¹ Yehowa xonuxo nɛ Mɔse le gatsimɛ yi Aarɔn yo vi amɛveawo ku vɔ yo ŋgbodomɛ le Yehowa yo ŋkumɛ. ² Yehowa tonɛ Mɔse be: Tonɛ fofowo Aarɔn, benɛ ŋgbe ɖo kɔkɔɛxoeamɛ gasiagamɛɔn, le xɔmɛsovɔa godo , le nutsɔnu tsinɛ le aɖaka dji yo ŋkɔ, kudo vɔnvɔn be ŋgbe ku O; ɖo naze le alilikpoa mɛ le nutsɔnua dji. ³ Letsinɛ Aarɔn layiɖo Mawu gbedoxɔamɛ ke. Elasɔ eto zaɖe sɔnan nuvuĩnɖeɖeɖa kudo agbo ɖeka nɛ numɛmɛvɔsa. ⁴ Elado yo awutawui vlaya lɔ, yi yilado agbaŋtɛ gode ɣe ɖo yo aman dji; elablasɔ lĩnvɔ bla alĩndji, yi yilasɔ tablanu ɣelɔ sɔbla eta: Eyɛwo nyi awu kɔkɔɛwo tsinɛ yilado le gatsimɛ yi yilesi vɔ. ⁵ Elaxɔ gbɔsu eve le Izraɛlviwo yo hamɛa gbɔ sɔnan nuvuĩnɖeɖeɖa kudo agbo ɖeka nɛ numɛmɛvɔsa. ⁶ Aarɔn lasɔ eto zaaɖe nɛ yiŋtɔ, sɔnan nuvuĩnɖeɖeɖa nɛ yo axoedo. ⁷ Elasɔ agbo amɛvea, yi yilasɔwo ɖo Yehowa yo ŋkumɛ, Mawu yo gbedoxɔa yo ŋkɔ. ⁸ Aarɔn ladjidje enu ɖo agbo eveawo ŋtsi, ɖeka nɛ Yehowa yi evegɔn nɛ Azazɛl. ⁹ Aarɔn lakplɔ agbo tsinɛdji akɔa dje nɛ Yehowa sɔva, yi yilawuii nɛ nuvuĩnɖeɖeɖa yo vɔsa. ¹⁰ Yi wolada agbo tsinɛdji akɔa dje nɛ Azazɛl ɖo Yehowa yo akɔmɛ agbeagbe, benɛ woasɔɖe nuvuĩn ɖoɖa kudo nɛ woaɖatsi ɖo zogbemɛ nɛ Azazɛl. ¹¹ Aarɔn lasɔ yo nuvuĩnɖeɖeɖa yo etoa sɔsavɔ, yi yilaɖe nuvuĩn ɖoɖa nɛ yiŋtɔ kudo yo xomɛan. Elawu yo toa nɛ nuvuĩnɖeɖeɖa. ¹² Elasɔ akazozo tsinɛ yilaɖe le avɔsakpea dji le Yehowa yo ŋkumɛ kudo ezoɖenu , kudo azizɔdonu tutu alɔgogo eve; elasɔ enuyɛwo lasɔyi xɔmɛsovɔa godo; ¹³ elasɔ azizɔdonua ɖo akadji le Yehowa yo ŋkumɛ, benɛ azizɔdonua yo azizɔ nɛbla nutsɔnu tsinɛ le nublablaɖaka dji, be ŋgbe ku O. ¹⁴ Elasɔ etoa yo hun, yi yilhlĩn kudo yo alɔvi ɖo nutsɔnua dji kpanŋkɔ woezexoe; elasɔ yo alɔvi sɔhlĩn ehuan zeandrɛ le nutsɔnua yo ŋkɔ. ¹⁵ Elawu yo ŋgbodomɛ nuvuĩnɖeɖeɖa yo agboa nɛ dukɔnlɔ, yi yilasɔ ehuan sɔyi xɔmɛsovɔa godo. Elawɔɛ nɛ ehuan sigbebe letsi yiwɔɛ nɛ agboa nɛnɛ, yi yilahlĩn ehuan ɖo nutsɔnua dji kudo nutsɔnua yo ŋkɔ. ¹⁶ Nɛnɛyi yilawɔ nuvuĩnɖeɖeɖa nɛ Mawu yo agbadɔa sɔkuɖo Izraɛviwo yo nubaɖabaɖawo ŋtsi kudo avodadawo kpata tsinɛ wowɔ nuvuĩn ŋtsi. Elagbe wɔɛ nɛnɛke nɛ Mawu yo agbadɔa, tsinɛ le woadomɛ le wo nubaɖabaɖawo mɛ. ¹⁷ Amɛɖekpe ŋdanɔn Mawu yo agbadɔa mɛ le gatsimɛ yi yilayiɖo agbadɔamɛ sɔnan nuvuĩnɖeɖeɖa nɛ agbadɔlɔ Ɔ, kakavanan gatsimɛ yi yilato lemɛɔn. Elawɔ nuvʊinɖeɖeɖa yo avɔsa nɛ yiŋtɔ kudo yo axoedoa , kudo Izraɛviwo yo hamɛa. ¹⁸ Le gatsimɛ yi yilato lɔ, elayiɖo avɔsakpe tsinɛ le Yehowa yo ŋkɔ, yi yilakɔ avɔsakpea ŋtsi; elasɔ etoa kudo agboa yo hun, yi yilasɔ sisiɖo avɔsakpea yo sotsiwo ŋtsi trɔdoii. ¹⁹ Elaso yo alɔvi hlĩn ehuan zeandrɛ ɖo avɔsakpea ŋtsi; elakɔ ŋtsi sɔkuɖo Izraɛlviwo yo numakɔmakɔwo ŋtsi benɛ yanɔn kɔkɔɛ. ²⁰ Nɛwu Mawu yo kɔkɔxoe, yo agbadɔa kudo avɔsakpea ŋtsikɔkɔ vɔlɔ, elakplɔ agboa va agbeagbe. ²¹ Aarɔn lasɔ yo alɔ eveawo daɖo etadji nɛ agboa , yi yilahun Izraɛlviwo yo nuvɔnwo mɛ kudo wo nubaɖabaɖawo tsinɛ wosɔwɔ nuvuĩnwo mɛ; elasɔɛ daɖo etadji nɛ agboa, yi yilanyan agboa ɖo zogbemɛ, yi amɛɖe yilakpeɖo ŋtsi lasɔ wɔ edɔ xɔn. ²² Agboa lasɔ nuvɔnwo kpata ɖo yiɖokoe dji sɔyiɖo texoe ɖe tsinɛ amɛɖe ŋde leo; wolanyɛɛ ɖo zogbemɛ. ²³ Aarɔn laɖo Mawu yo agbadɔa mɛ; elaɖe linvɔ yo awuwo tsinɛ yido gbɔxoe ɖo agbadɔa mɛ, yi lasɔwo daɖo xɔn. ²⁴ Ela lesi le texoe kɔkɔɛ ɖe, yi yilagbesɔ yo awuwo. Yi yilato, layiwɔ yo numɛmɛvɔsa kudo dukɔnlɔ yo vɔsa; yi yilawɔ nuvuĩnɖeɖeɖa nɛ yiŋtɔ kudo dukɔ,lɔ. ²⁵ Yi yilatɔzo nuvuĩnvɔsa yo ami le avɔsakpea dji. ²⁶ Amɛtsinɛ nyan Azzazɛl yo agboa lanyan yo awuwo, yi yilale esi; le yo ŋgbodomɛlɔ, elaguĩnɖo asara lɔ mɛ. ²⁷ Wolasɔ nuvuĩnvɔsa yo etoa kudo agbo yo nuvuĩnvɔsa tsinɛ yo ehun wosɔyiɖo agbadɔa mɛ, yi wolatɔzo wo agbazewo, wo lanwo kudo wo miwo. ²⁸ Amɛtsinɛ latɔzowo lanyan yo awuwo, yila lesi: le yo ŋgbodomɛan elaguĩnɖo asara lɔ mɛ. ²⁹ Eyɛyinyi ese tɛgbɛ nɛmi: le woetri anŋdrɛgɔngbe , le ŋkeke ewogɔngbe le woetria mɛlɔ, milabla enu, yi miŋdawɔ edɔ ɖekpe O, duamɛtɔ loo, alo amɛdjrovi tsinɛ le miadomɛ. ³⁰ Ɖo le ŋkeke xɔngbe lɔ, wolawɔ nuvuĩnɖeɖeɖa nɛmi , benɛ miakɔ: milakɔ tole mia nuvuĩnwo tsinɛ miwɔ le Yehowa yo ŋkumɛ. ³¹ Etsɛ lanyi Sabbati yo ŋkeke nɛmi, ŋkeke tsinɛ mila ɖiɖomɛ, yi milabla enu. Ese mavɔmavɔ yilanyi nɛmi. ³² Nunɔnla tsinɛ xɔ amisisi kudo woɖuii benɛ yaɖɔli etɔlɔ le Mawudɔamɛ yilawɔ lexa yo nuvuĩnɖeɖeɖa; elado linvɔ yo awuwo, kudo awukɔkɔɛwo. ³³ Elakɔ kɔkɔɛxoe yo kɔkɔɛxoewo kpata ŋtsi, elakɔ agbadɔa kudo avɔsakpea, yi yilakɔ nunɔnlawo ŋtsi kudo dukɔnlɔ yo hamɛa kpata ŋtsi. ³⁴ Eyɛlanyi ese mavɔmavɔ nɛmi: elawɔɛ nuvuĩnɖeɖeɖa zeɖeka le xoemɛ nɛ Izraɛviwo , sɔkuɖo wo nuvuĩnwo ŋtsi. Wowɔ nutsinɛ Yehowa ɖonɛ Mɔse dji.