wo djidjimɛwo. ⁸ Wolanu nɔnwo be: Nɛ amɛɖe so Izraɛl yo axomɛ alo nyi amɛdjro le miadomɛ sa numɛmɛvɔ alo wu akpedavɔsa, ⁹ vɔ ŋde sɔɛ sɔva Mawu yo agbadɔa yo ŋkɔ, benɛ yasɔnan Yehowa Ɔlɔ, wolatsrɔn nusutsɛ ɖoɖa le dukɔnlɔ domɛ. ¹⁰ Nɛ nusuɖe so Izraɛl yo axoedoamɛ alo nyi amɛdjrowo le miadomɛ ɖu elanɖe yo hun ɖe lɔ, naɖe ŋku sɔtɔ amɛtsinɛ ɖu ehuan, yi naɖeɖoɖa le dukɔnlɔ domɛ. ¹¹ Ɖo elan yo luvɔn le yo huan mɛ. Ŋsɔɛ sɔnan mi benɛ yanyi nuvuĩnɖɛɖeɖa yo avɔsa nɛmi le avɔsakpea dji nɛ mia luvɔnwo, ɖo luvɔnlɔ mɛ yi agbe le benɛ ehuan nɛkɔ miaŋtsi. ¹² Yiŋtsi ŋtonɛ Izraɛviwo be: Amɛɖekpe ŋda ɖu ehun le miadomɛɔn, alo amɛdjro tsinɛ le miadodomɛ ŋda ɖu ehun O. ¹³ Nɛ Izraɛlvi ɖe alo amɛdjro ɖe tsile miadodomɛ yi adegbe yiwu elan ɖe alo xevi ɖe tsinɛ wolaɖu lɔ, elasɔ yo huan kɔɖo anyigban yi yilasɔ ekɔ kɔɖodji. ¹⁴ Ɖo elanwo kpata yo agbe le luvɔnlɔ mɛ. Yiŋtsi ŋnunɛ Izraɛviwo be: Miŋda ɖu elan ɖe yo hun O; ɖo elanwo kpata yo hun nyi wo agbe: amɛsiamɛ tsinɛ laɖui lɔ, wolatsrɔn amɛa ɖoɖa. ¹⁵ Amɛɖekpekpe , eduamɛvi looo alo amɛdjro looo, tsinɛ laɖu elankuku alo tsinɛ enuɖe vuŋvuŋ looo, lanyan yo awuwo, ela lesi, yi yilanɔn amkɔmakɔ kakavanan woetrɔgbɔ; yo ŋgbodomɛ elanɔn kɔkɔɛ. ¹⁶ Nɛ ŋde nyan yo awuwo O, yi ŋde lesi Olɔ, ke yiŋtɔ yo vodada lanɔn dji.